Read Southern Rengma Naga BINZEN 18 Bible Online

BINZEN 18 - Southern Rengma Naga bible

BINZEN 18

¹Abraham le Mamre nyu senbin kenshün gü ka kehü Npugü le ryü a-teshashü. Nhenyu tsangkeyün tsin ka a-le a-phika gü khenpfü nyu kehü ka,

²a-le ngiso shü laryü mishen le tsüka so kebin hyulo. Anyugun hyushü ntsin a-le tinchwi gü anyugun teno, lo nkhün kazü rün-o,

³anyugun ka, “Kedanyu dan, hagun cheno-e a kanyu sun mvutse a-ka nrhi tin la nyata. Ale hagun lothyü titse hika bin nle.

⁴Ale zü keshanyu senryü tile pe hagun pha sü la-o senbin higü hensin sun rüyü lolo.

⁵Ale ketyüketsü keshanyu senryüti; tsü pe hagun thyü nkolo njio hagun kejwen tsonyu gun lolo. Hagun le a rühvuo a kanyu ryü kela si le ano ra pe hagun tsü shülo.” Tsontsin anyugun le, “Agun kenda le, N cheno,” tsonshü.

⁶Abraham le kechokelo thyü phika nyu yügü Sarah ka, “Whütse phünu nme ka tho kegwatsin pe tensü peha ro shülo.”

⁷Tson-o a-le tin-o a-thu dan nyu gü a-thunyu aphu kegwa nme hüzen ryü a-go nyu nme tsü shüo whütse tsü ga pe ketsü kela shü.

⁸A-le ketyüketsü, dohi, Nyüzü, thyükeni tsü khipe temi dan tsüshü. Lo senbin gü hensin anyugun le tyütsü kebin ka a-le a-nyu kho ka sobin.

⁹Tsontsin a-nyugun le a-ka, “Nnu Sarah le diki hü nla?” Tsüka a-le, “Lika phika günyu hü nle,” tsonshü.

¹⁰Npugü le a-ka, “Hisiki shyetekü ka ale niryüti, lo nnu Sarah le peche nyu nme le bin loti.” Sarah le a-si kipon phika gü khünpfü ka bin-o a-khwenyü bin.

¹¹Abraham lo Sarah au le then sala, tson-o Sarah le tenujvü tsü thyü mvu laso.

¹²Tsügenyu Sarah le a-dyügwa-o a-npfü anthon-o, “Ale a kethen kile thyüzi kenyü thyülo gwa ti ole? Tsünyeki, anyepfü ko then laso.”

¹³Tsontsin Npugü le Abraham ka, “Nyuthyüo Sarah le nyüo, ‘ale then sa kela sile ale nyun nme hyu lo ketsin thyü ti ole tson hü nla?’

¹⁴Npugü genyu tsenri kela tha peha le bin ole? Ale zokeshü hontse, ntsoka hisiki shyetekü ka ale niryü ti lo Sarah le pechenyu nme le bin loti.”

¹⁵Sarah le nshvu kela genyu, “Ale nnyü mvule,” tson zoshü. Tsontsin a-le, “Nmvu, nle nnyü la le,” tsonla.

¹⁶Tson-o temi tsüdan le Sodom hyulo kegwa bin ka gü, lo Abraham le anyugun zen tsonki shü titse anyu gü.

¹⁷Lo Npugü le a-npfü a-nthon-o, “Ale nyuthyü tiyabin yo pe Abraham kebu loha.

¹⁸A-tsipwen le senye keda lo kekvu nme thyüti, lo ale a-ge jochü pe tsipwen aphu tsüti.

¹⁹A-no a johokeshü pe anyenyu lo a-tsipwen dan senthyü pe akhwenyü lo nyule a-zü lo njü yo tsü thyülo titse ale a-kejülo laso. Anyugun le tsühontse thyülo ale a-genyu zoshü kenjü tsü aphu thyü shüti.”

²⁰Tson-o Npugü le Abraham ka, “Sodom lo Gomorrah au nmu kethyü le kenrin thyü laso, lo au kemu le gon sa laso.

²¹Ale gü au nmu kebin ale nyükelo tsüle ketsin le kemvu yo shwi shü ti.”

²²Tson-o temi mihvu le tsü nken Sodom kipon gü la, ai Npugü le Abraham zen-o bin.

²³Abraham le gü Npugü ka, “Nle ketsin thyü, kentsenyu pe thyüzü kela nyu sin-o nke la ti ole?

²⁴Keshanyu laka, nyida günyu kentsenyu mi henpvün le binlo, nle nyida gü aphu nke la ti ole? Nle henpvün dan genyu tsü nrho shü mvu ti ole?

²⁵Nle thame ka-e kentsenyu pe kemu nyu sin-o nkela loha. Tson keloimvu! Nle tsonshü loha. Tsonyatse kethyü we kentsenyu pe kemu nyu sin-o shaja hyu laso. Tson keloimvu. Kazü aphu ketso nrün gü le kenjü nyu thyüti.”

²⁶Npugü le, “Ale Sodom nyu temi kentsen henpvün hyu kelo we, ale tsüdan genyu nyida gü aphu nrho shüti.”

²⁷Abraham le zonio: “Npugü ale nka jozoni kebin akemu jüshü lo, Ale temi gwenzin thame kezoi a kenjü ndi.

²⁸Ai kentsennyu le mi henpvün mvule henzi pvün nti lalo. Min pvün le pen mvu kela genyu nyida gü aphu nke la tile?” Tsontsin Npugü le, “Ale kentsen nyu min henzi pvün hyulo ya tse kethyü we nyida gü nkela loha.”

²⁹Abraham le zonio: “Henzi nti bin-e logwa.” A-le, “Henzi le tsünyu bin yatse kethyü we ale tsü nkela loha.”

³⁰Abraham le zo, “Npugü nkenyümvu la nyalo, ai ano zonishü ta. Tsüka shenryü nti laya tselo dihontse mon?” Tsontsin a-le, “Ale min shenryü hyulo yatse kethyü we tsü nkela loha.”

³¹Abraham le zo, “Npugü ale n nthonni kethyü akemu jüshülo. Keshanyu laka min nki nti hyulo lo?” Tsontsin a-le, “Nki hyukelo we nyida gü nke loha.”

³²Abraham le zo, “Npugü nkenyümvu la nyalo, ale gwengwa nti zonishü tile, Mitseryü nti hyulo lo dihontse mon?” A-le zo, “Mitseryü le tsünyu kebin we ale tsü nkela loha.”

³³Npugü le Abraham zen kenthon shüo tinla, lo Abraham le kaki rani ryüla.