Read Southern Rengma Naga BINZEN 3 Bible Online

BINZEN 3 - Southern Rengma Naga bible

BINZEN 3

¹Tsükatsü Npugü Sunggigü le thyü keshü nyukhu dan nyu peri gü le kelikelu tsin thyü, A-le tenugi ka, “Sunggigü le hai no chwinyu senbin lihi sha-e tyünya lotse zoshü ole?”

²Tsontsin tenu gi le peri gü ka, “Ai le chwi günyu terasha lihi-e tyü logwa,

³chwi lvuka kebin senbin gü ge kemvu we. Sunggigü le ayi no tsü gü sha tyü nmvue kesünya lotse zoshü le; ayi le sila lo keshvu genyu.”

⁴Peri gü le, “Tsüle ketsin mvu; hai le sila kemvui, tson shü.

⁵Sunggigü le, hai le tsü tyü lolo, Sunggigü hontseo nyule gwa lo nyu le gwamvu yo shalo la nrün shakebin genyu tson zokeshü le,” tsonshü.

⁶Tsüselo tenugi le, senbin tsügü shwipe zegwasa, a-sha le dihontse tyügwa yo, lo thasha chwiryü lo dihontse ndun thyü tiyo tse rüchün la. Tsügenyu a-le peha ryütyülo la. Lo a-le peha pe a-nyepfü tsüo a-ko tyü lola.

⁷Au le tsü tyülo ntsin thashakekha lo-o au kenben kehü shalo: tson-o au le kheronyü rikeshü pe au npfü au sunlo.

⁸Tsünyü ngwen ki Npugü Sunggigü le chwigü nyu tsonchü kehü khwe nyülo njio au le senbin dan nyu a-kebu bin.

⁹Ai Npugü Sunggigü le temi gü ko-o, “Nle diki hü nla?” tson.

¹⁰Tsontsin a-le, “Ale chwigü nyu nkhwenyülo; lo ale akenben kehü genyu nshvuo nkebu tin lale.”

¹¹Tsüka Sunggigü le, “Segü le nle nkenben letse nka zoshü la?” “Nle ale nno tyünya lotse keshü terasha gü tyü la ole?”

¹²Tsontsin temi güle, “Nle no azen hü lotse khipe atsü keshü tenu gile senbin gü rasha pe atsü shüo ale tyüla le,” tsonshü.

¹³Npugü Sunggigü le tenu gi ka, “Nle nyuthyüo hihontse thyü la ola?” Tsontsin a-le, “Peri gü le a sa shüo ano tyülo la sele,” tsonshü.

¹⁴Tson-o Npugü Sunggigü le peri gü ka zoshü; “Nle tha higü thyü kela genyu, senru lo tehenthyü aphu nyeki n swetsü laso; Ntsoka gerho nno nginda pe nyon ti, lo nkeyhun then n nyon kenphü pe nchvü thyü ti.

¹⁵Ale tenu gi hai jaka keshwinyü kemvu khishü ti, a-tsipwen lo n tsipwen no a-zintse keshwinyü mvu hüti. A-le npe kedüren ti lo nno a-pha ndu ti.”

¹⁶Lo a-le tenu gika, “Ale nle nyuphu kepfü ka nkenjün kethyü thyü nchon shüti; lo nno kenjün thyüo nyu n nyuti, Hihontse bin-e nno n nyepfü nnyü ti, lo a-no nso gonti.”

¹⁷Lo a-le temi güka, “Nle nnu khwenyüo ale nno tyünya lo tse keshü terasha gü tyü kela genyu, ngenyu kazü gü swetsü laso. Nno nyhun then nhokelio thathyüo nchvü hyu tyüti.

¹⁸Tsüno tsehü- nyhen nyhun shüti, lo nno lonyu hense-kenjvü tyüti.

¹⁹N nyon pe nthyü keshü genyu, nle n nyon ngwa nila kemvuthen, nno nhokeli lo tseyhün-o nchvühyu tyüti. N nyon pe nthyüshü, lo nle n nyon thyü ni lati.”

²⁰Adam le anu zan pe Eve thola, a-le temi aphu jvü gi genyu.

²¹Lo Npugü Sunggigü le Adam lo a-nu au genyu thyügi pe phi thyü lo-o a-le pe au nben shü.

²²Tsüselo Npugü Sunggigü le, “Temi le ngun nme hontse nyu le gwa lo nyule gwamvu yo sha laso. A-no kerhüntsü bin ge terasha gü tyü lo-o kethonthen yhun tinla loshvu.”

²³Tsügenyu Npugü Sunggigü le a-no pe a-rhenkeshü nnyon gü thathyü tyü hülo tseo Eden chwigü nyu a-nishwi la.

²⁴A-le temi gü hüshwi la; tson-o Eden chwi nphozin Cherubim, lo jenthon lizin hizin kerü güla kehü mai hontse nme pe shüla. Hile temi ligü higü no kerhüntsü bin kho nni ryü mvu nrün genyu.