Read Southern Rengma Naga BINZEN 30 Bible Online

BINZEN 30 - Southern Rengma Naga bible

BINZEN 30

¹Ai Rachel we nyu nme-e nnyu pe Jakob tsümvu, tsügenyu a-le a-tsagi shwi a-yhüthyüo Jakob ka, “Nyu khipe atsülo, kemvu we ale si lati.”

²Jakob le Rachel ge a-nyuntao, “Ale Sunggigü sun thyü logwa ole? Nno nyuzenlo kemvu tsüle A-le le.”

³Tsontsin Rachel le, “Agogi Bilhah le hika hü nle; a-no nyu nme nnyu pe atsü nrün genyu a-zenzhülo. Tsühontseo ale mejvünyu nme thyü logwa.”

⁴Tson-o a-le Bilhah pe a-nyepvü tsüo no zenzhü.

⁵Bilhah le nyuphupfü lo-o peche nme nnyu pe Jakob tsüshü.

⁶Rachel le, “Sunggigü le a njün shü laso. A-le a kehi nyüshüo peche nme pe atsüshü laso”; tson-o a-zan pe Dan tholo.

⁷Bilhah le nyuphupfü nilo-o peche kenyhun gü nnyu pe Jakob tsüshü.

⁸Rachel le, “Ale atsagi ayi kenren tsensa tse kenren-o ale kvulo laso”; tson-o a-zan pe Naftali tholo.

⁹Leah le a-le nyuzenmvu kela shalo njio a-gogi Zilpah pe Jakob no a-nu thyü.

¹⁰Tson-o Zilpah le peche nme nnyu pe Jakob tsü.

¹¹Leah le, “Ale ahengwa bin nle”; tson-o a-zan pe Gad tholo.

¹²Zilpah le peche kecha nme nnyu nipe Jakob tsüshü,

¹³Leah le “Ale ditsükhi asherhün la! Tenunyu ju le sherhünle tse ako tiso”; tson-o a-zan pe Asher tholo.

¹⁴Thoshe logvü gwenkho ka Reuben le loki tsü laryü nye (mandrakes) hyulo-o sen gunryü a-jvü Leah tsüshü. Rachel le Leah ka, nnyu gü nyetsü peha pe atsüta, tsonshü.

¹⁵Leah le, “Nle anyepvü khilo kela nti mvule anyugü nyeko khilo la tiya bin ole?” Rachel le, “Nle nnyugü nye pe atsü yatselo, ntsoje Jakob hai zhü logwa.”

¹⁶Jakob le loki tsüo khejegwen ryü laryü, Leah le a-teno-o a-ka, “Nle ntsoje azenzhü mvuloshvu, ale anyugü nye khipe nmin thyü laso.” Tson-o a-le tsüje tsügi zenzhü.

¹⁷Sunggigü le Leah kehinyü shüo a-le nyuphu pfülo njio peche pvün gü nnyu pe Jakob tsüshü.

¹⁸Leah le, “Sunggigü le achün pe atsü laso, ale agogi pe anyepvü ketsü genyu”; tson-o a-zan pe Issachar tholo.

¹⁹Leah le nyuphupfü nilo njio peche tsero gü nnyu pe Jakob tsü.

²⁰A-le, “Sunggigü le kenrun nyu thakegwa nme pe atsü laso. Ntsoka we anyepvü le azen bin tiso, ale peche mitsero nnyu pe a-tsü laso”; tson-o a-zan pe Zebulun tholo.

²¹Kenkhin ki a-le tenunyu nme nnyu lo-o a-zan pe Dinah tholo.

²²Sunggigü le Rachel rüchünshü, a-le tsügi kehinyü shüo a-no a-nyenyu hyulo.

²³Tsügi le nyuphufülo-o peche nme nnyu shü. A-le, “Sunggigü le peche nme pe atsüo atetsin sen tin laso.

²⁴Npugü no peche kecha nme pe atsü nda”; tson-o a-zan pe Josef tholo.

²⁵Josef nnyu kelo siki, Jakob le Laban ka, “Ano a kaki rani gunla nrün genyu a hoshülo.

²⁶Ale nlothyüo chün kelo anu lo anyudan khishüo ano tinla gwenlo. Ale dihontse nlothyü kegwa thyü shüyo nle sha bin nyo.”

²⁷Laban le a-ka, “Ano johi zoshülo: Ale shakelo le Npugü le ngenyu jochü pe atsü.

²⁸Nchün dan swü shülo, lo ale khipe ntsü ti.”

²⁹Jakob le, “Ale dihontse ntho thyüyo, lo n senru dan dihontse a ben nyu chvükenye loyo nle sha bin nyo.

³⁰Ale keryü mhundyü kerhokhi kebin tsüle, chonkenye pe danda thyülo laso, lo ale lika hika güe Npugü le jochü pe ntsüshü. Ntsoka we ale a npfü a kakhün genyu ketsenlo mvulo shvuso.”

³¹Tsontsin Laban le, “Ale nyu pe ntsü tila?” Jakob le, “Ale achün thame lo kemvui. Nle tha higü hi nkendo yatselo, ale n senru dan ntsenni binti.

³²Ano nthu ntanyü dan nyu gü lihi-e kemetsen dan, lo tenyü lihi-e meren nmvue rhithü rhirü kethyü dan khi lota. Ale lonyü kebin achün le tsü nti le.

³³Ale joketsin zole mvuyo siki shawhü lo nrün genyu. Nle achün shwiryüo, keshanyu laka ale tenyü meren nmvue kenphenkenrün kemvu, nmvue tanyü lihi-e metse kemvu le bin yatselo tsüle rühu kelo tse nle shalo gwale.”

³⁴Tsontsin Laban le, “Akenda le. Nnyi nle kezo hontse ti.”

³⁵Tson-o tsünyü Laban le tenyü tse rhithürhirü nmvue kemeren le kebin lo a-lü rhithürhirü nmvue kechon le a-ge kebin kemeren dan; lo tanyü kemetsen dan aphu hüzen tinla. A-le tsüpe anyu dan tenyen shüo,

³⁶no zen Jakob anyu janyu jonshen tsonkechü bin ki güla. Lo Jakob le Laban senru a-sen dan nucha bin.

³⁷Jakob le Poplar, almond lo plane sen kerhün ro nti lo-o a-yhü peha tsola njio kechon no rhithürhirü lo.

³⁸Tson-o pe senru dan le zütsü kehü kun mhundyü ka shü, senru dan no zütsü ryülo tsü nrio cholo nrün genyu.

³⁹Tenyü dan le senro dan mhundyü ka a-nyupfü lo-o chonro, rhithürhirü lo meren kethyü ncheshü.

⁴⁰Jakob le tanyü lo tenyü dan hü kholo njio no kerügü Laban hon rhithürhirü lo metse kethyü dan ntsunlo. Hihontseo a-le a-hon dan no Laban kerhün mvuo ntsenlo.

⁴¹Senru aphukegwa dan le cho solo Jakob le senro dan khi sengü zü ketsü kun ka shü, tson-o no senro dan nyu a-nyupfülo nrün genyu.

⁴²Ai a-le senro tsü khipe senru kenthü dan mhundyü ka we shü hümvu. Tsügenyu thonmvu tse senru kenthü dan aphu Laban hon, lo aphukegwa aphu Jakob honthyü lola.

⁴³Hihontse Jakob le nnya sa chwiryüla. A-le senru, gonyu, ut lo gada-e kechon le bin la.