Read Southern Rengma Naga BINZEN 2 Bible Online

BINZEN 2 - Southern Rengma Naga bible

BINZEN 2

¹Tsühontse tsang, kazü apentha thyü pen lola.

²Jon tsenyü nyü Sunggigü le a-le thyü kebin tho dan tsü thyü penlo, tson-o rüyü lo.

³Lo Sunggigü le jochü pe jon tsenyü gü geshüo tsü thyü kenshün lo, tsünyü a-le tha rhen penlao a-thonyu rüyü kelo genyu.

⁴Lo hihontseo tsang kazü nyhun shü. Npugü Sunggigü le tsang kazü thyü kelo ka,

⁵tehen zonpenyü thatsi nme kazü nyu tsüchwiryü mvuzun, kechamvule a-le tsangkenri nishü kemvu zun genyu, lo kazü günyu lotsü kethyü temi nme-e ndi;

⁶ai nmha chenchwi ryü kazü gü nchieshü.

⁷Tson-o Npugü Sunggigü le kazü nyu n nyo khilo njio, tsü pe temi nme rhenshü; lo a-le kerhün teshe hen pe a-yhinkon nyu shü ntsin temi gü le rhün lola.

⁸Tson-o Sunggigü le Eden nyu npho zin chwi nme thyüshüo a-le rhenkeshü temi gü khipe shüshü.

⁹A-le senbin kezegwa kechacha kethyü aphu thyü pe no tsünyu yhun-o a-sha kegwa nsha shü. Chwi gü lvunyu kerhün khishü kehü senbin gü lo kegwa lo keshvu shalo kehü senbin ko bin.

¹⁰Eden nyu züri nme le tsun pe chwigü ntsen hü; Eden nyen ki tsü le kenjün kho pe züri pezi thyüla.

¹¹Keri gü le Pishon; tsüle tsun-o Havilah kazü gü hun bin nyo.

¹²(Tsünyu tsü suna kenshün hyu lohü lo ter a-rün kegwa lo tso min ketsen-e hyulo hü.)

¹³Kenyhun gü le Gihon; tsüle tsun-o Kush kazü gü hun bin nyo.

¹⁴Kenshen gü le Tigris, tsüle tsun-o Assiria npho zin tsübin, lo pezi gü le Eufrates.

¹⁵Tson-o Npugü Sunggigü le temi gü no Eden chwi gü sen lo tsü khwen lotse pe tsünyu shüshü.

¹⁶Lo Npugü le temi gü ka, “Nle chwigü nyu terasha lihi-e tyülo gwa,

¹⁷ai nle kegwa lo keshvu shalo kehü senbin gü sha tyü nya, kechagenyumvu le nle tsü tyü keshü nyü si lati,” tsonshü.

¹⁸Tson-o Npugü Sunggigü le, “Temi gü no a-npfü yhun kebin le gwamvu. Ale a-zen kengü lo kethyü nme thyü pe a-che shü ti.”

¹⁹Tson-o a-le n nyon pe tehen thyü lo tegü dan aphu rhen shü. Tson-o a-le temi gü no shwi shüo a-zan tha lolo tse zen ryü a-ki shü; tsühontseo tsüdan aphu zan tho külo.

²⁰Lo temi güle senru, tegü lo tehenthyü aphu zantha külo; ai tsüdan nme-e a-zen kengüto-o a-che lomvu.

²¹Tsontsin Sunggigü le temi gü no jüsa güla, lo a-le jü kebin ka a-nyikhon ru nme khilo-o a-shvu keminila.

²²Tson-o Sunggigü le temi gü ge khikelo nyikhon ru pe tenunyu nme rhen shüo zenryü temi gü ki shü.

²³Tsüselo temi gü le, “A hontse kethyü nme le hika bin laso-- Aru dan nyu aru, lo athyü dan nyu athyü. Temi gü gen chwikeryü genyu a-zan lo pe ‘Tenunyu’ tse koti.”

²⁴Tsügenyu temi le a-pvü lo a-jvü khe la-o a-nunyu zen kengü tin lahü, lo au thyüme thyü tinla hü nyo.

²⁵Tson-o temi gü lo a-nunyu au mihvu nren kenben-e kezha lamvu.