Read Southern Rengma Naga BINZEN 21 Bible Online

BINZEN 21 - Southern Rengma Naga bible

BINZEN 21

¹Npugü le zokenjü hontse, a-le jochü pe Sarah tsüshü,

²tson-o a-le nyuphupfülo-o Abraham le thenkela siki peche nme nnyulo. Annyu titse Sunggigü le zokeshü gwenkho toka.

³Abraham le a-zan pe Isak tholo.

⁴Lo Abraham le Sunggigü le a-ka zokeshü hontse, Isak le jon tetse ka a-girü lo.

⁵Isak nnyu kelo tsüle Abraham le chen tsime la.

⁶Sarah le, “Sunggigü le shekerhün lo kenyü senryü atsü shü laso. Tsü rüla nyü kelo nyu aphu azen-o nnyüti.”

⁷A-le zosin-o, “Segü le Sarah le ntsenyu no a-gen a-hon tsüti tse Abraham ka zo tila? Ai a-le a-kethen ki ale peche nme nnyu shü laso.”

⁸Nyugü le min soryü, tson-o tha tyü keso jonyü, Abraham le keho keda nme thyüshü.

⁹Khenyüme Ijiptnyu Hagar le nnyu pe Abraham tsü keshü gü Ishmael le Sarah nyugü Isak nshwe bin.

¹⁰Sarah le au hyushüo Abraham ka, “Do higi lo a-nyugü au nila lo. Tenunyu higi nyu gü no anyu Isak le gwen nrün a-jün thame hyulo nrün ndi.”

¹¹Hile Abraham nyuthyü nshvu sala, Ishmael ko a-nyu genyu.

¹²Ai Sunggigü le Abraham kazo, “Nyugü lo n gogi Hagar au genyu n nyun kenjün thyü nya. Sarah le nka nyu zoyo thyülo, Isak ge ale nka zoshwishü kenjü n tsipwen le bin nrün genyu.

¹³Ale n tsenyu kechon pe gogi nyugü ko tsüo a-no tsipwen nme thyü so ryüti. A-ko n nyu le.”

¹⁴Tsüsi lonyü gü Abraham le chvü lo zü thyügi khin nme pe Hagar tsüshü. A-le nyugü pe a-npfü shüo ninla. A-le tin gü Beersheba tehen nyu hohü.

¹⁵Zü gütsü ndi la ntsin a-le nyugü pe tehenphun nme hensin shüla

¹⁶njio gü miter tsime khoka dun bin. A-le a-npfü a-ntho-o, “Ale anyu kesi nri keloi mvu.” Tson-o tsüka dun-o chü sola.

¹⁷Sunggigü le nyugü le chü kebin nyülo-o tsanggelonyu nme nipe Hagar nthon-o, “Nle nyuthyüo nnyun kenjün thyü bin nla Hagar? N shvunya. Nyugü kechü khwen Sunggigü le nyülo laso.

¹⁸Solo, gü a-pen lo-o a-nyunthyü nbweshü. Ale a-tsipwen ge senye keda nme thyü shüti.”

¹⁹Tson-o Sunggigü le a-yhütyü khinshe shüo a-le zülu nme hyulo. A-le gü züpe thyügi khin gü sülo-o peha pe nyugü lashü.

²⁰Sunggigü le ntsenyu gü zen hüo, a-le min soryü; a-le Paran tehen nyu yhun hüo thyü hükeshanyu nme thyü soryülo.

²¹A-jvü le Ijipt nyu tenunyu nme fü pe no a-nu thyülo.

²²Tsügwenkho ka Abimelek le a-rihü dan so keda gü Phikol au gü Abraham ka, “Nle lihi thyü kehü nyu Sunggigü le nzen hü nyo.

²³Tsügenyu hika Sunggigü mhundyü nyu nle, a higü, anyenyu, nmvue a tsipwen sa loho tse swe lalo. Ale n ge ketsin thyü hü, tsühontse nko a ge lo nle tesin thyüo a-nyu yhun kehü kazü gü ge ketsin thyülo.”

²⁴Abraham le, “Ale zoshwishü laso,” tsonshü.

²⁵Abraham le Abimelek gonyu dan le zülu nme khin lo kela rüla kenya shü.

²⁶Abimelek le segü le hithyü layo ale shamvu. Nle tsü rüla aka zomvu. Ale notsoka nyu tsü nyü kelo gwenzin.

²⁷Tson-o Abraham le tanyü lo methu peha pe Abimelek tsü, tson-o au kejozenkelo nme thyülo.

²⁸Abraham le a-tanyü dan nyu tanyü nyu tsenyü khi kecha thyülo.

²⁹Abimelek le a-ka, “Nle nyuthyüo tson bin ola?” tse ketso.

³⁰Abraham le zo, “Tanyünyu tsenyü hi khilo. Hige hi nle ale zülu higü hi tsoshü le, tse kethyü zansü.”

³¹Tson-o bin tsügü pe Beersheba tse kolo, au le tsünyu keswe thyü kethyü genyu.

³²Au le Beersheba ka higü hi kejozenlo kela siki Abimelek lo Phikol au le Filistian kazü ki ni güla.

³³Tsüselo Abraham le Beersheba nyu tamarisk senbin nme sen shüo, kethonthen kehü Sunggigü, Npugü rüshvu.

³⁴Abraham le kethon Filistian nyu yhun.