Read Southern Rengma Naga BINZEN 34 Bible Online

BINZEN 34 - Southern Rengma Naga bible

BINZEN 34

¹Khenyüme Jakob lope Leah au nyugi Dinah le Kanan nyu tenunyu ju shwishü titse gü.

²Laryü Hivite nyu raja Hamor nyugü Shekim le a-süo zenzhüla.

³Ai a-le lünyu tsügi shwi akenyü sa-o tsügi so lo no a-shwi a-kenyü lo nrün ndabin.

⁴Tson-o a-pvü ka, “Lünyu higi lope ano anu thyülo,” tsonshü.

⁵Jakob le a-nyugi nrhukela rüla shala, ai a-nyu peche jule a-senru zen-o loki kehü genyu, anyugun le ryü kemvu ka a-le thame thyü mvubin.

⁶Shekim a-pvü Hamor le Jakob nthon shü ti tse chwiryü,

⁷tsüka Jakob nyu peche ju le loki hüo ryüjü. A-nyugun le tsü rüla nyükelo ka, Shekim le Jakob nyugi nrhuo Israel temi dan nshwe kela genyu anyu kerü lo nyunta sala.

⁸Hamor le a-ka, “Anyugü Shekim le nnyugi zen keso hünyo, tsügenyu nnyugi no a-zen bin ta.

⁹Agun temi lo ntemi jaka kelo kethyü no bin titse nhi kejozen tile.

¹⁰Tson-o hagun no akazü nyu agun zen bin ti, nle lika hika-e nkenyü ka bin, nkeshathyü hathyü lo nhon no bin lo.”

¹¹Shekim le Dinah a-pvü lo a-tsünyu juka, “Akenyü kon higü hi thyüshülo, hagun le nyu hiyo ale tsü khipe hagun tsüti.

¹²Jwe nyu lonyü bin yo, lo temi dikho tetso nyübin yo aka zoshü lo, hagun le a-lope akashü tiya tse kethyü we hagun le nyu hiyo ale tsüpe hagun tsüti le.”

¹³Shekim le anyugun lügi Dinah nrhukela genyu Jakob nyudan le Shekim lo a-pvü Hamor au sala.

¹⁴Anyugun le, “Agun le agun lügi pe temi a-girü kemvu nyu ka kalu lo nrün ndi, tsüle agun genyu kezhakepfü nmeso.

¹⁵Hagun le agun hontse peche aphu a-girü laya tselo ngun kerhün logwa.

¹⁶Tsonya tselo ngun khinyu nyu kelo kethyü agun kenda ti. Agun le hagun dan nyu bin-o hagun zan kemethyü tin lati.

¹⁷Ai hagunle agun jotsü then-o hagun girü lakemvu we agun le agun lügi zen-o tin lati.”

¹⁸Jo hile Hamor lo a-nyugü Shekim au kenyü la;

¹⁹tsüselo ponyu gü le Jakob nyugi zen keso kebin laryü nyuthyü lotse shüyo ntsü lamvu. A-le anyugun kaminyu a-kentsen tsingü thyü bin.

²⁰Hamor lo a-nyugü Shekim au le nyida gü chwida ka kenthon bin kagü anyugun temi dan ka zoshü.

²¹“Temi hidan le nzen kengü gwa gwenzin; anyugun no nkazü nyu bin-o a-keshathyü hakonhalü thyülo. Kazü gü le anyugun genyu ai nmhun sa bin nyo. Ngun anyugun nyugi lo lo ngun nyugi pe anyugun ka kalu shü tse tile.

²²Ai temi hidan le ngun le anyugun hontse peche aphu a-girü la kemvu we ndan nyu yhun-o nzen kengü nme thyü lomvu letse bin nyo.

²³Anyugun senru lo anyugun hon kebin lihi-e pe nhon thyümvu la ti ole? Tsügenyu no ndan nyu yhunlo nrün genyu anyugun zen kejozen lo tile.”

²⁴Nyida günyu phenyü nyu aphu Hamor lope Shekim au le nyuzoshü yo tsüle a-kenda küla, tson-o pechenyu aphu a-girü küla.

²⁵Jonshen siki temi dan le a-gikerü le thyü kebin ka Jakob nyu Dinah tsügü Simeon lope Levi au le au jenthon khilo-o nyida günyu yügü mele rüchünmvu kebin ka pechenyu aphu dushvu küla.

²⁶Hamor lope anyugü Shekim au ko sin dushvula. Tson-o Shekim kanyu Dinah zen tinla.

²⁷Jakob nyu dan le anyugun lügi no tetsin pfü kela khünzo-o temi dan dushvukela siki rünyi gü nyu kanyü dan khilo la.

²⁸Anyugun le tanyü, methu, gada, lo kecha lihi le rünyi nyu lo tehen ki kebin aphu hü lola.

²⁹Tson-o anyugun kanyu kebin kanyü miketsen lo tenunyu lo ntsenyu aphu tenzen tinla.

³⁰Jakob le Simeon lo Levi au ka, “Hai le kevü hü süpe age shü laso; tsüselo Kanan nyu Periznyu lo kazü gü nyu kebin aphu ashwintsü kelai so. Ale temi chonmvu; tsügenyu anyugun le kengü kerhün ryüo awhe yatselo, nkaminyu apentha nke kelaiso.”

³¹Ai anyugun le, “A-no agun lügi lope keyüla chüntyü kehü nme hontse lo kemvui le.” tsonla.