Read Southern Rengma Naga BINZEN 20 Bible Online

BINZEN 20 - Southern Rengma Naga bible

BINZEN 20

¹Abraham le Mamre ka ketu sen-o Kanan tesinzin Kadesh lo Shur au jaka yhun hü. Tsontseo kenkhin ki Gerar nyu yhun kebin ka,

²a-le a-nu Sarah le a-lügi le tse zola. Tson-o Gerar raja Abimelek le Sarah zen lola.

³Kheje me a-miki Sunggigü le ryüo a-ka: “Nle sila ti, nle tenu higi zenlo kela genyu, higi le kalu kela nyu so; ” tsonshü.

⁴Ai Abimelek le a-kho ka ryü mvuzun, lo a-le, “Npugü, ale thyüzümvu! Nle a higü lo a temi dan nkela ti ole?

⁵Abraham le a npfü tsügi le a-lügi letse zoshü, lo tsügi-e tsühontse zoshü. Ale anyun nshün-o thyü le, lo ale thame thyüzü lamvu le.”

⁶A-minki Sunggigü le a-jokeni-o, “Ale nle nnyun nshün hi thyü kela sha bin; tsügenyu ale nno amhundyü nyu mula mvu nrün genyu n ntsen lo-o nno a-kesü mvule.

⁷Ai ntsoka tenugi pe a-nyepvü tsü nila lo. A-le sidyükeshanyu nme, lo a-le n genyu kehi thyüti, tson-o nno simvu loti. Ai nle tsügi rani shüla kemvu we, n-e lo ntemi aphu sila ti.”

⁸Tsüsinyü lony-ü gü Abimelek le a-hensin kedanyu dan aphu ko shüo dihontse layo tsüpe anyugun ka zoshü, tsontsin anyugun le nshvu sala.

⁹Tson-o Abimelek le Abraham ko shüo a-ka, “Nle agun ge nyuthyü shü ola? Ale n ge nyuthyüzü shüo nle kenke sen ryü age lo a rajaphen so shü ti tse ola? Temi nme nle a ge thyü keshü hi hontse thyü loshvu.

¹⁰Nle nyuthyüo tsonshü ola?”

¹¹Tsontsin Abraham le, “Ale Sunggigü kerhvu nme hinyu ndi lo anyugun le adushvu la-o anu zen lola ti ado tse rüchün kela genyu le.

¹²A-le alügi ketsin. A-le apvü nyugi le ai ajvü nyugi mvu lo ale a-lolo laso.

¹³Tsügenyu Sunggigü le apvü kanyu a nipe sinrünyi kazü ki keshü ka, ale a-ka, ‘Nle ligü higü ka-e ale ntsügü le tsezo-o nle ajozen kehü tsinshü logwa le tse a-ka zoshü le.’ ”

¹⁴Tson-o Abimelek le Sarah pe Abraham tsü nila, lo a-le tanyü, methu lo gonyu ko pe Abraham tsü shü.

¹⁵A-le Abraham ka, “A kazü le hile; nle diki bin nyü yo bin lo.”

¹⁶Abimelek le Sarah ka, “N zen kehü dan aphu mhundyü ka nle thyüzü lamvu tse kethyü zansü ale raka yieme pe ntsügü tsüshü bin nle; nle thyüzü lamvu tse kethyü ligü higü shalo ti.”

¹⁷Abraham nu Sarah no tson kela genyu, Npugü le Abimelek keda kanyu tenunyu nme-e no nyuzen mvula. Tsügenyu Abraham le Abimelek genyu hishü, tsontsin Sunggigü le a-thyü kesherhün shü. A-le a-nu lo a-gogi dan ko thyü kesherhün shüo anyugun no nyuzen lo.