Read Southern Rengma Naga BINZEN 22 Bible Online

BINZEN 22 - Southern Rengma Naga bible

BINZEN 22

¹Tsüsiki Sunggigü le Abraham ketenyen kegwakeshvu shanyüo, A-le, “Abraham tse a-koshü!” Tsontsin Abraham le, “Ale hika hü nle!” tsonshü.

²Sunggigü le a-ka, “Nnyu zenlo.” “Nnyu chegü Isak, nle sosa kehü gütsü zen-o Moriah kazü nyu gunlo. Lo ale kazüthun nme tsin pe nhi shüti, tsü ge a-rope kershvu nme thyü pe a tsülo.”

³Tsüsigü lonyü nshwe ka Abraham le tesen peha lüpe a-gada khvu thyülo, lo Isak lo gonyu mihvu zenlo. Tson njio anyugun le Sunggigü le a-ka zokeshü bin nyu gun titse tsonchü shü.

⁴Jonshen nyü Abraham le ntsenki bin tsügü hyushü.

⁵Tson-o a-le gohvu ka, “Gada zen-o hika sun tselo. N tsenyu gü ayi le gü kershvu thyü shüo rani ryü tile,” tsonshü.

⁶Abraham le rope kershvu thyü nrün tesen gü khipe Isak no penlo, lo a-le jenshe lo mah khilo. Tson-o au le tsonchü gü kejü ka,

⁷Isak le, “A pvü” tseshü, Tsontsin a-le, “Whe anyugü?” Isak le a-ka, “Mah lo tesen le bin nyo ai rope rüshvu nrün tanyü nyu gü le diki ola?”

⁸Abraham le a-jokenio, “Sunggigü le khishü tile.” Tsonshüo au kengüo tsonchü gunla.

⁹Au le ryüo Sunggigü le a-ka zokeshü bin gü tilo ntsin, Abraham le kershvubin nme khwenlo njio tesen gü khipe ndanron lo. Tsüselo a-le a-nyugü phin lo-o pen pe kershvubin tesen so ge shülo.

¹⁰Tson-o dushvu titse a-jenshe gü sütholo.

¹¹Ai tsangge Npugü lokethyü gü le a-ko-o, “Abraham, Abraham!” Tsontsin a-le, “Whe, ale hika hü nle,” tsonshü.

¹²Lo a-le, “Ntsenyu gü ge nbenshü nmvue tha thyü nya,” “N tsoka we ale nle Sunggigü rühvu lo a-jozen hü tse kethyü sha laso, nle nnyuche gü-e pe a-tsü tepen-o khilo la kemvu genyu.”

¹³Abraham le lizin hizin nrishü laryü tanyü tse nme le a-tse pe tehenphun nme ge hüsü pfü kebin hyulo. Tson-o a-le gü tsü khipe a-nyugü sun ka rope kershvu nme thyü shüla.

¹⁴Abraham le bin tsüpe Jehovah-jireh tse kola (a-kon le, “Npugü le khi shühü.”) Lo nthu keti temi le, “Npugü kazüthun ge a-le khishü hünyo tson zohü.”

¹⁵Lo tsangge Npugü lokethyü güle gwenhvu ge gü Abraham ko-o,

¹⁶“Ale a npfü azan sen-o swen-o- Npugü le zobin nyo- ale jochü pe ntsü sati. Nle nnyuche gü pe atsü tepen la kemvu hithyü keshü genyu.

¹⁷Ale n tsipwen no tsangge shenyü nmvue züda seka hachon kechon hontse pe ntsüti tse a johoshü bin le. N tsipwen no anyugun shwikerüchün nyu nye kvuloti.

¹⁸Lo ntsi ge kazü nyu senye aphu no jochü pfü loti, nle a johokeshü zenkelo genyu.”

¹⁹Abraham le rani a-gohvu ki ryüo anyugun kengüo a-le yhun kehü bin, Beersheba ki gunla.

²⁰Tsüsiki Abraham le Milkah le nyu mitetse nnyu pe a-sikezen gü Nahor tsüla sele tse kethyü shalo:

²¹Uz le nyurigü, Buz le a-sikezen gü, Aram a-pvü Kemuel,

²²Chesed, Hazo, Pildash, Jidlaph lo Bethul,

²³Rebeka a-pvü. Milkah le peche mitetse hidan hi nnyu pe Abraham sikezen gü Nahor tsü.

²⁴Nahor thenugi Reumah le Tebah, Gaham, Tahash lo Maakah tse nnyu shü.