Read Southern Rengma Naga BINZEN 48 Bible Online

BINZEN 48 - Southern Rengma Naga bible

BINZEN 48

¹Tsüsiki a-pvü le hobin nle tse mele Josef ka zoshü. Tsü genyu a-le a-nyu Manasseh lo Efraim au zen Jakob teno ti tse gü.

²Jakob ka a-nyu gü Josef le ashwishü titse ryü kebin rüla zoshü ntsin, a-le a-yhenthyü soryü a-zhü ka dunlo.

³Tson-o Jakob le Josef ka, “Kekvutsin Sunggigü le Kanan kazü nyu Luz ka ayhühyu thyüshü lo jochü pe atsü.

⁴A-le aka, ‘Ale nnyenyu kechon pe ntsüti, tson-o n tsipwen no senye kechon thyüti; lo ale kazü higü pe n tsipwen tsüo anyugun no pe kethonthen anyu hon thyüti.’ ”

⁵Jakob le, “Josef ale hiki keryü mhundyü Ijipt nyu nnyu pe nketsü nnyu peche hvu tsüle ahon le; Efraim lope Manasseh au le anyu Reuben lope Simeon au zen kenme.

⁶Nle nnyu peche kecha binsin yatselo, tsü lope anyu letse kemvui; anyugun le gwen lo nrün tsüle Efraim lo Manasseh ge ryüti.

⁷Njvü Rachel genyu ale hi thyüshü bin nyo. Ale Mesopotamia ki raniryü kejü ka, Kanan kazü nyu Efrath zen nithen kemvu ka a-le sila-o ano anyun gwamvu sale le. Tson-o ano Efrath ki kegü tson teka a-sunla.” (Efrath tsüle hizonka Bethlehem tse hü.)

⁸Jakob le, Josef nyuhvu hyushüo, “Hile dikipon nyu ola?” tson ketsoshü.

⁹Josef le, “Hihvu hile Sunggigü le hiki Ijipt ki pe aketsü anyu,” tsonshü. Jakob le, “Zen aki ryülo, ale jochü pe au tsü tile.”

¹⁰Jakob le püshü kela genyu a-yhütyü zenla, tson-o ale tha hyu petsü mvula. Josef le au zenryü a-kishü lo a-le au gwenlo njüo au nboshü.

¹¹Tson-o Jakob le Josef ka, “Ale n hyuni kelo rüchün bin mvu laryü ntsoka we Sunggigü le ano nnyue hyu laso.”

¹²Tsüselo Josef le a-pvü din ka au zen lola-o a-mhundyü nyu nkhün tsügü kazü rün shü.

¹³Josef le Efraim pe Jakob ngwazin lo Manassehh pe a-nzhü zin tse shüshü.

¹⁴Ai Jakob le a-ben kerio, a-ben nzhüzin pe Efraim le nche güe tsügü pe gü shü, lo a-ben ngwazin pe a-püshü gü Manasseh pe gü shülo.

¹⁵Tson-o jochü pe Josef tsüo: “A pvü Abraham lo Isak le a-lothyü kehü Sunggigü no jochü pe ponyu hihvu tsü nda! Nthu keti atsontsin keryü Sunggigü no jochü pe au tsülo!

¹⁶Kenjün kethyü aphu nyu, akeni keshü tsanggelonyu gü no jochü pe au tsülo! A zan, apvü Abraham lo Isak zan no ponyu hihvu ge rhün hü lo nda! Au no ntsenyu kechon lo au tsipwen no bin lolo!”

¹⁷Josef le a-pvü le a-ben nzhüzin pe Efraim pe ge shü kebin hyushüo a-kenyümvula; tsügenyu a-le Efraim pe ge shükebin a-pvü ben khikela pe Manasseh pe ge shü.

¹⁸A-le a-pvü ka, “Tson mvu, apvü. Higü le püshü gü; nben nzhügüpe a-pe ge shülo.”

¹⁹Tsontsin a-pvü le nmvu le tseo, “Ale shabin nle, anyu gü, ale shabin nyo. Manasseh tsipwen ko temi danda nme thyüti. Ai a-sikezen gü le anyeki gon kvuti lo a-tsipwen le senye kedada thyüti.”

²⁰Tson-o tsünyü a-le jochü pe au tsüo, “Israel nyu le jochü pe me ketsü ka hai zan senti. Anyugun le, ‘Sunggigü no nthyü pe Efraim lo Manasseh hontse shülo,’ ” tsonzo hüti. Hihontse Jakob le Efraim pe Manasseh mhundyü shüla.

²¹Jakob le Josef ka, “Ale sigü jü kela nle hyu binnyo, ai Sunggigü le nzen hüti lo nzen nigü nbon nyu kazü gü nyu shüti.

²²N tsasikezen ju mvule, ale Shechem tsüpe ntsü bin nle, lojvü kegwa tsügü tsüle ale jenthon lo levü sen-o Amor nyu hon khilo.”