Read Southern Rengma Naga BINZEN 27 Bible Online

BINZEN 27 - Southern Rengma Naga bible

BINZEN 27

¹Ntsoka we Isak le thenla, lo a-yhütyü zünla. Tsügenyu a-le a-nyu peshü gü Esau koshüo a-ka, “Anyugü!” tsonshü laryü a-le “Whe” tse khinshü.

²Isak le, “Ale then laso lo akesi jon shamvu.

³Tsügenyu n levü lo a-tsi khilo njio tsügü tehen thyü nme gapfü ryüo a tsülo.

⁴Tson-o ale akenyü kehü thyükeyhün tsü ni senryü atsü lo. Ale tsü tyülo-o, sila kemvu ka a jochü kenkhin gü pe ntsü tile,” tsonshü.

⁵Isak le Esau nthon kebin Rebeka le nyülo la. Tson-o Esau le thyühü gükela ka,

⁶A-le Jakob ka, “N pvü le Esau ka,

⁷‘Agenyu thyü nme ga pfüryü nishülo. Ale tsü tyülo njio, ale sikemvu ka Npugü mhundyü nyu jochü pe ntsüti tsonzo kebin ale nyülo laso.’

⁸Tsügenyu, anyu, ajozen-o ale nno thyülo tse keshü gü thyü shü lo.

⁹Ntsoka tenyü dannyu gü tenyü nyu a-phu kegwa kenyhun sen ryülo, tson-o ale n pvü le a-kenyüsa kehü a-genyu ketyüketsü nda shü tile.

¹⁰Nno sen gü a-tsü shüo no tyülo njio a-le sikela mhundyü jochü pe ntsü nrün genyu.”

¹¹Ai Jakob le a-jvü ka, “Esau le temi a-hü tsü mebu kethyü nme ai awe agi le shwü tse gwenzin le.

¹²A pvü le akesü shwio ale a-sa kebin shalo la ti ado; tsonya tselo ale jochü mvu le shochün senryü a npfü age shülo loshvu le.”

¹³Tsontsin a-jvüle, “Shochün pe nketsü lihi-e no age ryü la, anyu; ale nka kezo hontse gü tenyü nyuhvu senryülo.”

¹⁴Tson-o a-le gü tsü senryü a-jvü tsüshü, lo a-jvü le a-pvü le a-kenyü kehü ketyü ketsü bonnilo.

¹⁵Tson-o a-le Esau phinya kegwatsin a-le pe kanyu bin kenjü khipe Jakob nbenshü.

¹⁶A-le tenyü hvu gi khipe a-buthun lo a-gunda a-hü kendi bin ka jeshü.

¹⁷A-le ketyüketsü keyhün gü pe a-le ro kelo tensü sin-o khi pe a-nyugü Jakob ben ka shüshü.

¹⁸Tson-o Jakob le gü a-pvü ka, “A pvü!” tse koshü. Laryü a-le, “Whe.” “Nle anyu digü la?”

¹⁹Tsontsin Jakob le, “Ale nnyuri gü Esau le; nle aka zokeshü hontse ale thyüshü laso. Ncheno-e soryü dun-o, ale ngenyu sen ryü kebin tyütsü lo njio, jochü pe atsü shülo.”

²⁰Isak le, “Nle dihontse tsü hyu whü lola ola, anyu?” Jakob le, “Npugü n Sunggigü le a keche shüo hyulo le.”

²¹Isak le Jakob ka, “Akho nniryülo ale nkese shwi tile.” “Nle Esau ketsin le?”

²²Jakob le a-pvü kho nni gü, A-pvü le a-kese shüo, “Nkhwe le Jakob khwen hontse ai nbu kese kethyüle Esau bu laso.”

²³A-le Jakob letse shalo mvula, a-bu le Esau bu hontse a-hü le bin kela genyu. A-le a-jochü pe tsügü jü,

²⁴ai ketso nio, “Nle Esau ketsin le?” Tsontsin a-le, “Ele” tsonla.

²⁵Isak le “Thyü peha senryü atsü shülo. Ale tsü tyülo rio a jochü khipe ntsü tile.” Tson-o jakob le tsü senryü a-tsüshü lo a-le Vainsha zu ko senryü a-la shü.

²⁶Tsüselo a-pvü le a-ka, “Akho nniryü a nbo shülo, anyu.”

²⁷A-le a-pvü nboshü titse ryü laryü, Isak le a-phi rünyü shüo jochü pe a-tsüshü. A-le, “nyugü rünkegwa le tehen nyu Npugü le jochü pe a-ketsü hontse le.

²⁸Sunggigü no tsangge khezü pe ntsü lo n kazüthyü nbweshü nda! A-no shye lo Vainsha zu kesü kela khipe ntsü nda!

²⁹Senye dan no ngo thyü lo temi kechon no nkhün nkelu nda. Nno nkami aphu so kedathyü, lo njvü tsipwen dan no nkhün nkelu nda. Shochün pe nketsü nyu no shochün pfü, lo jochü pe nketsü nyu no jochü pfülo nda.”

³⁰Isak le jochü pe Jakob tsü shüo a-le tin la nyemhun, atsagü Esau le thyühü güo ryü.

³¹A-ko ketyüketsü keyhün bonni lo-o khisen a-pvü ki ryü. Tson-o a-le, “A pvü ncheno-e soryü dun-o ale thyüni senryü kebin tyülo-o njochü pe atsü shülo.”

³²“Nle següla?” Isak le tsonketso shü. Tsontsin a-le, “Nnyuri gü Esau le.”

³³Tsüselo, Isak le a-ke nsü ndün-o, “Tsonlo, thyü gape ni senryü a-ketsü gü tsüle segü ola? Nle keryü mhundyü ale tyülo laso. Tson-o jochü pe a-tsü laso, tsüle kethonthen a-honso.”

³⁴“A pvü n jochü pe ako atsüta!” tsonso.

³⁵Isak le, “Nsikezen gü le ryü asa lo laso. A-le njochü sen tin laso.”

³⁶Esau le, “Nthu hile a-le asalo kela gwen hvu ge güso. A-zan le Jakob thato. A-le ale nyuri gü kethyü akenjü ko khilo la, lo ntsoka ko a-le ajochü sen tin laso. A genyu jochü nme-e ndila se ole?”

³⁷Isak le, “Ale a-khipe nsa npu thyü laso, lo a-shvunye aphu pe a-go thyüshü laso. Ale Shye lo vainsha zu pe a-tsü laso. Ntsoka we ale ngenyu thame thyü keloi ndila so, anyu!”

³⁸Esau le a-pvü ka, hi tengeo, “Njochü nme nti ole, a pvü? Ako jochü pe atsü ta, a pvü!” Tson-o a-le chü sola.

³⁹Tsontsin Isak le a-ka, “Ngenyu tsangge khezü ndi laso, Ngenyu kazü kebwe ndi laso.

⁴⁰Nle njenthon sen yhun loti, Ai nsikezen gü go thyüti. Tson-e nle a-ntsun keso ka Nle a-le nkhinsen kebin nyu chwi loti.”

⁴¹Esau le a-pvü le jochü gü pe Jakob tsü kela genyu Jakob shwirüchünla. Tson-o a-le, “A pvü kesi chechü nrün khonni bin laso, tson lalo ale Jakob dushvu lati tson rüchün bin.”

⁴²Ai Rebeka le Esau le rhikebin shalo ntsin Jakob ko shüo a-ka, “Nyulo, ntsagü Esau le nhyu lolo ndushvu kela nda bin laso.

⁴³Tsügenyu anyu nle ntsoka ajozen-o, Haran ki atsügü Laban khoki whütse gun lalo.

⁴⁴Tson-o ntsagü le a-nyunkenta ponlo kemvu ka a-zen bin gwa tin lalo,

⁴⁵lo a-le nle a-ge thyükeshü tsü nmhinla. Tson yatselo ale temi peha nishüo no ryü nzen nilo la tile. Ano nyuthyüo khenyü me jon anyu peche mihvu nkela bin mon?”

⁴⁶Rebeka le Isak ka, “Esau le tesin lü kelo a-nu hvu genyu adyüzinri laso. Keshanyu laka Jakob ko Hitnyu lünyu hi nme lo ya tse kethyü we, ale sikela we gwaso,” tsonshü.