Read Southern Rengma Naga BINZEN 29 Bible Online

BINZEN 29 - Southern Rengma Naga bible

BINZEN 29

¹Jakob le njwen sentse npho zin keyhun ju kazü ki gun.

²Tson-o lonyu zülvu nme ka ryü laryü tanyü danshen le tsüka kehü hyulo. Tanyü dan le zulvu hika zü tsühü, lo tso keda nme pe zülvu gü mün senkhin njü.

³Tanyü dan aphu gunryü kequen lolo, tanyü kekhwen jule tsogü keto la-o no zü tsülo, njio tso gü keto pe a-bin ka khin nila hü.

⁴Jakob le tanyü kekhwe juka, “Apfünyu ju, hagun le dikipon nyula?” tson ketsoshü. Anyugun le a-ka, “Haran nyule.”

⁵A-le, “Hagun le Nahor nyugü Laban shale mvula?” Anyugun le, “Ele, agun le sha bin nle.”

⁶“A-le gwabin le mvula.” Tsontsin anyugun le, “A-le gwabin nle.” “Hire, a-nyugi Rachel le a-tanyü zenryü jü nle.”

⁷Jakob le, “Nhenyu thyü binzun, tanyü dan hü kequen lo kela gwenkho mvuzun le, nyuthyüo züpe lashüo zen nigü no a-chvü lotyü mvu ola?”

⁸A-nyugun le, “Agun le tsonlo kemvui, tanyü dan aphu hika ryülo, lo tso gü keto la; tsonkelo siki agun le züpe tanyü dan no tsüti.”

⁹Jakob le anyugun zen kenthon kebin ka Rachel le tanyü dan zen ryü.

¹⁰Jakob le Rachel le a-min Laban tanyü zenkeryü hyu shü ntsin, zülvu ka gü tso gü keto la-o tanyü dan no zü tsülo.

¹¹Tson-o a-le Rachel nboshü njio a-sherhün-o chü sola.

¹²A-le tsügi ka, “Ale n pvü nyu kaminyu, Rebeka nyugü le,” tson zoshü. Tsügi le tin gü a-pvü ka zoshü;

¹³lo Laban le a-tsugü Jakob rüla nyülo ntsin tin gü teno-o a-thünpenlo njio a-nboshüo zen a-ka ki ryü. Tson-o Jakob le dihontse layo aphu pe Laban ka zo keshü ka,

¹⁴Laban le, “Ele, nle athyü azi ketsin le.” Jakob le shyeme tsü ka bin.

¹⁵Laban le Jakob ka, “Nle atsu anyu le tseo kenrun nyu alothyü bin keloi mvu. Nchün dikho lonyü bin nla?”

¹⁶Laban nyu le tenunyu mihvu le bin; peshü gü zan le Leah lo nchegü zan le Rachel

¹⁷Leah yhütyü keko le a-kezü, ai rachel le a-rhenrhü gwa lo zegwasa.

¹⁸Jakob le Rachel zenkeso hü, tsügenyu a-le, “Nle ano Rachel loti yatselo, ale chen tsenyü nlothyü ti.”

¹⁹Laban le, “Ale a-pe kechanyu ketsü gümvu nketsü gü le gwa kvu; a-zen bin lo.”

²⁰Jakob le Rachel lo nrün genyu chen tsenyü thathyü, ai a-le tsügü so kethyü genyu a-mhundyü ka jon keshanyu hontse.

²¹Tson-o Jakob le Laban ka, “A-gwenkho pen laso; ano nnyugi lolo gwenlo.”

²²Tsügenyu Laban le tsünyu kebin temi ko kü shüo senhü keho nme thyüshü.

²³Ai tsüje a-le Rachel mvule Leah zen gü Jakob tsüshüo Jakob le tsügi zenzhü.

²⁴(Laban le a-go lünyu Zilpah pe a-nyugi Leah no a-gogi thyü lotse tsüshü.)

²⁵Tsangben lo ntsin tsüle Leah tse kethyü hyulo. Tson-o a-le gü Laban ka, “Nle nyuthyüo age hihontse shüla? Ale Rachel lo titse nlo thyü ryü. Nyugenyu nle asala ola?”

²⁶Laban le, “Nchegi pe peshügi mhundyü kalvu kethyü tsüle hiki agun jvü kemvu le.

²⁷Sunkethyü hapta güno penla rilo, lo nle chen tsenyü alothyü alothyü tiyatselo ale Rachel ko pe ntsü tile.”

²⁸Jakob le a-kendala, tson-o sunkethyü jvü dan kethyü hapta gü le gü kela siki, Laban le a-nyugi Rachel khipe a-nu thyü shü.

²⁹(Laban le a-gogi Bilhah nipe a-nyugi Rachel go thyü shü.) thyüshü.

³⁰Jakob le Rachel ko zenzhü, lo a-le Leah nyeki Rachel sokvu. Tson-o a-le chen tsenyü Laban lothyüni.

³¹Npugü le Jakob le Leah so sarimvu kela hyushüo a-no nyuzen lo, ai Rachel we a-nyenyu ndi hü.

³²Leah le nyuphupfü lo-o peche nme nnyulo; Lo a-le, “Npugü le a kenjün kethyü hyu lao ntsoka we a nyepfü le aso tiso”; tson-o a-nyu zan pe Reuben tholo.

³³A-le nyuphupfü nilo njio peche kecha nme nnyu nishü, tson-o “Ngugü le mele asokemvu shakela genyu peche higü pe atsü nishü laso”; a-le tsügü zan pe Simon tholo.

³⁴A-le nyuphupfü nilo-o peche kecha nme nnyulo. Njio, “Ntsoka we, ale peche mishen nnyu pe a nyepvü tsükela genyu a-le a nsükvu tiso”; tson-o a-zan pe Levi tholo.

³⁵A-le nyuphupfü nilo-o peche kecha nme nnyu nishü, A-le, “Ntsoka we ale Npugü shweti”; tson-o a-zan pe Judah tholo. Tsüsiki a-le nyuzen mvula.