Read Southern Rengma Naga BINZEN 16 Bible Online

BINZEN 16 - Southern Rengma Naga bible

BINZEN 16

¹Abram nu Sarai le nyu nme-e nnyu pe a-tsümvu. Ai a-le a-go gi nme Ijipt nyu a-zan le Hagar tse kethyü le bin,

²tsü genyu Sarai le Abram ka, “Npugü le ano nyu nyhun mvu laso. Nle a-ki gülo, a-le nyu nnyu pe atsü-e logwa.” Tson-o Abram le Sarai jozen la.

³Tson-o a-le Hagar pe Abram no a-thenu thyü. (Abram le Kanan nyu yhun kebin chen tseryü siki.)

⁴Abram le Hagar zen kengüo tsügi le nyu phupfü lo. A-le nyu phupfü lo kela shalo-o ketekho lo Sarai shwi ntsü lola.

⁵Tsüselo Sarai le Abram kazo, “Hagar le ashwi ntsü kebin tsüle n kemu le. Ale tsügi pe ntsüshü, lo a-le nyu phupfü kebin shalo ntsin a-le ashwi ntsü lola so. Nhin digü le njü yo Npugü no kera shülo!”

⁶Tsontsin Abram le, “Gwasa le, a-le ngogi lo nben nyu bin nyo; nle a-khipe nyuthyü nyüyo thyülo.” Tsüselo Sarai le Hagar nshwenyhün sa-o tsügi le tinla.

⁷Tsüka Npugü jolonyu nme le Shur ki kegü tson kazü kesi gü nyu zülu nme ka Hagar teno lo-o

⁸a-ka, “Sarai gogi Hagar, nle dikipon ryü lo diki gü zhü nla?” tson ketso. Tsontsin a-le, “Ale a npugi kanyu tin jü nle,” tsonshü.

⁹Npugü jolo gü le a-ka, “Rani-o Npugi ki gun gü a-go thyü bin lo.”

¹⁰Tson-o, “Ale n tsipwen thyü nchon pe swülo bukeho thyü shüti.

¹¹Nle peche nme nnyu loti, lo a-zan pe Ishmael tholo, Npugü le nle nnyu kenjün thyüo nra keshü nyülo kela genyu.

¹²Ai nnyu gü le tehen gada nme hontse ti; a-le ligü higü-e ntsun lo ligü higü a-ntsun ti. A-le a-shvunye aphu zen kekha-o yhun ti.”

¹³Hagar le a-npfü a-nthon-o, “Ale Sunggigü hyutsin thyü la-o yhun bin-o tsü rüla zolo gwa ti ole?” Tson-o a-le a-nthon keshü Npugü pe, “Hyukehü Sunggigü,” tse kola.

¹⁴Tsügenyu mele Kadesh lo Bered au jaka zülu gü tsüpe, “Ahyu kebin Rhünkehü gü zülu tse ko hü.”

¹⁵Hagar le peche nme nnyu pe Abram tsü, lo a-le a-zan tha pe Ishmael thyülo.

¹⁶Tsü gwenkho tsüle Abram le a-keyhun chen hentetseo tsero ka.