Read Southern Rengma Naga BINZEN 25 Bible Online

BINZEN 25 - Southern Rengma Naga bible

BINZEN 25

¹Abraham le tenu kecha nme loni, a-zan le Keturah.

²A-le Zimran, Jokshan, Medan, Midia, Ishabak lo Shuah tse nnyu pe Abraham tsü.

³Jokshan le Sheba lo Dedan au pvü, lo Dedan tsipwen le Asshurim, Letushim lo Leummin.

⁴Midia nyenyu jule, Efa, Efer, Hanok, Abida, lo Eldaah. Hidan hi aphu Keturah tsipwen.

⁵Abraham le a-hon aphu khepe Isak tsüla;

⁶ai a-le yhun ketseka, tha khipe a-thenu dan ge nnyu kelo a-nyenyu dan tsü küshü. Tson-o a-nyenyu Hidan no Isak kho ka bin mvuo nipe kazü yhüko kechwi kipon shüla.

⁷Abraham le chen tsio hentsenyü pvün yhun, a-le then sa-o si.

⁹A-nyu Isak lo Ishmael au le Hitnyu temi Zohar nyugü Efron lo Mamre nphozin Makpelah tsokü nyu a-sunla.

¹⁰Abraham le Hitnyu kazü hei kelo günyu tsü; Abraham lo a-nu Sarah au sun.

¹¹Abraham le sikela siki Sunggigü le jochü pe a-nyugü Isak tsü, a-le “Rhünkehü gü le ahyu bin zülvu gü,” khoka yhun hü.

¹²Sarah gogi Ijiptnyu gü Hagar le nnyu pe Abraham ketsü gü Ishmael le,

¹³a-nyu peche hidan le bin, nche peshü thu kethen keshü: Nebaioth, Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish lo Kedemah.

¹⁶Hidan le anyugun tsipwen tseryü kenyhun bon ju, anyugun zan ka anyu rünyi lo a-nyu kebin bin zan thalo.

¹⁷Ishmael le chen tsio shenryüo tsenyü yhunlo-o sila.

¹⁸Ishmael tsipwen le Ijipt nphozin Assiria ki kegun tson nyu Havilah lo Shur au ja kipon yhun. Anyugun le Abraham tsipwen kecha dan zen bin kecha ki yhun hü.

¹⁹Abraham nyugü Isak rüla le hihontse.

²⁰Isak le chen henzi ka (Mesopotamia kazü ki Aramean nyu) Bethuel nyugi, Laban lügi Rebeka lope a-nu thyülo.

²¹Rebeka le a-nyenyu kendi genyu, Isak le a-genyu kehithyü shü. Npugü le a-kehi nyüshüo Rebeka le nyuphu pfülo.

²²A-le mihvu phupfü bin, lo au nnyu lo kemvu ka a-gin nyu au kega sola. Tsügenyu a-le, “Nyuthyüo age hihontse bin yo?” Tseo Npugü ketso titse gü.

²³Npugü le a-ka, “Senye kenyhun le ngin nyu bin nyo; Nle kentsun kethyü temi dan kenyhun nnyu shüti. Lo nme le kecha gü nyeki kvukvu ti; Peshü gü le nchegü lothyüti,” tsonshü.

²⁴A-nyu kezen gwenkho pen lo ntsin a-le peche mihvu nnyulo.

²⁵Nyuri gü le nhon, lo a-gi le thyühü phi hontse, tsügenyu a-zan pe Essau tholo.

²⁶Kenyhun gü le Essau pha tezenryü sen kehü nnyulo, tsügenyu a-zan pe Jakob tholo. Isak le chen hentsero ka au nnyulo.

²⁷Nyuhvu le yhun soryüo, Esau le thyühü kesha nyu nme lo tehen ki kehü le a-kenyü, ai Jakob we matse kanyu bin hü.

²⁸Isak le Esau le tehenthyü ga pfüryüo tyüketegvü kehü genyu Esau so, ai Rebeka le Jakob so.

²⁹Khenyüme Jakob le rhütsi nibin laryü, Esau le thyühü güo ryü. A-le nnyo bin

³⁰tson-o Jakob ka, “Ale pesi laso; tsügenyu nle boni pe nhomai tse kebin tsü peha pe ano tyü lota.” (Tsügenyu a-lope Edom tse kola.)

³¹Tsontsin Jakob le, “Nle nyuri chün pe atsü yatselo ale pe ntsüti.”

³²Esau le, “Keshathyü! Ale sigü zhü laso; ale akenjüle agenyu kegwa nyu thyü lo tila?”

³³Tsontsin Jakob le, “Nle nkenjü tsü pe atsüti tse swela rilo.” Tson-o Esau le a-kenjü tsü pe Jakob tsü titse swela.

³⁴Tson-o Jakob le tensü lo henkeni peha pe a-tsüshü. A-le tyütsü lo njio tinla. Hihontse Esau le nyuri a-kenjü tsü tepen mvula.