Read Southern Rengma Naga BINZEN 41 Bible Online

BINZEN 41 - Southern Rengma Naga bible

BINZEN 41

¹Chen hvu gükela siki, Ijipt raja gü le a-le Nile züri ka so kebin nmin,

²tsüka methu aphu kegwa tsenyü le chwiryü tehen sütyü bin.

³Tsüselo methu kecha tsenyü le chwiryü; tsü dan le nthü lo a-thyü gwamvu. Tsüdan le ryü züzhe gü nyu methu kecha dan khoka solo,

⁴lo methu kenthü dan le a-phu kegwa dan tyü lola. Tson-o raja gü le chon soryü la.

⁵A-le jü nigü laryü a-min kecha nme nmin ni. Lophun nme ka lopwe kenyün tsenyü le yhun bin.

⁶Tsüsika lopwe a-tsin gwakemvu, kazü kesi ki tsangkenhi le whün rügu kela kecha tsenyü le yhun soryü,

⁷lo lopwe a-tsin kendi dan le a-tsin kegwa dan nyishü lola. Raja gü le chon soryüo a-le a-min nmin kebin shalo.

⁸Lonyü a-le a-nyun nkhi-o me nipe Ijipt nyu jadunyu lo thakesha nyu koshü. Tson-o a-min pe anyugun ka zoshü, ai temi nme tsü kon zope a-zenshü lomvu la.

⁹Tsontsin a-hon kepen gü le raja gü ka zoshü, “Ale thyüzü kela nthu zoshwi mvulo shvu laso.

¹⁰Nle tensü ro kehü kedagü ayi ge nnyuntao ayi pe rikhun nyu so kedagü kanyu do thyüla.

¹¹Kheje me ayi mihvu nren ayi min thyü lo a-kon le kechacha.

¹²Lo Ibrinyu ponyu nme, rikhun so kedagü do nme do ayi zen tsünyu bin. Ayi le ayi min pe a-ka zoshü lo a-le tsü kon zope ayi zen shüle.

¹³Lo a-le kezo hontse thyü lale: Nle alope abin nyu shünila, ai nle tensü ro kehü gü hü la.”

¹⁴Raja gü le me nishüo whütse doka nyu Josef zenryü. A-le a-pe thula lo a-phinya kelu kela siki raja gü mhundyü nyuryü.

¹⁵Raja gü le a-ka zoshü, “Ale amin nme nmi lo temi nme tsü kon zokho shü lomvu. Nle min kon zoshü logwa letse mele aka zoshü.”

¹⁶Josef le a-jokenishü, “Ale zokeloimvu, raja gü, ai Sunggigü le njün-o a-kon zo shüti.”

¹⁷Raja gü le zoshü, “Amin ki ale Nile züzhe nyu sobin,

¹⁸lo methu aphu kegwa tsenyü le züri gü nyu chwiryüo tehen sütyü sola.

¹⁹Tsüsika methu kenthü kecha tsenyü le chwiryü. Tsüdan tsü le ale Ijipt kazü lika hika-e kehyu methu dan nyu kenthü tsin.

²⁰Methu kenthü dan le aphu kegwa dan tyü lola,

²¹ai temi nme tsü sha loho, anyugun shwipe kerika hontse nthü kethyü genyu. Tson bin-o ale chon soryüla.

²²Ale lopwe a-tsin kegwa kenyün tsenyü le lophun me ge yhun kebin ko ale nmin.

²³Tsüsika lopwe tsenyü le chwiryü, a-tsin gwamvu lo kazü kesi ki tsangkenhi le whün rügu kela,

²⁴lo shye tsingwa kemvu dan le kegwa dan nyishü lola. Ale min gü zope jadonyu dan zenshü, ai anyugun nme a-kon pe aka zoshü lomvu la le.”

²⁵Josef le raja gü ka zoshü, “Min kenyhun nren a-kon le kenme: Sunggigü le a-le nyuthyü tiyo pe nka zoshü laso.

²⁶Methu tsü aphu kegwa tsenyü tsüle chen tsenyü, lo lopwe kegwa tsenyü tsüko chen tsenyü; au kon le kenme.

²⁷Methutsü kenthü kenkhin ki keryü dan, lo lopwe tsingwa kemvu kazü-kesi ki tsangkenbu le whün nko kela tsüle chen tsenyü chenda.

²⁸Ale nka zokeshü hontse- Sunggigü le a-le nyuthyü tiyo pe nhishü laso.

²⁹Chen tsenyü Ijipt kazü aphu nyu kesükela thyü sati.

³⁰Tsü siki chen tsenyü chenda thyüti, lo chen kegwa dan aphu nmhin lati, chenda gü le kazü gü nkela nrün genyu.

³¹Kesükela kethyü gwenkho gü nmhinshü lati, tsüsika chenda gü le ketetsin thyüri kela genyu.

³²Nmin nmin hvu ge kethyü kon le Sunggigü le tsü gwenkho tho laso lo ryü kejü gwenkho thonmvu tse a-le tsü no ryüti.

³³“Tsügenyu nle ntsoka temi kensü lo thakesha nyu peha kejü pe no kazü gü ntsen lo.

³⁴Lo nle kedanyu kecha peha ko kejü shüo no kesükela kethyü chen tsenyü ka shye jün pvün jünme khilo mvu loshvu.

³⁵Nle ahza pe anyugun tsü shüo anyugun no ryükejü chen kegwa dan ka shye aphu kequenlo, lo kekvu pe anyugun tsüshüo no nyida dan ka shyeka thyü lo-o rikhun lo.

³⁶Tson-o ketyüketsü tsüpe chen tsenyü chenda le Ijipt nyu ryü kejü gwenkho ka kazü günyu kenjün nrün genyu ntsen binlo. Hihontseo temi ko khün mvu loti.”

³⁷Raja gü lo a-hensin kedanyu dan le tharhi higü lolo,

³⁸lo a-le anyugun ka zoshü. “Ngun le Sunggigü kapu le age kebin Josef hi nyeki thame temi gwakvu kethyü hyu keloi mvu.”

³⁹Tson-o raja gü le Josef ka zoshü, “Sunggigü le hi aphu pe n hishü laso, lo nle kechanyu aphu nyeki nsü lo thasha kvu tsen tsü laso.

⁴⁰Tsügenyu ale nno akazükentsen gü thyüo temi aphu no nle ahza khikeshü zenti. N kekvu no asi kagü thyüti.

⁴¹Ale ntsoka n lope Ijipt aphu so Ahng gü thyü laso.”

⁴²Tson-o raja gü le a-zenkoro ka raja mehor le kebin benkhin tho pe Josef zenkoro ge rün shü, A-le linen mirün ketseyho pe a-nben shü, lo suna kerasü pe a-nlu shü.

⁴³A-le raja gari kenyhun gü ge a-no dunlo, lo a-kerühvu rikhun nyu le a-mhundyü ri nrao, “Tson phashü! Tson phashü!” Tsühontse Josef pe Ijipt aphu so Ahng thyülo.

⁴⁴Raja gü le Josef ka zoshü, “Ale raja gü- lo Ijipt aphu nyu temi nme no nka shün mvutse a-pha nmvue a-ben penso shü loho.”

⁴⁵A-le Josef zan pe Ijipt nyu khwe ki Zaphenath Paneah thoshü, lo Heliopolis nyida nyu püshükeda gü Potiphera nyugi Asenath pe a-nu thyü shü. Josef le chen shenryü ka Ijipt raja gü lothyü so. A-le raja ka nken-o kazü aphu so njwen.

⁴⁶

⁴⁷Chen tsenyü kesükela thyü tsü gwenkho ka kazü günyu shye kechon hyulo,

⁴⁸tsü aphu Josef le kequen pe nyida dan ka shü lola. Nyida nmeme ka a-le tsü tekehun ka low nyu shye kequen pe bin la.

⁴⁹Shye le chonri tsin-o Josef le shye ndo mvula- tsüle züri seka hachon hontse la.

⁵⁰Chenda le keryü mhundyü Josef le Asenath au nyu peche mihvu le bin.

⁵¹A-le zoshü, Sunggigü le athyü pe ano akenyü kethyü lo apvü kami aphu nmhin laso; tson-o a-le a-nyuri gü zan pe Manasseh tholo.

⁵²A-le zonio, “Sunggigü le ale kenjün thyü kehü kazü ki ntsenyu pe atsü shüle,” tson-o a-nyu kenyhun gü pe Efraim tholo.

⁵³Chen tsenyü kesükela thyüo Ijipt le shekerhün thyü kelo gü tsüle a-keni thyü ryüla,

⁵⁴lo chen tsenyü chenda gü le ryü la Josef le zokeshü hontse. Tsüka chenda le kazü kecha aphu nyu bin la, ai Ijipt aphu nyu ketyüketsü le bin.

⁵⁵Ijipt nyu le nnyo kelo ka, anyugun le nrao raja gü ka ketyüketsü hiso. Tsügenyu a-le anyugun no Josef ki gü a-le anyugun ka nyuzo shüyo thyü lolo tse ahza hoshü.

⁵⁶Chenda gü le shvukvu-o kazü apentha nyu gunla, tsügenyu Josef le kenya ka dan aphu khinsheo shye pe Ijipt nyu ka jwen.

⁵⁷Kazü aphu nyu temi le Ijipt ki ryüo Josef ka shye hei, kechamvule lihi ka-e chenda thyüsa kela genyu.