Read Southern Rengma Naga BINZEN 40 Bible Online

BINZEN 40 - Southern Rengma Naga bible

BINZEN 40

¹Tsüsiki Ijipt raja hon kepen gü lo a-tensü ro kehü keda gü au le raja gü kenyü kemvu thyüla.

²Tson-o a-le a-hensin kedanyu hihvu ge a-nyuntala

³tson-o au pe rikhun tsiso keda gü kanyu Josef khin kebin günyu do thyüla.

⁴Au le jon kethon doka nyu bin hü, lo tsiso kedagü le Josef no au lothyü hü.

⁵Kheje me dokanyu hon kepen gü lo tensü ro kehü keda gü hvu le au min nmin, au min le a-kon kechacha.

⁶Lonyü gü Josef le au ki ryü laryü au le au mhunsu kebin hyulo.

⁷A-le au ketso shü, “Nyu genyu nthu hai shwi pe nyun leho sa bin nla?”

⁸A u le zoshü, “Ayi mihvu nren ayi min nmin, lo hika temi nme ayi min kon zokeshü min ndi le.” Tsontsin Josef le zoshü, “Min kon zolokegwa khishü kehü güle Sunggigü le. Hai min pe aka zoshülo.”

⁹Tsüselo hon kepen gü le zoshü, “amin ki vainsha la amhundyü ka bin

¹⁰tsüge a-ro kenshen le bin. Lo a-nyü sen chwiryü nyemhun, pun chwiryüo vainsha le nyen lola.

¹¹Lo ale raja gü honpen sen hü; tsügenyu ale vainsha lü lo-o thün pe honpen gü nyu shü pe a-tsü hüle,” tsonshü.

¹²Josef le zoshü, “Tsüle a-kon le hihontse: a-ro kenshen tsüle jonshen.

¹³Jonshen jaka raja gü le n hoshü lati, lo n kemu jüshü lao n lope nbin ka shüni lati. Nle himhundyü a-honpen kepen gü thyü kehü ka hontse nle a-honpen pen pe a-tsüti.

¹⁴Ai ngenyu tha aphu gwa kelo ka a rüchün shülo, lo a njün-o a rüla pe raja gü ka zoshüo a cheo doka higü nyu akhishwi shüta.

¹⁵Ibrinyu kazü ki mele aten lola, lo hiki Ijipt kiko meno aten pe doka nyu shükezü tho nme ale thyü mvule.”

¹⁶Tensü ro kehü kedagü le hon kepen gü min kon le gwa kethyü sha shüo, Josef ka zoshü, “Ako amin nmin le; ale tensü rokhu kenshen pe ape ge dun pfü hü.

¹⁷Lo rokhu tesotsin günyu raja gü genyu tensü shaseni aphu bin, lo tegü dan le tsütyü hü le.”

¹⁸Josef le zoshü, “Tsü kon le hihontse: rokhu kenshen tsü le jonshen.

¹⁹Jonshen jaka raja gü le nhoshü lati- tson-o npe duthü lati! Tson-o a-le nmin pe kachon nme ge hü nshon lao tegü le nthyü tyüti.”

²⁰Tsüsi jonshen nyü raja gü le a-kenyu jon thyüo a-hensin nyu kedanyu aphu zen keho thyü; a-le a-hon kepen gü lo a-tensü ro kehü keda gü au hoshüo au zen a-hensin kedanyu dan kiryü.

²¹Tson-o a-hon kepen gü pe himhundyü a-bin ka shünila,

²²ai a-le tensü ro kehü kedagü we pe hüla. Josef le zo keshü hontse aphu thyüla.

²³Ai honpen kehü gü le Josef rüchün nishü mvula-ale a-rüla nmhin shüla.