Read Southern Rengma Naga BINZEN 8 Bible Online

BINZEN 8 - Southern Rengma Naga bible

BINZEN 8

¹Sunggigü le Noah lo a-zen-o run günyu kebin nyukhu dan aphu nmhin lamvu: a-le tsangkenbu thyü pe no nbu shü, tsontsin zü güle se tsüla.

²Kazü hensin ki zükepen dan lo tsangge zü dan khinla. Tsüsika tsangri mvula;

³jon tsio henpvün jaka zü le a-shvu thyü tsüla.

⁴Tson-o she tsenyü gü jonryüo tsenyü karun gü le ryüo Ararat kazüthun ge sunlo.

⁵Zü gü le sekenye tsügü she tseryü gü jonkeri nyü kazüthun ra dan hyuchwiryü.

⁶Jon henzi siki Noah le kafüphe nme khinshe shü,

⁷tson-o tegvü nme nishwi shü. Tsü le rani ryümvula, ai zü güle se lo kemvuthen nye nsin nshe bin.

⁸Tsüsiki a-le kazüso zü le rhola sele nmvuyo sha shü titseo nsu nme nishü,

⁹ai zü le kazü aphu hen bin zun kethyü genyu, nsu gü le dun lo kegwa bin fü kendila. Tson-o tsü le nye-o run gü ki rani ryüla, tsontsin Noah le a-ben ketape tsügü khi nipe run gü nyu shü lola.

¹⁰Tsüsiki jontsenyü bin tseo a-le nsu gü ni nishü.

¹¹Tsontsin ngwün ki nsu gü le oliv nyü kerhün nme ndu pen-o a-ki rani ryü. Tsü ka Noah le zü le se tsükela shala.

¹²A-le Jontsenyü khwe nitseo nsu gü ni nishü, higü ka we tsü le rani ryü mvula.

¹³Noah keyhun chen tsitsero-o nme ka she keri gü jon keri nyü zü le sela. Noah le run gü kehen rholao lizin hizin shwi keshü ka kazü le sin bin kela hyulo.

¹⁴She hvu gü jon nkio tsenyü ka kazü güle sinshü lola,.

¹⁵Sunggigü le Noah ka zoshü.

¹⁶“Nnu, nnyu lo a-nyugun nunyu dan zen-o run günyu chwi lalo.

¹⁷Tegü lo nyukhu dan aphu zen chwilo, tson-o anyugun no chvükenye pe kazü aphu kesü thyü gun lo nrün genyu.”

¹⁸Tson-o Noah le a-nu, a-nyudan lo a-nyu gun nyenyu dan zen-o run gü nyu chwila.

¹⁹Nyukhu lo tegü dan aphu a-kami a-dan thyüo run gü nyu chwila.

²⁰Noah le Npugü kershvu bin nme thyülo; tson-o a-le nyukhu lo tegü kenshün dan dan nyu nme me khilo-o kershvu bin gü ge rope kershvu thyüshü.

²¹Tsontsin Npugü le rope kershvu thyü keshü rün kegwa gü shalo-o, a-npfü a-nthon-o, “Ale temi tho genyu thame ka-e keswekesü pe kazü gü ge shüni lo hoso; temi le ntsenyu kanyu a-kerüchün le gwamvu tse kethyü ale sha bin nyo. Ale nthu gwen thyükeshü hihontse kerhün ronzin kebin aphu nke nila lo haso.

²²Kazü güle kebin then, ntsikeshü lo gvükelo. Kekun lo keyün, ntsükerin lo kenda, keben lo kezün no ndila loha.”