Read Southern Rengma Naga BINZEN 6 Bible Online

BINZEN 6 - Southern Rengma Naga bible

BINZEN 6

¹Temi le chonkenye pe kazü aphu kesü thyü lola, lo tenunyu nnyu pe a-nyugun tsüshü,

²tsontsin Sunggigü nyenyu dan le temi nyugi dan kezegwa hyu shüo, anyu kenyü nyu lope anyugun nu thyü lola.

³Tsüselo Npugü le, zo, “A kapu no kethonthen temi ge bin loha, a-le sikelai genyu. Ntsoka gerhonyu anyugun no che 120 nyesin yhun loha.”

⁴Tsügwenkho ka lo tsüsiki-e temi thungin le kazü nyu yhun hü tsüdan tsüle Sunggigü nyenyu dan le temi nyugi kelo tsipwen dan. Tsüdan tsüle nduka a-zan chwi kehü lo kekvu nyu dan.

⁵Npugü le kazü nyu temi le serimvu ritsin kela lo anyugun le thagwakemvu nti rüchün zin tinkela hyula,

⁶Tson-o Npugü le temi thyü pe kazü nyu keshü genyu rünyumvu la. A-le a-nyun gwamvu sala.

⁷Tson-o Npugü le, “Ale kazü soge ale nyhun keshü temi hi nke lati, lo nyukhu lo tegü dan-e sin-o nke lati, kechamvule ale anyugun thyüshüo rünyu mvu kela genyu.”

⁸Ai Npugü le Noah shwi a-kenyü lo.

⁹Hidan hile Noah tsipwen dan. Noah le temi kemitsin a-shenhe ka meno a-nmu lo kehanyu nme; Noah le Sunggigü zen kepfüshe hü.

¹⁰Lo Noah le a-nyu peche mishen le bin, Shem, Ham lo Jafet.

¹¹Temi nmeme tse kethyü Sunggigü mhundyü nyu gwamvula, lo kega keseri kethyü le kazü kesü thyüla.

¹²Sunggigü le kazü gü nri keshüka, tsüle gwamvu kela hyulo, kechagenyu mvule temi le aphu serikemvu nyu yhun kebin genyu.

¹³Tson-o Sunggigü le Noah ka, “Ale temi aphu no a-keni thyü la titse rhilo laso. A-nyugun tha gwakemvu le kazü gü kesüthyü kela si genyu ale anyugun nke shü lati.

¹⁴Nle gofer sen pe ngenyu run nme chalo; lo run günyu katsen sathü lo, lo a-nyu zin lo tegwezin kükhin chün pe jeh lalo.

¹⁵Nle hihontse thyülo; run gü kethon no tsu tsishen, kegon no tsu henpvün, ketetso no tsu shenryü thyülo.

¹⁶Run gü a-kesun nme thyülo, kakehü lo kesun gü au ja no tsu me no bin lo. Tsü thyüpe heshen thyülo lo ka khenpvü thyü pe a-tezin shülo.

¹⁷Ale zü nipe kazü soge ndün shüo kerhün ronzin kebin aphu nke lati. Kazü nyu kebin aphu no sila ti.

¹⁸Ai ale nzen-o kejozen kelo nme thyü shüti. Nle, nnu, nnyupeche dan lo anyugun nunyu tse run günyu yü loti.

¹⁹Lo nle kerhün ronzin kebin nyunkhu lihi-e peche nme lo tenu nme tse kenyhun yhun senryü run günyu shülo, tsüno nzen-o simvu bin lo nrün genyu.

²⁰Tegü, nyukhu lo kazünyu npvü kehü lihi-e kechacha kethyü kenyhun yhun n no ntsen pe rhün bin nrün genyu nki ryüti.

²¹Lo hagun genyu lo anyugun genyu ko tse tyükehü chvü lihi-e kequenlo.”

²²Noah le Sunggigü le a-ka zokeshü hontse tsü aphu thyülo.