Read Southern Rengma Naga BINZEN 7 Bible Online

BINZEN 7 - Southern Rengma Naga bible

BINZEN 7

¹Npugü le Noah ka, “Nkaminyu aphu zen-o run günyu yülo; kazü aphu nyu nyu le njü yo tsü thyü kehü le n nti le kebin ale hyu lo laso.

²Nyukhu kenshün dan aphu peche nme lo tenu nme tse benshan tsenyünyü zenlo, ai nyukhu nshün kemvu dan we peche nme tenu nme tse benshan nme me zenlo.

³Tegü ko kecha cha kethyü benshan tsenyü zenlo. Tson-o nyukhu lo tegü lihi-e no rhün bin-o chwükenyeni pe kazü günyu shülo nrün genyu.

⁴Jon tsenyü siki ale n yhun keshü kerhün ronzin kebin aphu nke la nrün genyu ale tsangkenri nishüti, tsüle keben jon henzi lo kezün jon henzi nriti.”

⁵Tson-o Noah le Npugü le aka zokeshü dan aphu thyülo.

⁶Zükemihen le kazü so keryü tsüle Noah le a-keyhun chen tsi tsero la.

⁷Noah, a-nu, a-nyudan lo a-nyudan nunyu le zükemihen nrhilo titse run günyu yüla.

⁸Nyukhu lo tegü kenshün lo nshün kemvu metse lihi-e peche nme lo tenu nme tse,

⁹Sunggigü le zokeshü hontse Noah zen-o run günyu yüla.

¹⁰Tson-o jon tsenyü siki Zükemihen le kazü so ryü.

¹¹Noah keyhun che tsitsero, shyehvu gü, jonryüo tsenyü nyü, Zükepen kü aphu nyu zü le nthün chwiryü la lo tsangge zü dan khinshe shüla.

¹²Tson-o keben jon henzi lo kezün jon henzi tsangrio kazü günyu tsüryü la.

¹³Tsünyü Noah lo a-nyu Shem, Ham, Jafet, Noah nu lo a-nyu dan nu tse le run günyu yüla.

¹⁴Lo nyukhu kechacha lihi-e, senru lo tehen thyü keda keshe lo tegü lihi-e a-nyu gun sin-o yüla.

¹⁵Rhünkehü lihi-e peche nme lo tenu nme me tse Noah zen-o run günyu yüla,

¹⁶Sunggigü le a-nyugun ka zokeshü hontse. Tsüselo Sunggigü le kakhin shü la.

¹⁷Zükemihen le jon henzi kazü gü so binla; tson-o zü güle chonkenye kü ryüo run gü penso pe kazü so shü lola.

¹⁸Zü gü le ntsun ketsintsin tse-o run gü chün sen züso phun tinla.

¹⁹Tsüle ntsun pe kazüthun dan ketetso tsin gü so-e küla;

²⁰tsü le kazüthun soki tsu tseryü pvün küla.

²¹Tson-o kazü so kehü thyü-tegü, nyukhu-nyuru lo temi-e aphu sila.

²²Kazü kesin nyu yhunkehü kehen teshe kebin lihi-e sila.

²³Npugü le kazü so kehü kerhün ronzin kebin-temi, nyukhu lo tegü aphu nkela. Nsen kelo le Noah lo a-zen-o run günyu yü kelo dan nti.

²⁴Zü gü le jon tsio henpvün semvu tse kazü so bin la.