Read Southern Rengma Naga BINZEN 14 Bible Online

BINZEN 14 - Southern Rengma Naga bible

BINZEN 14

¹Raja pezi, Babilon raja Amraphel, Ellasar raja Ariok, Elam raja Chedorlaomer, lo Golim raja Tidal,

²tse kengü gü raja kecha pvün zen-o teri thyü; Sidom raja Bera, Gomorrah raja Birsha, Admah raja Shinah, Zeboüm raja Shemeber lo Bela (nmvue Zoar) raja.

³Raja pvün dan hile kengüo Siddim ketejon nyu anyugun rihü dan kerhünlo, tsüle ntsoka kesi Zida.

⁴Anyugun le chen tseryü kenyhun Chedorlaomer hensin bin hü, ai chen tseryü kenshen gü ka anyugun le a-ntsun lola.

⁵Chen tseryü pezi ka Chedorlaomer lo a-logwa dan le anyugun rihü zen ryüo Ashteroth Karnaim nyu Rephaim, Ham nyu Zuzim, Kiriathaim ketejon nyu Emin,

⁶lo Edom kazüthun ki Horites tse hü gü kazü kesi teki anyugun nye kvu lola.

⁷Tsüselo anyugun le hun-o rani Kadesh (Enmishpat tse kehü gü) ki ryü. A-nyugun le Amalek nyu kazü aphu lola lo Hazazon Tamar nyu yhun kehü Amor nyu nye kvu lola.

⁸Tson-o Sodom, Gomorrah, Admar, Zeboüm, lo Bela raja dan le Siddim ketejon nyu anyugun rihü zen gü teri thyü

⁹Elam, Goüm, Babilon, lo Ellasar tse raja pezi zen-o, Raja pvün le pezi zen kentsun.

¹⁰Ketejon günyu tekhün kü le sübin, tsü genyu Sodom lo Gomorrah raja le terinyu tin kethyü ka tekhün kü nyu chela; ai raja kecha mishen dan we tin kazüthun ki güla.

¹¹Raja pezi dan le Sodom lo Gomorrah nyu tha aphu khilo la, ketyüketsü sin-o sen tinla.

¹²Lot Abram sikezen gü nyu le Sodom nyu yhun bin, tsügenyu anyugun le tsügü lo a-hon aphu sen tin la.

¹³Ai temi nme le tinchwi lo-o tha aphu pe Amor nyu temi Mamre hon senbin kenshün gü khoka yhun kebin Ibri nyu gü Abram ka zo shü. Mamre lo a-sikezen hvu Eshcol lo Aner tse le Abram logwa thyü hü

¹⁴Abram le a-sikezen gü nyu Lot ten lo kela nyülo-o kensenbin nyu kebin teri temi aphu ko kequen shü, aphu le 318, tson-o raja pezi dan hü-o Dan ki gü.

¹⁵Tsünyu a-le a-temi dan kenjün kho lo-o khejenyu shwikerüchün nyu dan when-o tsüdan so kvu lola. A-le tsüdan hü tsügü Damaska tesozin Hobah ti,

¹⁶tson-o kanyü sentin kela dan khini lola. A-le a-sikezen gü nyu Lot lo a-hon ko khini lola, lo tenunyu dan lo do kecha dan ko sin zen lola.

¹⁷Abram le Chedorlaomer lo raja kecha dan so kvu lo-o gun keryü ka Sodom nyu raja gü le gü Shaveh (raja kazü ketejon tse ko kehü) ketejon ka a-teno.

¹⁸Lo Salem nyu raja Melchizedek, ketetsotsin Sunggigü püshü keda ko thyü kehü gü le tensü lo vainzu senryü Abram tsü,

¹⁹lo jochü pe a-tsüo, “Ketetsotsin Sunggigü tsang kazü thyükeshü gü no jochü pe Abram tsü nda!

²⁰Ketetsotsin Sunggigü, nshwikerüchün nyu sokvu kelo pe nketsü gü no teshwe pfülo!” Lo Abram le a-le terinyu khikelo aphu jüntseryü jünme pe Melchizedek tsü.

²¹Sodom raja gü le Abram ka zoshü, “Terinyu khikelo nle lo, ai atemi aphu rani pe atsülo.”

²²Abram le a-jokenishü, “Ale Ketetsotsin Sunggigü, tsang lo kazü thyü keshü Npugü mhundyü nyu swe bin nle,

²³ale nhon nme khi loho, ni tsüme nmvue phakü ron-e. Tson-o nno, ‘ale Abram thyü pe nnya shüle tse zo loho.’

²⁴Ale agenyu thame khi loho. A temi dan le sen kehü nti loti. Ai a logwa thyü kebin Aner, Eshcol lo Mamre dan no anyugun jün khilo lo.”