Read Southern Rengma Naga BINZEN 15 Bible Online

BINZEN 15 - Southern Rengma Naga bible

BINZEN 15

¹Tha higü sika tsemin ki Npugü le ryüo Abram ka, “Nshvunyalo Abram, Kenshvu nyu ale n nokhin loti lo nchün keda nme pe n tsüti.”

²Ai Abram le, “A-phuso kekvu Npugü, ale anyenyu nme kendi le, nle achün thyü keshü tsüle agenyu nyukegwa thyülo tila? A kenya gwen nrün le Damaska nyu temi Eliezer n tiso.

³Nle anyenyu nme-e pe atsü shümvu, agonyu nme le akenya dan gwen tiso.”

⁴Tsontsin Npugü le a-ka zonikeshü a-le nyülo: “Gogü Eliezer le nkenya dan gwen loha; n npvü nnyu le nkenya gwen ti.”

⁵Tson-o Npugü le a-zen kamhun ki chwiryüo a-ka, “Tsangge nri shüo, nle swülo gwa yatselo shyenyü dan swüshwilo; tsonshüo a-ka ntsipwen no chon pe tsühontse ti.”

⁶Abram le Npugü tenyen, lo a-ketenyen hi genyu Npugü le a-shwi a-kenyüo a-le kemitsin le tselo.

⁷Tson-o Npugü le a-ka, “Ale kazü higü pe ntsüo nno nhon thyü titse Babilon nyu Ur ka nzen chwiryü le.”

⁸Ai Abram le, “Npugü Sunggigü, tsüle ahon thyü titse ale dihontse shalo gwa tila?” tse shünshü.

⁹Tsontsin a-ka, “Methutsü nme, tenyü lü nme lo tenyütse nme, chenshen shen thyü kela, lo nsu nme lo paro nme tse senryü atsü shülo.”

¹⁰Abram le nyukhu tsüdan sen Sunggigü ki ryüo; duthü kenyhun thyü pe ponha pe kecha gü ntsun küshü; ai ale tegü hvu we duthü mvu.

¹¹Güda dan le thyükesimi dan ge ryü, ai Abram le tsü hüla.

¹²Yhüko che güzhü kelaki, Abram le zhüsa güla, lo tsüka kenshvu lo kenrin kethyü le a-ge ryü.

¹³Npugü le a-ka, “Nsenye le lojvü kecha ki tesin thyüo yhunti; a-nyugun le tsüki chen tsizi medo thyü lo mele anyugun nshwe ti.

¹⁴Ai ale shaja pe anyugun no a-dokethyü tsipwen gü tsüti, lo anyugun le lojvü tsü gü kheo tin kejü ka kenya kechon senchwi ti.

¹⁵Lo nno thensa kela siki nnyun bwenye tse sio n lope sunti.

¹⁶N tsipwen dan le rani hiki ryü kemvu ka phuzi no bin ti, Amornyu temi dan serikemvu le pen kemvu zun genyu.”

¹⁷Yhüko che la-o zün lo ntsin, mah kekhu la nme lo mah kenyü chwe nme le chwiryüo nyukhu duthü pe shü kenjü janyu tin la.

¹⁸Tson-o tsüka Npugü le Abram zen-o kejozen nme thyüshü. “Ale Ijipt rhi ka gü Eufrates züri gü keti kazü hi aphu pe n tsipwen tsüti,

¹⁹Kenitnyu, Keniznyu, Kadmonitnyu,

²⁰Hitnyu, Periznyu, Regaim,

²¹Amornyu, Kanan nyu, Girgashnyu lo Jebusnyu kazü aphu sin.”