Read Southern Rengma Naga BINZEN 37 Bible Online

BINZEN 37 - Southern Rengma Naga bible

BINZEN 37

¹Jakob le a-pvü le yhun kehü Kanan kazü günyu bin,

²lo hile Jakob kaminyu rüla. Josef le a-keyhun chen tseryüo tsenyü ka a-tsanyu ju zen-o a-pvü tanyü lo tenyü khwehü, a-pvü thenu Bilhah lo Zilpah au nyu dan zen-o. A-le a-tsanyu ju serikemvu rüla senryü a-pvü ka zoshü.

³Jakob le a-nyu kecha aphu nyeki Josef sokvu, kechamvu le a-le thenkela ki a-nnyu kelo genyu. A-le mirün ketseyho a-jvü kechon le kebin ripe Josef nben shü.

⁴A-tsanyu jule anyugun pvü le Josef sokvu kethyü hyushüo a-nrhi lola, tson-o kegwa thyü a-nthon mvula.

⁵Kheje me Josef le a-min nme nmio a-tsanyu juka zoshü, tsüselo anyugun le a-nrhi kvu lola.

⁶A-le zoshü, “Amin nyü shüta.

⁷Ngun aphu low ki thoshe lopwe nsin bin, tsüka a low sin gü le ndun bin. Lo hagun low sin le ahon gü hunpfü bin laryü che tsüryü a-hon gü ge nbon lale.”

⁸“Nkerüchün le nle raja nme thyüo agun so gon titse bin nle?” a-tsanyu ju le tson ketsoshü. Tsüselo a-tsanyu jule a-min, lo a-le anyugun rüla zokeshü genyu a-nrhi kvulola.

⁹Josef le a-min kecha nme nmin ni, tson-o pe a-tsanyu ju ka zoshü, “Ale a-min kecha nme nmin ni kethyü le, yhüko, shye, lo shyenyü tseryü nme le aphanyu nkhün tsü ryü le.”

¹⁰A-le a-min pe a-pvü kako zoshü, laryü a-pvü le a-kesü la: “Nle nyu nmin hü nye ola? Njvü, ntsanyu ju lo ale tse npha nyu nkhün tsüryü titse nle rüchün hü nle?”

¹¹Josef a-tsanyu ju le a-shwi anyugun yhüthyü bin ai a-pvü we tha tsü aphu rüchün hü.

¹²Khenyü me Josef tsanyu ju le anyugun pvü senru khweo Shechem ki güla,

¹³tsüselo Jakob le Josef ka zoshü, “Ale nno ntsanyu ju le senru khwe kebin Shechem ki günyü bin nle,” tson shü. Josef le, “Ale gü tile” tse zoshü.

¹⁴A-pvü le zoshü, “Ntsanyu ju le gwa bin le nmvuyo lo senru aphu dihontse bin yo gü shwishüo ryü aka zoshülo.” Tson-o a-pvü le Hebron ketejon ki a-ni shüla. Josef le Shechem karyü

¹⁵lo a-le tehen nyu ho kebin ka temi nme le a-hyu shüo, “Nle nyu fü hü nla?” tse a-ketso shü.

¹⁶A-le zoshü, “Ale atsanyu ju le senru khwe kehü fü hü nle, anyugun le diki hüyo nle aka zoshü ti mon?”

¹⁷Temi tsügü le, “Anyugun le tin laso. Anyugun le Dothan ki güjü nle tse kezo ale nyülo le.” Tson-o Josef le atsanyu ju then Dothan ki gü anyugun hyulo.

¹⁸A-le ntsenki hüo ryü anyugun ti kelo mhundyü anyugun le a-hyushüo a-boshvu la titse rhi lola.

¹⁹Anyugun le khinyu nyu ka, “A-min kesha gü le hika ryü jü so,

²⁰Ryülo, ngun a-boshvu lao, pe zülvu kesin nme nyu shüla tinu. Tehenthyü nme le a-tün lale tse ngun le zo lagwa le. Tson-o a-min le dihontse ryü tiyo ngun shwishü tile.”

²¹Reuben le anyugun khwenyü lo-o Josef kenishü titse so. A-le zoshü, “Ngun a-boshvula nyalo.”

²²“A-shwe pe hiki tehenyhun kemvu ki zülvu kesin nme nyu shü gwenzin lalo, a-nthyünnyü nya.” A-le anyugun ben nyu a-kenishüo ninipe a-pvü ki shüla nrün geyu hihontse zoshü.

²³Josef le ryü a-tsanyu ju tilo ntsin, anyugun le a-minrün ketseyho tsü yhün lola.

²⁴Tson-o a-zen gü zülvu kesin nme nyu shwe shüla.

²⁵Anyugun le tyütsü kebin ka, Ishmael tsipwen nyu dan me le Gilead ki güo Ijipt ki gü kejü hyushü. Tharünkegwa lo terasha kenko pe anyugun ut dan khvü thyü pfü hü.

²⁶Tsüselo Juda le a-tsanyu juka zoshü, “Ngun le ngun sikezen gü dushvu pe kebu lao nyu kechwi hyulo tila?

²⁷Ngun a-khipe Ishmael nyu hidan ka jwen la tinu. Tsonya tselo ngun le a-nthyünnyü kemvui: a-le ngun sikezen gü, ngun thyü zile.” Tsontsin a-tsanyu ju le anyu kendo küla,

²⁸tson-o Midianyu hakethyü nyu dan le ryü laryü, a-tsanyu ju le zülvu nyu a-süshwi pe Ishmael nyu ka rakagi nki hei lao tsüdan le a-zen Ijipt ki tsüla.

²⁹Reuben le zülvu gü ki ryü laryü Josef le tsünyu bin mvu kela hyulo-o anyungwa mvuo a-phi sürhenla.

³⁰A-le ryü a-sikezen nyu juka zoshü, “Ntsenyu gü le tsüka ndi laso! Ale nyuthyü ti sela?”

³¹Tsüselo anyugun le tenyü nme dushvu lo-o a-zi pe Josef minrün yünlo.

³²Anyugun le minrün gü sen anyugun pvü ki ryü, “Agun le hi hyulo le. Hile nnyu gü hon le nmvula?” tse zoshü.

³³A-le tsü shalo-o zoshü, “Ele, hile a-hon le! Tehenthyü peha le a-tün laso. Anyu gü Josef sütü-sürü la tiso te!”

³⁴Jakob le a-nyungwa mvuo a-phi sürhen lao ronphi ben lola. Tson-o gwenkho kethon a-nyugü chechü.

³⁵A-nyenyu peche tenu aphu ryü a-nyunthyü nbwe, ai a-le a-nyun bwelo mvuo zo, “Ale anyugü chechü bin-o kesinyu kazü ki gü kethyü-e sole.” Tson-o a-le anyugü chechü bin.

³⁶Tsonkebin ka Ijipt ki Midia nyu jule Josef pe raja gü hensin kedanyu a-zan le Pontiphar tse kethyü rajaka kekhwe tsiso kedanyu nme ka jwenla.