Read Southern Rengma Naga BINZEN 49 Bible Online

BINZEN 49 - Southern Rengma Naga bible

BINZEN 49

¹Jakob le a-nyu ju koshüo anyugun ka, “Hagun kequenlo, siki nyule hagun ge ryü tiyo ale hagun ka zoshü tile:

²“Ryü kequenlo-o nyülo, Jakob nyu dan. Hagun pvü Israel khwen nyülo lo.

³“Reuben, anyuri gü, nle a kenko Lo arasha keri güle, Anyu aphu dan nyu ketekhotsin lo kenko tsin gü.

⁴Nle zü keda hontse, Ai nle zankechwi tsingü thyü loha so, kechamvule nle npvü thenu zen zhüla Lo npvü zhü rühvumvu laso.

⁵“Simeon lo Levi au le tsasikezen. Au le au jenthon sen-o me kenyü kemvu thyü.

⁶Au le kebuo kenthon kethyü ka ale kerhün loha, Nmvue au kekenthon ka ale kengü loha, Au nyukenthün ka temi dushvula Lo keyüthyüo methu tse dan no nyhon la.

⁷Au nyukenthün ge shochün no bin lo, tsüle kenrin kethyü genyu, Lo au nyunkenta le, gwamvu ri kethyü genyu. Israel kazü günyu ale au sükejen lati. Ale a-temi dan no nrenru lati.

⁸“Juda, ntsasikezen ju no nshwe ti. Nno nshwikerüchün nyu gunda teche ti. Ntsasikezen ju no nmhundyü ka nkhün ti.

⁹Judah le shünyho nme hontse, Nyukhu tün lo-o rani a-kü ki ryü, A-min pfü keta-o zhü bin. Temi nme-e a-kevüshü nshvu.

¹⁰Judah le kedathün sen ti, Lo a-tsipwen le kethonthen keda thyü hüti. Senye dan le khajana senryü a-tsüti; Lo a-mhundyü nyu nkhün-o a-jozen ti.

¹¹A-le a-gada nyu pe Vainsha bin ge dyü Vainsha bin kegwa tsin ge. A-le Vainsha zu kenhon nyu a-phi thula.

¹²Vainsha zu tsüpe a-yhütyü nhon ti, Lo Nyüzü ketsü genyu a-hü chonti.

¹³“Zebulun le züda gü khoka yhun ti. A-züdase pe run kensen binnme thyüti. A-terhi no nithen gü Sidon titi.

¹⁴“Issachar le gada a-phenu hvu jaka a-minpfü keta kebin nme nyeki gwa kvu mvu.

¹⁵Ai a-le kerüyü bin gü tsüle gwa kethyü Lo kazü gü tsüle nkenyüsa kethyü hyu shü. Tsügenyu a-le khvügü pfütitse a-sen pfü keneshü, Lo a-no do nme hontse a-kemvu thyüo kam thyüti.

¹⁶“Dan le a-temi dan so keda thyüti, Israel tsipwen kecha nyu hontse.

¹⁷Dan le tsonkhoka peri nme, Tson teka peri a-tsei kerhu, Keru pha ndu shü, Tson-o a-ge dun kebin gü kewhenshe pe sizin shüla kehü gütsü thyüti.

¹⁸“Ale nle kenikeshü khwebin nle, Npugü.

¹⁹“Mehon seketyünyu dan me le Gad whenti, Ai a-le rani gü anyugun hü ti.

²⁰“Asher kazü le ketyüketsü kechon nyhun shüti. A-le raja nyu ketyüketsü thyülo kegwa khishü ti.

²¹“Naftali le thyüzhie a-kenda thyü tin kehü nme, A-le a-nyu shwi nkenyü ho tse kethyü zen hü.

²²“Josef le zü kepün bin nme khoka tehen hon gada hontse, Rincho nme khoka tehen thyünyu nme hontse.

²³A-shwikerüchün nyu le a-jvü gwamvu sa tse a-when, A-nyugun levü lo tho sen-o a-hü.

²⁴Ai a-levü le nnu shümvu, Kekvutsin Jakob Sunggigü, Israel kekhwen lo kentsen gü kekvu nyu a-bu thyü nko shüla.

²⁵Npvü Jakob Sunggigü le nche kehügü, Jochü pe ntsü kehü kekvutsin Sunggigü, Tesoki jochü tsangri shü Lo kazü hensin ki jochü zü khishü kehü gü, Senru lo ntsenyu kechon jochü pe ntsü lo.

²⁶Shye lo nyekepun jochü dan, Ndukanyu kazüthun jochü dan Kethonthen bin kehü rincho dan ge nkenyü ho kethyü dan, Jochü hidan hino Josef pe ge bin lo nda, A-tsasikezen ju zen kekho kela gü ge.

²⁷“Benjamin le teken nme hontse. Lonyü lo ngwen gü-e a-le tün lo tyüti.”

²⁸Hidan hile Israel tsipwen tseryü kenyhun ju, lo anyugun pvü le anyu zen kekha gü kejü ka zope anyugun nmeme tsü keshü.

²⁹Tson-o Jakob le anyu dan zen tenge tseo, “Ale sio atemi dan zen kengü güla tiso, a lope Hitnyu temi gü Efron lownyu tsokü katsü apvü zen-o sunla nye,

³⁰Kanan kazü nyu Mamre nphozin Makpelah ka. Abraham le sika thyü nrün genyu Efron ka tsokü lo lobu higü heilo.

³¹Bin tsüka anyugun le Abraham lo a-nu Sarah au sun; bin tsünyu anyugun le Isak lo a-nu Rebeka au sun; lo tsüka ale Leah pe sun le.

³²Lowbu tsü lo anyu kebin tsokü tse Hitnyu temi dan ka heilo. Tsüka asun nye.”

³³Jakob le anyudan ka jozo thüshüo, zhüni tsülo njüo sila.