Read Southern Rengma Naga BINZEN 50 Bible Online

BINZEN 50 - Southern Rengma Naga bible

BINZEN 50

¹Josef le a-pvü soge chetsü gü chü-o a-nba.

²Tson-o Josef le a-pvü min dawa pe jeh shülo tse ahza hoshü.

³Tsüle jon henzi lola, dawa pe jeh kethyü le tsükho lo lahü. Ijipt nyu le jon hentsenyü a-chechü.

⁴Chekechü gwenkho tsüle güla ntsin, Josef le raja gü hensin kedanyu dan ka, “Hagun cheno-e jo higü sen gü raja gü ti shülo:

⁵Apvü le sigü kejü ka, ano akhipe Kanan kazü ki a-le nda kenjü sika günyu sun titse ajo hoshü njün nyo. Tsügenyu ano gü apvü sun lalo, tson-o ale rani ryüti.”

⁶Raja güle, “Nle zoshü kenjü hontse, gü npvü sunla lo.”

⁷Tson-o Josef le a-pvü sun titse nsinla. Raja gü hensin kedanyu dan aphu, a-kanyu pelü dan, lo Ijipt nyu sharhinyu dan aphu Josef zen nsin.

⁸A-kaminyu, a-tsasikezen nyu, lo a-pvü kami kechanyu dan aphu a-zen nsin. Anyugun nyenyu keshen dan, lo anyugun tanyü, tenyü lo methu dan nti Goshen lojvü nyu kebin gwenzin.

⁹Temi le kerugari lo keru ge dun-o a-zen nsin: tsüle danda nme thyü nsin.

¹⁰Anyugun le ryüo Jordan nphozin Atad ka shye kenyu bin tilo ntsin gwenkho kethon chyechü tetso shü, lo Josef le jon tsenyü chyekechü jvü dan thyüshü.

¹¹Kanan nyu keyhun nyu dan le temi tsüdan le Atad ka chyechü kebin hyushüo, “Ijipt nyu dan le me chyekechüjvü kentsun dihontse kethyü senhü nla hile, tsezo!” Tsügenyu bin gü zan pe Abel-Mizraim tse thola.

¹²Jakob nyu jule a-le anyugun ka zokeshü hontse thyüshü;

¹³anyugun le a-min pen gun gü Kanan ki Abraham le sika bin thyü titse-o Hitnyu temi gü Efron lobu hei kelo Mamre npho zin Makpelah ka tsokü günyu sunla.

¹⁴Josef le a-pvü sun kela siki, a-tsasikezen ju lo kesigü kesun genyu a-zen kensin dan aphu zen-o Ijipt ki rano ryüla.

¹⁵Anyugun pvü kesi siki a-tsasikezen ju le, “Josef le ngun shwi ntsüo ngun le a-ge a-zükemvu thyü kenjün tsü aphu kethun nititse nda bin yatselo dihontse mon?”

¹⁶Tson-o anyugun le nme nipe Josef ki shüo: “Ngun pvüle a-kesi mhundyü,

¹⁷agun no, ‘Ntsanyu ju le nge a-zükemvu thyü kenjü tsü jüpe tsülo tse hilo lotse shüle.’ Tsügenyu agun npvü Sunggigü gonyu dan le nge a-zükemvu thyükela dan tsü jü pe agun tsülo,” tsonshü. Josef le lesü higü hyulo njüo chü sola.

¹⁸Lo a-tsanyu ju le anyu npfü ryü a-mhundyü nyu nkhün-o. “A-ka, agun ngo dan le hika nmhundyü nyu ryü bin nle; ” tsonshü.

¹⁹Ai Josef le anyugun ka, “Nshvu nyalo; ale anpfü a lope Sunggigü bin ka shü keloimvu.

²⁰Hagun le age thagwakemvu rhila, ai Sunggigü le tsü kelu pe kegwa thyüla, tsühontse keshü genyu nthu temi kechon keyhun kenishü bin nyo.

²¹Hagun le thame kenshvui ndi. Ale hagun lo hagun nyenyu dan nucha loti.” Tson-o a-le a-jo bwenye tseo anyugun nyun thyü nbwe shü.

²²Josef le a-pvü kaminyu zen-o Ijipt nyu yhun; a-le chen tsio tseryü yhun.

²³A-le Efraim nyenyu lo tsüdan nyenyu hyuo si. Manasseh nyu gü Makir nyenyu ko Josef phanyu nda hü.

²⁴A-le a-tsasikezen ju ka, “Ale sigüzhü laso, ai Sunggigü le hagun nucha lo hagun tsonri gü A-le swen-o Abraham, Isak lo Jakob ka zoshü kenjü kazü günyu shü lo tsentsü.”

²⁵Tson-o Josef le a-temi dan no keswe nme thyü. “Sunggigü le hagun tsonri-o kazü tsügü nyu kegun ka, hagun le amin khi loti tse amhundyü ka swe lalo,” tsonshü.

²⁶Josef le a-keyhun chen tsio tseryü ka Ijipt nyu sila. Anyugun le dawa pe a-min jeh la-o pe sikhin nme ka shüla.