Read Southern Rengma Naga BINZEN 33 Bible Online

BINZEN 33 - Southern Rengma Naga bible

BINZEN 33

¹Jakob le, Esau le a-temi tsizi zen-o ryü kejü hyu shüo ntsenyu dan kenjün kho pe Leah, Rachel lo a-thünu hvu tsü la.

²A-le thenu hvu lo au nyenyu dan no rilo, tsüsika Leah lo a-nyenyu dan tson-o Rachel lope Josef au no kenkhin thyülo.

³Jakob le anyugun mhundyü rio gwen tsenyü ge kazü nyu nkhün tsüo a-tsagü kho nni gü.

⁴Ai Esau le tinryü a-teno-o, a-gwenlo njüo a-nboshüo au mihvu nren chü sola.

⁵Esau le au khoka tenunyu lo ntsenyu dan nrishüo, “Nzen kehü hile dikipon nyula? tson ketsoshü.” Tsontsin Jakob le, “Sunggigü le shwikenjün nyu khipe a ketsü ntsenyu dan le.”

⁶Tson-o thenugi hvu le au nyenyu dan zen nsin ryü-o nkhün a-kelushü.

⁷Tsüsika Leah lo a-nyenyu dan lo kenkhin tsin ki Rachel lo Josef au le nsinryü nkhün-o a-kelushü.

⁸Esau le, “Ale teno kela dan kecha gü tsüle ntsekethyü la? Tsüle nyu genyu la?” Tsontsin Jakob le, “Tsüle nsopfülo nrün genyu le,” tsonshü.

⁹Ai Esau le, “Ako kechon le bin nle, asikezen gü, nhon tsü nle lota.”

¹⁰Tsontsin Jakob le, “Nmvu, ncheno-e, nle ashwi njün yatselo ajwe khilo. A genyu nmhun kehyu le Sunggigü mhun kehyu hontse le, nle a shwi njüo azen lo laso.

¹¹Ncheno-e ale senryü nketsü a jwe hi khilo lo; Sunggigü le aso njün-o ale sen mvulo keshvu lihi-e pe atsü laso.” A-le lolo kemvuthen Jakob le tenge tse lola.

¹²Esau le, “Ngun gwen nda lo njüo tsonchü shü je. Ale hagun mhundyü ri gü tile.”

¹³Jakob le, “Ntsenyu ju le bwerizun lo senru anyu kezen dan hi khenyüme jon-e hü ketsun shülo sikü lalo gwa, ale hidan phin rüchün mvulo keshvu le.

¹⁴Tsügenyu nle amhundyü ri gun tselo, lo ale senru dan lo ntsenyu ju zen-o nmhelo kegwathen nmhe nthen ashvuthyü Edom ki ryü tile.”

¹⁵Esau le, “Tsonlo ale atemi peha khepe no hagun zen bin tile.” Ai Jakob le, “Ale nso pfülo kenyü genyu nti a-me tsühontse mvue gwale,” tsonla.

¹⁶Tson-o tsünyü Esau le ranio Edom ki gunla.

¹⁷Ai Jakob le Sukkoth ki gü a-ka nme thyülo lo a-senru dan genyu thenpon thyülo. Tsügenyu bin tsügü zan pe Sukkoth tse tholo.

¹⁸Jakob le Mesopotamia ki hüo rani keryü ka kenshvu teno mvutse ryü Kanan kazü Shekim nyida tilo njüo nyida gü khoka lobu nme nyu a-kensenbin thyülo.

¹⁹A-le raka tsime pe Shekim a-pvü Hamor tsipwen dan ka lobu tsügü peha heilo.

²⁰Tson-o tsüka kershvubin nme thyüshüo El-Elohe-Israel tse tholo.