Read Southern Rengma Naga BINZEN 23 Bible Online

BINZEN 23 - Southern Rengma Naga bible

BINZEN 23

¹Sarah le chen tsio nkiotsenyü yhunlo.

²A-le Kanan kazü Hebron nyu sila, tson-o Abraham le a-kesi chechü.

³A-nu kesimin le kebin nken-o gü Hitnyu temi dan ka,

⁴“Ale tesin nme thyüo hika hagun dan nyu yhun bin nyo; ano anu pe sun nrün genyu kazü peha pe aka jwe shülo,” tsonshü.

⁵Tsontsin anyugun le a-ka,

⁶“Agun khwenyü shülo, kedagü. Nle agun dan nyu sharhi kedanyu nme; agun sika dan nyu kegwatsin gü ka nnu sun lo. Agun ligü higü sika nme le pe ntsü nyü bin le, nno a-khipe sun lo gwale.”

⁷Tsontsin Abraham le nkhün anyu keluo,

⁸“Hagun le ano anu pe hinyu sun kethyü hagun kenda yatselo Zohar nyugü Efron no

⁹Makpelah tsokü tsüpe aka jwe shülo tse ketso shülo, tsüle a-low tegwen ka bin nyo. Hika hagun mhundyüka, a-no a-min aphu lo-o tsüpe aka jwe shülo, tson-o ano tsüpe ahon meshun bin nme thyülo lo.”

¹⁰Efron ko Hitnyu temi dan zen-o nyida gü chwida kenthon bin ka bin; a-le tsünyu kebin nyu aphu le nyükebin ka Abraham jo kenio,

¹¹“Akhwenyü shülo, kedagü; ale lothyü tsügü apentha lo tsokü tsünyu kebin gü-e pe ntsü tile. Hika atemi dan mhundyü nyu, ale tsü pe ntsü ti, tsügenyu nle nnu sun logwa le.”

¹²Ai Abraham le Hitnyu dan mhundyü nyu nkhün a-kelu shüo,

¹³Efron ka zokeshü temi aphu nyü, “Hagun cheno-e akhwe nyüshü ti mon. Ale low gü apentha heiti. Aka ami khilo lo ale anu pe tsüka sun tile.”

¹⁴Efron le Abraham jo kenio,

¹⁵“Kedagü, kazü tsügü min le shekel tsizi lakhi gwenzin- tsü keche tsüle nnyi jaka nyukon mon? Nnu pe tsünyu sunlo.”

¹⁶Tsontsin Abraham le a-kenda la tson-o Efron le zokeshü hontse temi dan mhundyü ka rakagi shekel tsizi ndo pe a-tsüshü, hakethyü nyu le nda kehü then-o.

¹⁷Tsühontse Makpelah ka Efron kazü Mamre yhüko kechwizin kebin gü tsüle Abraham hon thyülo. Lothyü tsügü, tsokü tsünyu kebin, lo tsünyu senbin kebin aphu tegwen keti tsü le a-hon thyülo.

¹⁸Tsüle Abraham hon laso tse kethyü Hitnyu kenthon bin tsüka kehü nyu aphu shakü lola.

¹⁹Tson-o Abraham le a-nu Sarah pe Kanan nyu kazü nyu tsokü tsügü ka sunla.

²⁰Hitnyu lobu, tsokü le a-nyu kebin gü tsüle meshun bin thyü nrün genyu Abraham hon thyüla.