Read Southern Rengma Naga BINZEN 35 Bible Online

BINZEN 35 - Southern Rengma Naga bible

BINZEN 35

¹Sunggigü le Jakob ka, “Bethel ki gü tsünyu yhun tin lalo. Tson-o kershvubin nme thyü pe nle ntsa Esau mhundyü nyu tin kejü ka nyhühyu thyü keshü gü Sunggigü tsü shülo.”

²Tson-o Jakob le akami lo a-zen kehü dan aphu ka, “Hagun le sen kehü sin rünyi tero tsü khela; hagun npfü hagun thyü kenshün lo phinya kenshün bennya külo.

³Ngun hika binmvuo Bethel ki gunla ti. Ale tsüka kershvubin nme thyü pe ale thyülo keshvu ka a keche keshü lo ale lika hika gü-e azen kehü Sunggigü tsü ti.”

⁴Tson-o anyugun le kebin sin rünyi teromen dan lo anyugun lera kehü nye dan ko pe Jakob tsüla. A-le Shechem khoka tesho bin gü hensin nyu tsü pe sunla.

⁵Jakob lo anyudan le tin kejü ka rünyi tsü khoho kebin dan le nshvu salao, anyugun thenryü mvula.

⁶Jakob le a-temi dan aphu zen-o Luz ka ryü, ntsoka tsü pe Bethel tse hü nyo, tsüle Kanan kazü nyu bin.

⁷A-le tsüka kershvubin nme thyülo-o, bin tsügü pe Bethel Sunggigü zan tholo, a-le a-sikezengü nshvuo tin kejü ka Sunggigü le tsünyu a-yhühyu thyü keshü genyu.

⁸Rebeka lüyi kehü gü Deborah le si lao pe Bethel tesinzin tesho bin gü hensin nyu sunla. Tson-o tsü zan thope chükebin tesho bin tse kola.

⁹Jakob le Mesopotamia ki bin-o rani keryü ka, Sunggigü le a-yhühyu thyü ni-o jochü pe a-tsü.

¹⁰Sunggigü le a-ka zoshü, “Nzan le Jakob, ai ntsoka gerho tsü pe Israel thyü lati.” Tson-o Sunggigü le a-zan pe Israel thyü shüla.

¹¹Lo Sunggigü le a-ka zoshü, “Ale kekvutsin Sunggigü le. Nle nyu kechon nkin lolo, N tsipwen ge senye le chwiryüti, lo nno rajanyu bon thyü ti.

¹²Ale khipe Abraham lo Isak ketsü kazü gü pe ntsüti, lo ale tsü pe siki n tsipwen dan ko tsüti.”

¹³Tsonshüo Sunggigü le a-khe-o tinla.

¹⁴Sunggigü le a-nthon keshü bin tsüka, tsü rüchün hü nrün genyu Jakob le tso nme sen shüo vainzu lo oliv terzü ja pe tsüge shüo thyü kenshün lo.

¹⁵A-le bin tsügü zan thope Bethel thyülo.

¹⁶Jakob lo a-kaminyu le Bethel nkenla, lo Ephrath ti nrün le nithen din kebin ka Rachel a-nyu kezen gwenkho le ryüla, tson-o a-ginthyüsa lola.

¹⁷A-ginthyüsa kebin ka a-ntsenkebin gi le a-ka zoshü, “Rachel, nshvu nyalo; tsüle ntsenyu a-kecha nme le” tseshü.

¹⁸Ai a-le sigü jüla, a-le a-nyugü zan pe Benoni thoshüo a-teshye hen kenkhin gü thyüla, ai a-pvü le a-zan pe Benjamin tholo.

¹⁹Rachel le sikela ka pe ntsoka Bethlehem tse kehü, Ephrath ki kegü tson teka sunla.

²⁰Jakob le rüchün hü nrün tso nme pe tsüka sen shü, nthu keti tsü le Rachel sika tse hü.

²¹Jakob le ketu-o Eder tsokhwe pere kipon a-kensenbin thyülo.

²²Jakob le kazü tsügü nyu yhun kebin ka Reuben le a-pvü thenu a-zan le Bilhah tse kethyü nme zen jüla; Jakob le tsü rüla nyülo-o nthün sa lola. Jakob le a-nyu peche min tseryü kenyhun le bin:

²³Leah nyu peche dan le Reuben (Jakob nyurigü,) Simeon, Levi, Judah, Issachar lo Zubulun.

²⁴Rachel nyu peche le Josef lo Benjamin au.

²⁵Rachel gogi Bilhah nyu peche le Dan lo Naftali.

²⁶Leah gogi Zilpah nyu peche le Gad lo Asher. A-nyu peche hidan hile Mesopotamia ki nnyu lo.

²⁷Jakob le Abraham lo Isak au le yhun kehü Hebron khoka Mamre ka a-pvü Isak ki gü.

²⁸Isak le chen tsio hen tetse la

²⁹lo a-le then sao si: tson-o a-nyu Esau lo Jakob au le a-sunla.