Read Southern Rengma Naga BINZEN 26 Bible Online

BINZEN 26 - Southern Rengma Naga bible

BINZEN 26

¹Abraham gwenkho ka chenda siki chenda kecha nme le kazü günyu ryü. Tson-o Isak le Gerar ki Filistian raja gü Abimelek ki gü.

²Lo Npugü le Isak yhühyu thyüo a-ka, “Ijipt ki günya, ale nno dika bin lotse zoshü yo, kazü higü ka binlo.

³Hika yhun binlo, ale nzenhüti lo jochü pe ntsüti. Ale kazü hi aphu pe nle lo n tsipwen tsüti. Ale n pvü Abraham ka zokeshü thyüshü ti.

⁴Ale n tsipwen tsangge shenyü kechon hontse khipe ntsüti, lo ale kazü hi aphu pe a-nyugun tsüti. Lo n tsipwen ge kazünyu senye aphu jochü hyu loti.

⁵Abraham le a jozenlo, lo ajvü lo a johokeshü aphu zenkelo genyu ale jochü pe ntsüti.”

⁶Tsügenyu Isak le Gerar nyu yhun tinla.

⁷Tsünyu kebin temi dan le a-nu ketso keshüka, a-le tsügi le alügi le tsonla. A-le, Rebeka le zegwasa kethyü genyu tsügi le anu le tseshülo tsünyu temi dan le Rebeka lolo nrün genyu adushvu kela nshvula.

⁸Isak le tsünyu binthon kelo siki, Abimelek rajagü le kafüphe ka nrishü laryü Isak le Rebeka zen keso kebin hyulo.

⁹Abimelek le me nipe Isak ko shüo a-ka, “Tsügi le nnu! Nyuthyüo nle a-le alügi letse zola?” tsonshü. Tsontsin a-le, “A-le anu le tse shülo mele adushvu lati ado tse rüchün kela genyu le, tsonshü.”

¹⁰Abimelek le, “Nle agun ge nyuthyüo hihontse shüla?” “Atemi dan nme le nne satse nnu zenzhü lalo, agun kemu tsüle nge ryü nrün hile.”

¹¹Abimelek le a-temi aphu ka: “Ligü higü temi higü nmvue a-nu ge a-zükemvu thyü keshü gü no siti, tsonla.”

¹²Isak le kazü tsünyu ntsishü shü laryü tsüchen tsü jüntsi gvülo, Npugü le jochü pe a-tsü keshü genyu.

¹³A-le nnya kenye gungü nnyasa kethyü nyu nme thyü lola.

¹⁴A-le tanyü, methu, lo gonyu kechon le kebin genyu Filistian nyule a-shwi a-nyugun yhüthyü lola.

¹⁵Tson-o a-pvü Abraham le yhun ketse ka, Abraham gonyu dan le tso keshü zülvu aphu Filistian nyu le nnyo pe lvu küla.

¹⁶Tson-o Abimelek le Isak ka, “Agun kazü ka tin lalo. Nle agun nyeki kvu chwiryü laso.”

¹⁷Tsügenyu Isak le tsünyu tin gü Gerar ketejon ka phika thyülo-o tsünyu bin.

¹⁸A-le Abraham gwenkho ka zülvu tso keshü Abraham kesi siki Filistian nyu le lvu kela zülvu dan tso nilo. Tson-o Isak le ndu ka a-pvü le tho keshü zülvu dan zan tsü ko nilo.

¹⁹Isak gonyu dan le ketejon nyu zülvu nme tso-o zü hyulo.

²⁰Gerar nyu tanyü kekhwenyu le Isak tanyü kekhwenyu zen kega-o “Zü hile agun honle” tson kezo genyu Isak le zülvu tsü zan pe “Kega” (Esek) tse kolo.

²¹Isak gonyu dan le zülvu kecha nme tso nilo tsontsin tsügü ko zo kegala, tsügenyu a-le tsü zan pe “Kenrhi” (Sitnah) tse kola.

²²A-le tsünye ketugü zülvu kecha nme tso nilo. Higü we kenya kethyü ndi, tsügenyu tsü zan pe “Nkenda” (Rehoboth) tse kolo. Tson-o a-le, “Ntsoka we Npugü le nno nkenda thyü kazü günyu yhunlo kegwa khishü laso, lo ngun le hinyu gwakenye lo tiso.”

²³A-le tsü nken-o Beersheba ki güla.

²⁴Tsüje Npugü le ayhühyu thyüshüo a-ka, “Ale n pvü Abraham Sunggigü. Nshvu nya; Ale nzen hü nyo. Ale a gogü Abraham ka zokenjü genyu ale jochü pe ntsü ti lo tsipwen kechon khishüti.”

²⁵Isak le tsüka kershvubin nme khwenlo-o Npugü rüshvu. Tson-o tsünyu a-phika thyü lo, lo a-gonyu dan le zülvu kecha nme tsolo.

²⁶Abimelek le Gerar nyu a-tsontsingü Ahuzzath lo a-rihü dan sokeda gü Phikol tse zen Isak teno titse ryü.

²⁷Isak le, “Hagun le a nrhio ha kazü nyu anila njio nyuthyüo ntsoka ateno ti tse ryü bin nla?”

²⁸Tsontsin anyugun le, “Npugü le nzen kehü agun le sha laso, lo ngun janyu kejozenkelo no bin mvuloshvu tse rüchün bin nle. Agun le

²⁹n nthyü nnyü kemvu hontse nno agun nthyünnyü loha tse njo hoshü nyü bin nle. Agun le nge agun jvü gwao nno kegwa thyü tinla. Npugü le jochü pe ntsü kela sha tsentsü laso.”

³⁰Isak le anygun genyu keho nme ndashü anyugun le tyütsülo.

³¹Lonyü nshwe ka, anyugun le khinyu nyu ka johoshüo swela. Isak le anyugun nishüla, lo anyugun nyun bwen-o tinla.

³²Tsünyü Isak gonyu dan le ryüo, anyugun le zülvu tso kelo rüla pe a-ka zoshü. Anyugun le, “Agun le zü hyulo la sele,” tsonshü.

³³A-le zülvu tsü zan pe “Keswe” (Shebah) tholo. Tsü hontse Beersheba nyida gü tsü zan le chwiryü.

³⁴Esau le a-keyhun chenhenzi ka Hitnyu lünyu Beeri nyugi Judith lo Elon nyugi Basemath tse mihvu lolo.

³⁵Isak lope Rebeka au le, tsühvu genyu nyunkenjün thyü sala.