Read Southern Rengma Naga BINZEN 28 Bible Online

BINZEN 28 - Southern Rengma Naga bible

BINZEN 28

¹Isak le Jakob ko shüo jochü pe tsüo a-ka, “Kanan nyu lü lonya nye.

²Ai Mesopotamia ki nbon Bethuel ka nyu gun gü, n min Laban nyugi nme lolo.

³Kekvutsin Sunggigü no jochü pe nsunkethyü ge shü lo nnyenyu kechon khishü nda, tson-o nno senye kechon pvü thyülo tile!

⁴Tson-o a-no Abraham jochü gü pe n-e lo n tsipwen tsülo. Lo nle a-nyu yhun kebin Sunggigü le khipe Abraham ketsü kazü gü hi nno gwenlo!”

⁵Tson-o Isak le Jakob nipe Mesopotamia ki Aramean nyu Bethuel nyugü Jakob lo pe Esau au jvü Rebeka tsügü Laban ki shüla.

⁶Isak le jochü pe Jakob tsüshüo a-no Mesopotamia ki tenu nme lolo tse nishü kela Esau le shalo. A-le Isak le jochü pe Jakob ketsü ka no Kanan nyu tenunyu lonyalo tsezo keshü ko shalo.

⁷Jakob le a-pvü a-jvü hvu jozen-o Mesopotamia ki gü kela rüla shalo.

⁸Tson-o Esau le a-pvü Isak le Kanan nyu tenunyu le a-kenda kemvu shalo.

⁹Tsügenyu a-le Abraham nyugü Ishmael ki gü a-nyugi Mehalath lolo, tsügi le Nebaioth lügi.

¹⁰Jakob le Beersheba nken-o Haran ki gun zhü.

¹¹Yhüko keche ki a-le bin kenshün nme nyu ryüo tsüka nsenlo. A-le tso nme pe a-pekhün thyüo jübin.

¹²A-minki lobin nme le kazü nyu rhun-o kügü tsang ti, lo tsanggelonyu jule kükejü lo tsenryü kejü hyu.

¹³Lo Npugü le a-khoka so-o, “Ale Npugü, Abraham lo Isak Sunggigü le,” tsonzoshü. “Nle a-sozhü kebin kazü higü pe nle lo n tsipwen tsüti.

¹⁴N tsipwen no kazü nyu nnyokenphü hontse swülo bu keho thyüti. A-nyugun le anyugun kazü nmhun sen-o lizin hizin aphu güti, lo n ge lo n tsipwen ge ale jochü pe kazü senye aphu tsüti.

¹⁵Rüchünhülo, Nle lika hika güe ale nzen hüti, lo n ntsen hüti, lo ale nzen niryü kazü higü nyu shüti. Ale nka zokeshü dan aphu thyüla kemvuthen ale nkhela loha.”

¹⁶Jakob le chonsoryüo, “Npugü le hika hünyo! Ale shamvu bin laryü, A-le bin hika kebin hile!”

¹⁷A-le nshvula-o, “Hile bin kenrin kethyü nme le! Hile Sunggigü ka gi so; hile tsangge chwida gü giso.”

¹⁸Jakob le lonyü nshwe soryüo, a-le a-pekhün kethyü tsogü tsü rüchün hü nrün genyu khipe senshü. Tson-o Oliv terzü jape tsüge shüo thyü kenshün pe Sunggigü tsü.

¹⁹A-le bin tsügü pe Bethel tse kolo. (Nduka we rünyi tsüle Luz tsehü.)

²⁰Tson-o Jakob le Npugü ka keswe nme thyüo: “Nle a kenjwen hinyu azenhü lo a ntsen-o achvü lo a keben kenya khishü hüo,

²¹ano gwa bin-o a pvü ka ki nigun ryü kelo we, Nno a Sunggigü thyüti.

²²Rüchün hü nrün genyu ale pe sen keshü tso higü bin hipe nkershvubin thyüti, lo ale nle khipe a ketsü lihi-e jüntseryü jüme pe ntsüti.”