Read Southern Rengma Naga BINZEN 11 Bible Online

BINZEN 11 - Southern Rengma Naga bible

BINZEN 11

¹A-keri ka kazü temi aphu khwe me lo jo me sen hü.

²Anyugun le npho zin ho tseo Babilon ketejon nme nyu ryüo tsüka bin lo.

³Anyugun le khinyunyu ka, “Ryülo! ngun itatso thyü pe ro nko salo tinu.” Tson-o anyugun le itatso lo kükhin pe tsü tün kesülo nrün thyülo.

⁴Anyugun le, “Ntsoka we ngun tsokhwe khwe pe tsang tun kethyü le kebin nyida nme thyü pe ngun zan thyü tile lo kazü aphu nyu nrenru tinla loha,” tse zoshü.

⁵Tsüselo Npugü le temi dan le thyükelo nyida gü lo tsokhwe gü nrishü titse tsenryü-o,

⁶“Ntsoka temi hidan aphu khwen me; lo hile anyugun le nyuthyü tiyo binzen gü gwenzin. Whütse anyugun le nyuthyü nyü yo thyülo lati!

⁷Tsügenyu ngun tsen gü anyugun khwejo thyü kevü lao anyugun no kekhwe shamvula tile nu.”

⁸Tson-o Npugü le anyugun no kazü aphu so nrenru tinlao, nyida gü thyülo mvula.

⁹Nyida gü pe Babilon tse kola, kechamvu le tsünyu Npugü le temi aphu khwen no kerhünkerhü la; lo tsünyu temi no kazü aphu nyu nrenru tin kela genyu.

¹⁰Hile Shem tsipwen dan. Zükemihen siki chenhvu ka Shem le a-keyhun chen tsime ka Arpachshad tse kethyü peche nme nnyulo.

¹¹Tsüsiki a-le chen tsi pvün yhun-o a-nyenyu kecha dan nnyulo.

¹²Arpachshad le chen shenryü pvün ka a-nyu Shelah tse kethyü peche nme nnyulo;

¹³tsüsiki a-le chen tsizio kenshen yhun-o a-nyenyu kecha dan nnyulo.

¹⁴Shelah le chen shenryü ka a-nyu peche Eber tse kethyü nme nnyulo;

¹⁵tsüsiki a-le chen tsizi-o kenshen yhun-o a-nyenyu kecha dan nnyulo.

¹⁶Eber le chen shenryü pezi ka a-nyu peche Peleg tse kethyü nme nnyulo;

¹⁷tsüsiki a-le chen tsizio shenryü yhun-o a-nyenyu kecha dan nnyulo.

¹⁸Peleg le chen shenryü ka a-nyu peche Reu tse kethyü nme nnyulo;

¹⁹tsüsiki a-le chen tsihvuo tekü yhun-o a-nyenyu kecha dan nnyulo.

²⁰Reu le chen shenryü kenyhun ka a-nyu peche Serug tse kethyü nme nnyulo;

²¹tsüsiki a-le chen tsihvuo tsenyü yhun-o a-nyenyu kecha dan nnyulo.

²²Serug le chen shenryü ka a-nyu Nahor tse kethyü peche nme nnyulo;

²³tsüsiki a-le chen tsihvu yhun-o a-nyenyu kecha dan nnyulo.

²⁴Nahor le chen nkio tekü ka a-nyu peche Terah tse kethyü nme nnyulo;

²⁵tsüsiki a-le chen tsio tseryü tekü yhun-o a-nyenyu kecha dan nnyulo.

²⁶Terah le chen hentsenyü siki, a-le Abram, Nahor lo Haran hidan pvü thyülo.

²⁷Hile Abram, Nahor lo Haran dan pvü Terah tsipwen. Haran le Lot a-pvü,

²⁸lo Haran le a-pvü le rhün kebin ka Babilon nyu a-nyugun nyida Ur nyu sila.

²⁹Abram le Haran nyugi Sarai, lolo, Nohor le Milkah lo, tsügü nyugi le Iskah kobin.

³⁰Sarai le nyu zenmvu.

³¹Terah le Kanan kazü ki gü titseo a-nyu gü Abram, a-nyugü nyu Lot, tsüle Haran nyu gü, lo a-mogi Sarai Abram nu tse zen-o Babilon nyu Ur nyida gü nken chwila. Anyugun le gü Haran tilo-o tsünyu binlo.

³²Terah le a-keyhun chen tsihvuo pvün ka tsünyu sila.