Read Southern Rengma Naga BINZEN 17 Bible Online

BINZEN 17 - Southern Rengma Naga bible

BINZEN 17

¹Abram, le chen henteküotekü ka Npugü le a-hyühyu thyüo a-ka, “Ale kekvutsin Sunggigü le. A jo zenlo lo a-zintse nyule a-züyo tsü thyülo.

²Ale n zen-o kejozen kelo thyüti, lo n tsipwen kechon pe ntsü ti.”

³Tsontsin Abram le a-mhunpfü kazünyu nkhünrün tinla, tsüka Sunggigü le,

⁴“Ale nzen-o hi kejozen bin nyo: Nno senye kechon bon thyüti tse ale johoshü bin nle.

⁵Nzan pe Abram thyü sin loho, ai abraham tseti, ale nkhipe sense kechon bon thyü kela genyu.

⁶Ale n tsipwen kechon khishüti, lo anyugun peha le rajanyu thyüti. Nle n tsipwen kechon le bin-o anyugun le senye dan thyü chwiryüti.

⁷“Ale n, lo n tsipwen siki ryü nrün shenhe dan zen-o kethonthen kejozenkelo johokeshü thyüti. Ale n Sunggigü lo n tsipwen dan Sunggigü thyüti.

⁸Ale ntsoka nle tesin thyüo kebin kazü higü pe n, lo n tsipwen dan tsüti. Kanan kazü hi apentha le kethonthen n tsipwen dan hon thyüti, lo ale anyugun Sunggigü thyüti.”

⁹Lo Sunggigü le Abraham ka, “Nko ale nzen-o kejozen kelo hi thyüti, nle lo n tsipwen siki ryü nrün shenhe dan-e no.

¹⁰Nle lo n tsipwen aphu pechenyu nmeme tse kethyü aphu a-girü kü mvu loshvu.

¹¹Ntsoka gerho pechenyu ligü higü nyu lolo jon tetse ka a-girü küti, hagun go hagun kanyu nnyu kelo lo tesin rünyi kecha pisa pe hei kelo dan sin. Higü hile nhin janyu kejozenkelo nme le bin tse tsin shüti.

¹³Nmeme tse girü la mvuloshvu, lo hile ale nzen kejozenkelo, hile kethonthen tse kethyü nthyü ge zansü nme tsinshü nrün genyu.

¹⁴Pechenyu ligü higü a-girü kemvu gü we atemi dan nyu nme tse swü loha, a-le azen-o kejozenkelo gü zenmvu kela genyu.”

¹⁵Sunggigü le Abraham ka, “Nnu ka Sarai tse ko sin loha; ntsoka gerho nyu a-zan le Sarah.

¹⁶Ale jochü pe a-tsüti, lo a-ge peche nme pe ntsüti. Ale jochü pe a-tsüti, lo a-le senye dan jvü gü thyüti, lo a-tsipwen dan nyu rajanyu le chwiryü ti.”

¹⁷Abraham le a-mhunpfü nkhün tsügü kazürün-o tharüchün adyügwa-o, “Temi nme le chentsi kela ki nyu nme hyu logwa ole? Sarah le chen hentekü ki nyu hyulo ti le?”

¹⁸Tson-o a-le Sunggigü ka, “Nyuthyüo Ishmael no a kenya gwen lo lamvu ola?” tse ketsoshü.

¹⁹Ai Sunggigü le a-ka, “Nmvu, Nnu Sarah le pechenyu nme nnyu pe ntsüti lo nle a-zan pe Isak tholo. Ale kethonthen a, lo a-tsipwen zen kejozen ti. Tsüle kethonthen kejozen kelo nme.

²⁰Ale nle Ishmael genyu kehi nyülo laso, tsügenyu ale jochü pe a-tsüti, ale a-nyenyu kechon pe tsüti lo a-tsipwen thyü nchon shüti. A-le raja tseryü kenyhun pvü gü thyüti, lo ale a-tsipwen pe senye keda nme thyü shüti.

²¹Ai ale kejozen kenjü güle nnyugü Isak gen ti, teken ki higwen kho ki Sarah le a-nnyu loti.”

²²Sunggigü le Abraham nthon pen la njio a-kheo tinla.

²³Tsü jonyü Abraham le Sunggigü jozen-o a-nyu gü Ishmael lo a-kanyu kebin pechenyu a-go, a-kanyu nnyu kelo lo a-le hei kelo aphu sin-o anyugun girü küla.

²⁴Abraham le a-keyhun chen henteküo tekü ka a-girülo,

²⁵lo a-nyu gü Ishmael le chen tseryü kenshen.

²⁶Au mihvu nren khenyüme au girülo,

²⁷Abraham gonyu dan aphu zen kentsin-o.