Read Southern Rengma Naga BINZEN 4 Bible Online

BINZEN 4 - Southern Rengma Naga bible

BINZEN 4

¹Adam le a-nu Eve zenkengüla, tsontsin a-le nyuphupfü lo njüo pechenyu nme nnyu shü. Tsüselo a-le, “Npugü kechenyu ale peche nme nnyu lo laso” tson-o a-zen pe Kain tholo.

²Lo tsüsiki a-le peche kecha nme Abel n nyu nilo. Abel le tanyü nkin lo Kain le lotsü hü.

³Tson tseo khenyüme Kain le a-lonyu hyukelo a-rasha senryü kershvu thyü pe Npugü tsüshü.

⁴Lo Abel le a-tanyü dan nyu nchelo kerigü dushvuo a-kegwatsin ka sen ryü Npugü rüshvu shü. Tsontsin Npugü le Abel lo a-kerüshvu shwi a-kenyü la.

⁵Ai a-le Kain lo a-kerüshvu lomvu la. Tsü genyu Kain le a-nyunta sao a-mhun gwamvu lola.

⁶Tsontsin Npugü le Kain ka, “Nle nyuthyüo n nyunta bin nla? Nyuthyüo nmhun gwa mvu bin nla?

⁷Nle kenjü gü thyü lolo nle nnyü bin nrün ai nle gwakemvu thyü kela genyu kemu le kakhin ka bin laso. Tsüle nso gon nyü bin nyo, ai nle tsünye kvulo mvu loshvu.”

⁸Tson-o Kain le a-sikezen gü Abel ka, “N nyi low ki tsüti le.” Tson-o au lownyu kehü ka Kain le a-sikezen gü when-o dushvula.

⁹Npugü le Kain ka, “Nsikezen gü Abel le diki hü nla?” tson shü. Tsontsin a-le, “Ale shamvu, Ale asikezen gü kekhwe gü ole?” tsonla.

¹⁰Tsontsin Npugü le a-ka, “Nle nyuthyü la la? Nsikezen gü zi le kazü nyu nra ako bin laso.

¹¹Lo kazü günyu n swetsü la so, tsüle a-mün kvupe nben nyu nsikezen gü zi lo kelo gü.

¹²Nle lotsü yatse-e, kazü gü le thame nyhun shü loha; n no kazü nyu nka ndio ho kehü nyu nme thyüti.”

¹³Tsontsin Kain le Npugü ka, “Shaja higü hile agenyu tsan ritsin laso.

¹⁴Nle nthu kazü gü nyu lo nmhundyü nyu ahü laso, lo ale nmhundyü nyu kebu kehüi so. Ale aka ndio ho kehü giso, lo ligü higü ahyu kelo gü le adushvu lati.”

¹⁵Ai Npugü le, “Nmvu. Ligü higü Kain dushvu laya tselo, tsü gü ge khün jüntseryü loti.” Tson-o Npugü le a-teno kelo nyu le adushvu lalo keshvu genyu zansü nme pe Kain ge shüla.

¹⁶Tson-o Kain le Npugü mhundyü nyu tinla tson-o gü Eden nphozin “Nod” kazünyu yhun tinla.

¹⁷Kain lo a-nu au nyu peche nme nnyulo, lo a-zan pe Enok tholo. Tson-o Kain le nyida nme thyüshüo rünyi tsügü zantho pe a-nyugü zan thyülo.

¹⁸Enok nyu Irad tse kethyü peche nme le bin, Irad le Mehujael a-pvü, lo Mehujael le Methushael a-pvü, lo Methushael le Lamech a-pvü.

¹⁹Lamech le a-nu mihvu thyü nme le Adah lo kechagü zan le Zillah.

²⁰Adah le Jabal nnyu shü, a-le senru nkin lo züphika nyu yhun kehü dan bon gü.

²¹A-sikezen gü le Jubal, lükhin lo Harp lo kheli sen-o lüthyü kehü aphu bon gü.

²²Zillah le Tubal Kain nnyu shü, a-le lazo lo tegi pe kanyü karun kechacha aphu thyü shü. Tubal Kain lügi zan le Naamah.

²³Lamech le a-nu hvu kazo, “Adah lo Zillah hai akhwe nyülo; selo nme le avü keshü genyu ale a-dushvu laso.

²⁴Kain dushvu laya tselo a-khün keyhun ronzin mitsenyü loti yatselo, Ligü higü a dushvu laya tselo hentsenyüo tsenyü loti.”

²⁵Adam lo a-nu au le peche nme hyu lo. Ttsontsin a-le, “Sunggigü le Kain le dushvu kela gü Abel sunka peche nme khi nipe atsü shü laso,” tson-o a-zan pe Seth tholo.

²⁶Seth le a-nyu peche nme nyulo, tson-o a-zan pe Enosh tholo. Tsügwenkho ka temi le Npugü zan ko-o rüshvu sola.