Read Southern Rengma Naga BINZEN 12 Bible Online

BINZEN 12 - Southern Rengma Naga bible

BINZEN 12

¹Npugü le Abram ka zoshü, “N kazü, n shvu nnye lo Npvü ka khelao, ale kazü nme tsin pe nhishü titse kebin günyu gunlo.

²Ale ntsipwen kechon pe ntsüti, tson-o anyugun le senye keda nme thyü soryü ti. Ale jochü pe ntsüo n no zankechwi thyüti, tson-o n no megenyu jochü nme thyüti.

³Jochü pe nketsü nyu ale jochü pe tsüti. Ai shochün pe nketsü nyu ale shochün pe tsüti. Lo nge ale jochü pe senye aphu tsüti.”

⁴Abram le a-keyhun chen hentsenyü pvün ka Haran nyu tsonchü chwila, Npugü le a-no thyülo tse keshü hontse; Lot le a-zen-o gü.

⁵Abram le a-nu Sarai, a-sikezen gü nyugü Lot, lo a-le Haran nyu kequen kelo kenya lo a-go aphu zen-o Kanan kazü ki gü titse tsonchü shüla. Anyugun le Kanan tikelo ka,

⁶Abram le Shechem nyu bin kenshün gü nyu Moreh ka senbin kenshün gü tilo kemvu then njwen-o kazü gü rhi gü. (Tsügwenkho ka Kanan nyu le kazü günyu yhun bin zun.)

⁷Npugü le Abram yhühyu thyü ryüo a-ka zoshü, “Ale pe ntsipwen tsü titse kebin kazü le hile.” Tsüselo Abram le tsüka kershvubin nme thyü pe a-yhühyu thyü keshü Npugü tsü.

⁸Tsüsiki a-le ketu-o tesinzin Bethel nyida gü npho kipon rincho kazü ki gü nkhün zinle Bethel lo npho zin Ai tse au jaka kensenbin nme thyülo. A-le tsünyu ko kershvubin nme thyülo-o Npugü rüshvu.

⁹Tson-o a-le bin me ka kelao kecha ki Kanan tesin zin gü.

¹⁰Ai Kanan nyu chenda thyü lola, lo tsüle gwamvusa kela ge nyu Abram le tesinzin kethün-o Ijipt ki gü tsü ki bin gwa tinla.

¹¹A-le terhi nken-o Ijipt nyu yü kejü ka, a-nu Sarai ka zoshü, “Nle tenunyu kezegwa nme.

¹²Ijipt nyu le nhyu shülo, nle anu le tseo a-nyugun le adushvu lao nno rhün loti.

¹³Tsügenyu nle a lügi letse anyugun ka zola lo; tsonyatselo n genyu ano rhün loti lo ashwi kegwa thyü shüti.”

¹⁴A-le terhi nken-o Ijipt nyu yü laryü, Ijipt nyu le a-nu le zegwasa kethyü hyushü.

¹⁵Raja hensin nyu kedanyu peha le hyushüo tsügi le zegwa letse raja gü ka zoshüla; tsügenyu a-zen raja kanyu güla.

¹⁶Tsügi genyu raja güle Abram shwikegwa thyüshü, lo tanyü, tenyü, methu, gada, do lo ut pe Abram tsüshü.

¹⁷Ai raja gü le Sarai zenlo kela genyu Npugü le kethyükenyü kenrin kethyü nipe a-ge lo rajaka nyu temi dan ge shü.

¹⁸Tsüselo Raja gü le me nipe Abram koshüo, “Nle age nyuthyü shü bin nla?” Nyuthyüo a-le nnu letse aka zomvula?

¹⁹Nyuthyüo a-le nlügi letse shüo ano a-lope anu thyü titse zen lo hü nla? Nnu le hika re; a-zen lo-o tinla.

²⁰Raja gü le ahza pe a-temi dan tsüshüo anyugun no Abram, a-nu lo a-hon aphu sen a-kazü nken chwila.