Read Southern Rengma Naga BINZEN 31 Bible Online

BINZEN 31 - Southern Rengma Naga bible

BINZEN 31

¹Jakob le, Laban nyu dan le, “Jakob le ngun pvü hon aphu khilo laso. A-kenya tsü aphu ngun pvü hon le.”

²Lo a-le, Laban ko himhundyü ki hontse a-zen kenme thyümvu kela hyulo.

³Tsontsin Npugü le a-ka, “Nle ranio npvü lo nshvunye ki gun lo. Ale nzen hüti.”

⁴Tson-o Jakob le Rachel lope Leah au no a-senru le kehü bin ki ryü lotse josin shü.

⁵A-le au ka, “Hai pvü le age himhundyü hontse mvukela ale sha laso; ai apvü Sunggigü le azen hü nyo.

⁶Hai mihvu nren ale akekvu aphu pe hai pvü lothyü keryü shabin nyo.

⁷Tson-e a-le asala lo gwentseryü ge achün kelula. Ai Sunggigü le a-no a nthyü nnyü lamvu.

⁸Laban le, ‘Tenyü kemeren dan pe nchün thyüti,’ tseshülo tenyü kemeren nti nchela. Lo a-le, ‘Rhithürhirü kethyü pe nchün thyüti tse shülo,’ aphu rhithüthü kethyü nche küla.

⁹Hihontseo Sunggigü le npvü senru dan khipe atsüla.

¹⁰“Senru dan le cho kebin ka aminki tenyü tse chokebin dan tsü le rhithüthü, meren lo kenphenkenrün tse kethyü nmin.

¹¹Lo aminki Sunggigü jolo güle, ‘Jakob!’ tse ako shü. Laryü ale, ‘khinshü.’

¹²Tsontsin a-le, ‘Nrishü,’ ‘tenyütse chokebin dan aphu rhithüthü, meren lo kenphenkenrün. Laban le n ge thyükebin aphu ale hyu kela genyu ale hihontse thyü shü bin nle.

¹³Ale Bethel nyu nyhühyu thyü keshü ka nle rüchün hü nrün genyu oliv-terzü pe tso nme yünlo, swen-o thyükenshün pe Sunggigü tsüle. Ranio n nnyu kelo kazü günyu gunla nrün genyu ngwen ndolo.’ ”

¹⁴Rachel lope Leah au le Jakob ka, “Ahi pvü kanyu thame ahi jün le ndiso.

¹⁵A-le ahi lope tesin hontse gwenzin. A-le ahi jwen la-o ahi min aphu senkü laso.

¹⁶Sunggigü le ahi pvü hon khikelo hi aphu ahi lo ahi nyenyu ju honle. Sunggigü le nka lihi zoshüe tsü thyü lolo.”

¹⁷Tson-o Jakob le ranio Kanan kazü nyu a-pvü ki gun titse gwen ndalo. A-le a-nyenyu lo a-nunyu dan pe ut ge shülo, lo a-le Mesopotamia nyu hyukelo a senru dan aphu hüzen-o a-mhundyü rilo.

¹⁸

¹⁹Laban le a-tanyü hütse titse güla lo a-kendi ka Rachel le a-pvü hon anyugun kaminyu teromen kezü rühu lola.

²⁰Jakob le a-le tin kejü zomvuo Laban sala.

²¹A-le a-hon aphu khilo njüo kechokelo thyü tinla. A-le Eufrates züri pfüthüo Gilead kazü rincho ki gunzhü.

²²Jakob le tinla jonshen siki Laban ka zoshü.

²³A-le a-temi dan zenlo njüo Jakob hülo kemvuthen then gun gü jontsenyü ki Gilead rincho ki hülo.

²⁴Tsüje Laban minki Sunggigü le ryüo a-ka, “Nle tha lihi-e pe Jakob kedün mvuti tse petsülo nye.”

²⁵Jakob le kazüthun nme ge kensenbin thyü bin, lo Laban le a-tsagü-sikezen nyu dan zen-o Gilead rincho ge anyugun kensenbin thyülo.

²⁶Laban le Jakob ka, “Nle nyuthyüo teri ka tenunyu tenzen kehü hontse, anyugi dan zentin zhü nla?

²⁷Nle nyuthyüo aka zomvu le asao kebu tin zhü nla? Nle akazo yatselo, nno shekerhün thyü lüthyü-o tamborin lo harp sen nnishü nrün.

²⁸Nle ano a tsunyu dan lo anyugi dan-e nboshüo anyugun zenkekha mvu. Tsüle kemonkenu thoso!

²⁹Ale nnthyünnyü lalo kegwa kekvu le bin nyo, ai nje npvü Sunggigü le ano nkedün nyalo tse kela genyu le.

³⁰Nle nkaki rani gunla nyüri kela genyu tin laso tse ale shabin nyo, ai nyuthyüo a kaminyu teromen kezü rühu lola hü nla?”

³¹Tsontsin Jakob le, “Nle nnyugi hvu zenlo lati adotse ale rüchün-o nshvu kela genyu le.

³²Ai hika kebin ligü higü ge-e nhon teromen kezü dan tsü hyukelo gü we dushvu lati. Ngun shvunye hidan mhundyü nyu nhon nyule hika bin yo shwio khilola.” Rachel le Laban hon teromenkezü dan khilo kela Jakob le shamvu.

³³Laban le Jakob phikanyu, tsüsika Leah, lo gogihvu phikanyu tse yügü fü ai a-teromenkezü dan tsü fü kendila. Tsüsiki a-le Rachel phika nyu yü.

³⁴Rachel le anyu kaminyu teromenkezü dan tsüpe ut senkela bin nyu shüo a-soge dunbin. Laban le phikanyu tha aphukese ai hyulomvula.

³⁵Rachel le a-pvü ka, “Ale tenu nyu jvü thyü kebin genyu, nmhundyü ka soshü loshvu bin nlaryü, kedagü, age nnyunta nyalo,” tsonla. Laban le a-kaminyu teromen dan tsü füe fü kendila.

³⁶Tsüselo Jakob le a-nyunta-o Laban ka, “Ale nyu kemu thyüo la? tson-o a-kesü. Ale nyu thyüzü shü letseo nle nnyunthün-o ahü tsüryüla?

³⁷Nno a kanyü aphu kese kegun nhon nyu hyulo la? Tsü khishwi pe hika shü ntemi lo atemi dan no nrishüo nhi digü le njüyo anyugun no zoshülo.

³⁸Ale chenki nzen gunryü; ntanyü lo ntenyü le nchemvu kela thyümvu, lo ale nsenru dan nyu ntanyü tse nme boshvu tyümvu.

³⁹Lihi gwenkho ka tehenthyü le tanyü nme tün laya tse-e ale a npfü tsü thahü. Tsüle a kemu mvu letse ale senryü ntesha hümvu. Nwe mele nhenyu nmvue khejenyu-e rühulo kela dan aka tsü lolo tse hünyo.

⁴⁰Gwenkechon ale nhenyu tsangkeyün nyu kenjünthyü lo khejenyu sesi hü. Ale zhü lomvu.

⁴¹Ale tsühontseo chenki nzen bin. Ale nnyugihvu genyu chentseryü pezi lo nsenru genyu chen tsero tse nlothyü gunryü. Tson-e nno gwentseryü ge achün kelu la.

⁴²A pvübon nyu Sunggigü, Abraham lo Isak Sunggigü le azen hü mvuya tse kethyü we nle akenben anikelai so. Ai Sunggigü le akenjün kethyü lo ale thyü keshü thodan hyukela genyu nje nrhoshü so.”

⁴³Tsontsin Laban le Jakob ka, “Lünyu hidan le anyugi; anyugun nyenyu le ahon, lo senru hidan hile ahon. Ketsin nle hyu kebin hi apu ahon le. Ai ale thame thyüo anyugi ju lo anyu nyenyu dan khin bin keloi kemvu genyu.

⁴⁴Ale nhi kejozenkelo nme thyüla titse nda bin nle. Nhi rüchün lo nrün genyu tsokhwe nme khwela tinu,” tsonshü.

⁴⁵Tson-o Jakob le rüchün hü nrün tso nme pe senshü.

⁴⁶A-le a-temi dan no tso jün kequen pe khweshü lotse zoshüo, anyugun le tsokhwe khweo a-khoka tyütsülo.

⁴⁷Laban le tsüpe Jegar Sahadutha tse kolo lo Jakob le tsü zan pe Galead tholo.

⁴⁸Laban le Jakob ka, “Nthu tsokhwe higü hile nhi jaka rüchün lo nrün thyüti.” Tsügenyu tsüpe Galead tse kolo.

⁴⁹Laban le, “Ngun le khinyu nyu zen kekha tinla-e Npugü no ngun nrihü nda,” tson-o bin tsügü zan ko khipe Mizpah tse tholo.

⁵⁰Laban le zo sin-o, “Nle anyugi ju shwisomvu nmvue tenu kecha loya tselo ale tsü shamvu yatse-e Sunggigü le ngun nri bin nyo tse rüchün lo.

⁵¹Nhi janyu tsokhwe gü, lo rüchün hü nrün tso kesen le hika bin nyo.

⁵²Tsokhwe higü lo tso kesen higü hile nhino n hisi rüchün nilo nrün güle. Ale thame ka-e tsokhwe higü nken-o nwhen loha lo nko tsokhwe higü nmvue rüchün hü nrün higü nken ryü awhe nya.

⁵³Abraham Sunggigü lo Nahor Sunggigü no nhi jaka jopen keshü gü thyüti.” Tson-o a-pvü Isak le rüshvu kehü Sunggigü zan sen-o Jakob le a-le zokeshü dan then titse swela.

⁵⁴Jakob le nyukhu nme dushvuo kazüthun gü ge kershvu nme thyüo a-temi dan kope tyütsü. Anyugun le tyütsü kelosiki tsüje a-nyugun le kazüthun ge sunlo.

⁵⁵Tsüsinyü lonyü nshwe ka Laban le atsunyu dan lo anyugi ju nboshüo jochü anyugun tsü shüo a-kaki rani gunla.