Read Southern Rengma Naga BINZEN 13 Bible Online

BINZEN 13 - Southern Rengma Naga bible

BINZEN 13

¹Abram le a-nu zen lo a-hon aphu sen Ijipt tesozin chwio Kanan tesin kipon güla, lo Lot ko a-zen gü.

²Abram le, tanyü, tenyü, methu lo suna lo rakagi-e n nyasa.

³A-le bin tsügü nken-o ketu lika hika tse Bethel kipon güla. A-le gü himhundyü a-kensenbin Bethel lo Ai au ja tilo

⁴tson-o tsüka kershvubin nme thyüshü. Tsünyu Npugü rüshvu.

⁵Lot ko tanyü, tenyü, methu lo a-kami lo a-gonyu le bin.

⁶Tsügenyu au mihvu kengü bin titse kethyü senru chvükelo bin rhori la; au le senru chonritsin le kebin genyu.

⁷Tsüselo Abram senru kekhwenyu lo Lot senru kekhwenyu ja nyu kega sola. (Tsügwenkho tsüle Kanan nyu lo Periz nyu le kazü tsügü nyu yhun bin zün.)

⁸Tsüka Abram le Lot ka zoshü, “Nnyi kami nme tsügenyu ntemi lo atemi no kega loshvu.

⁹Tsügenyu nnyi kekho la tile. Nle kazü di gü lo nyüyo kejülo. Nle nme zin gülo, ale kechazin gü lati.”

¹⁰Lot le lizin hizin shwishüo Jordan ketejon apentha hyushü, Zoar tson aphu zü le kesü thyü, Npugü chwi gü hontse nmvue Ijipt kazü hontse. (Hile Npugü le Sodom lo Gomorrah nyida nke kela mhundyü.)

¹¹Tson-o Lot le Jordan ketejon apentha kejü lo-o ketu-o nphozin güla. Au kekho kela le tsühontse.

¹²Abram le Kanan kazü nyu bin tinla, lo Lot le ketejon ki nyida dan nyu bin-o Sodom kho ka nsenlo,

¹³temi tsüdan le serimvu- lo mu pe Npugü ntsun la.

¹⁴Lot le tinkela siki Npugü le Abram ka zoshü; “Nle kebin bin nyu bin-o lizin hizin pen petsü sa shülo.

¹⁵Nle hyu kebin kazü aphu ale pe nle lo ntsipwen dan tsüti, lo tsü le kethonthen hagun hon thyüti.

¹⁶Ale tsipwen kechon pe ntsüti temi nme no tsü swübu loho; kazü nyu kenphü aphu swü kethyü gü we nle kvu ti!

¹⁷Tsügenyu ntsoka gü kazü gü apentha pen shülo, ale tsü aphu pe ntsü nrün genyu.”

¹⁸Tson-o Abram le a-kensenbin sen ketu ryüo Hebron nyu Mamre senbin kenshün gü khoka bin lo-o tsüka kershvubin nme thyü pe Npugü kishü.