Read Southern Rengma Naga BINZEN 45 Bible Online

BINZEN 45 - Southern Rengma Naga bible

BINZEN 45

¹Josef le a-khoka kebin nyu dan mhundyü a-kekheni loha lao, anyugun aphu no tin la lotse nila. Josef le a-le segü yo pe a-tsanyu ju ka zokeshü gwenkho ka temi nme no bin mvu.

²A-le nra chü keshü Ijipt nyu le nyülo, lo jolo tsü sengü raja gü kaminyu-e no shala.

³Josef le a-tsanyu ju ka, “Ale Josef le. A pvü le yhunbin zunla?” tsonshü. Ai a-tsanyu ju le johi nyü lo ntsin, anyugun kerüshvulao thame zolo mvula.

⁴Tsüselo Josef le anyugun ka, “Hagun cheno-e akho nni ryülo.” Tson-o anyugun le ryü laryü, a-le, “Ale hagun sikezen gü Josef, hagun le jwe pe Ijipt ki shü kela gü tsüle.

⁵Ntsoka we hagun le ajwe pe hiki shü kela genyu hagun nyun gwamvu nmvue hagun npfü hagun nmu bin nya. Temi keyhun ronzin kenishü nrün genyu Sunggigü le hagun mhundyü anishü la ketsin le.

⁶Kazü günyu chenda le hi chenhvu gü ntizun; ntsi shümvu nmvue logvü mvu nrün chen pvün le bin tizun.

⁷Sunggigü le ndun kethyü tson hinyu hagun ntsenlo, lo hagun lo hagun tsipwen no rhün bin lo tsentsü nrün genyu hagun mhundyü a nishü laso.

⁸Tsügenyu hagun le mvu le Sunggigü le a nipe hinyu shütsin thyü shü le. A-le a khipe raja gü hensin keda tsin gü thyüshü laso. Ale a-lojvü apentha kentsen gü; Ale Ijipt aphu so keda gü thyü bin nyo.

⁹“Whütse gun gü a pvü ka, a-nyugü Josef le hihontse zobin nle tse zoshülo: ‘Sunggigü le athyüpe Ijipt aphu sa keda thyü bin nle; ntsüla nya-o aki ryülo.

¹⁰Nle Goshen lojvü nyu yhun-o akhoka bin logwa- nle nnyenyu, ntsunyu, ntanyü, nnyü, nthu lo nle kebin lihi-e yhun lo gwa le.

¹¹Nle Goshen ka bin ya tselo ale n nucha loti. Chen pvün chenda thyüni tizun; lo ale nno n kami lo nsenru zen-o khün bin nyümvu.’ ”

¹²Josef le zo-o, “Ntsoka we hagun aphu, lo Benjamin nko ale Josef ketsin tse hyu bin nyo.

¹³A pvü ka ale hiki Ijipt nyu dihontse kvusa bin nyo, lo hagun le hyukela lihi-e pe zoshülo. Tson-o whütse a-zen hiki ryü lalo.”

¹⁴A-le a-sikezen gü Benjamin thün pen-o chü sola; Benjamin ko a-süra pen-o chü.

¹⁵Tson-o a-le a-tsanyu ju nmeme gwenlo-o chüo anyugun nbo küshü. Tsüsiki nyu a-tsanyu ju le a-nthon so.

¹⁶Josef tsagüsikeezen ju le ryübin nle tse kethyü rüla Raja lo a-hensin kedanyu dan le shalo njüo anyugun sherhün la.

¹⁷Tson-o ale Josef ka, “Ntsagüsikezen ju no anyugun nyukhu dan khvü thyülo-o Kanan ki rani gunlo.

¹⁸Anyugun no anyugun pvü lo anyu kaminyu zen-o hiki rani ryülo. Ale Ijipt nyu kazü kegwatsin pe anyugun tsüti, lo anyugun le kesükela thyü yhun logwa le.

¹⁹Lo anyugun no anyu nunyu dan, anyugun nyenyu keshe dan lo anyugun pvü pfülo nrün genyu Ijipt ki Gari dan sen lo.

²⁰Anyugun no anyu hon khe kela genyu nyun le hanya; Ijipt nyu kegwatsin apentha anyugun hon thyüti.”

²¹Jakob nyenyu ju le anyugun ka zokeshü hontse thyülo. Raja gü le zokeshü hontse Josef le gari dan lo tson nenyu anyugun ketyü ketsü khishü.

²²A-le phinya kelu lo nrün ko pe anyugun nmeme tsü, ai Raka tsishen lo phinya kekelu pvün pe Benjamin tsüshü.

²³A-le Ijipt nyu hyulo kehü thakegwatsin pe gada tseryü khvü thyüshü, tensü pe gada tseryü khvü tse nipe a-pvü tsü lo tson nenyu ketyü ketsü ko ndashü.

²⁴A-le a-tsasikezen ju nishüo anyugun le tin kejü ka, “Tson nenyu kega nya nye,” tsonshü.

²⁵Tson-o anyugun le Ijipt nken-o Kanan ki anyugun pvü Jakob ki rani ryü.

²⁶Anyugun le a-ka, “Josef le rhün bin zun, A-le Ijipt sa kedagü thyü bin nle!” tsonshü. Jakob le a-dun thyüo, anyugun jo tenyen lo nrün ndila.

²⁷Ai anyugun le Josef le anyugun ka kezo jo aphu pe a-ka zoshü, lo Josef le a-pfüo Ijipt ki gü nrün genyu gari nikeshü dan hyulo ntsin, a-kerü kela nyu tsü gwani lo.

²⁸Tson-o a-le, “Anyugü Josef le rhün bin zunla!” “Gwaritsin so! Ale sikemvu ka gü a-hyu shüti.”