Read Southern Rengma Naga BINZEN 9 Bible Online

BINZEN 9 - Southern Rengma Naga bible

BINZEN 9

¹Sunggigü le jochü pe Noah lo a-nyenyu dan tsüo, a-nyugun ka, “Yhunchvülo, tson-o hagun tsipwen no kazü aphu nyu yhun lolo.

²Nyukhu, tegü lo tsehü aphu no hagun nshvuo yhunti. A-nyugun aphu khipe nkekvu hensin shü laso.

³Tsüdan-e lo tehen kenjvü-e nle tyü logwa: No nchvü thyü lotse ale tsüdan aphu pe ntsü laso.

⁴Thakon me tsüle thyü a-zi le kebin pe a-thyü kesin-o tyünya; keyhun ronzin güle a-zi ka kebin genyu ale nno tsü tyü nya lotse shü.

⁵Ligü higü temi keyhun ronzin lo laya tselo, shaja pe a-tsüti. Nyukhu ligü higü-e temi keyhun ronzin lokela gü ale kesi shaja pe tsüti.

⁶Temi ligü higü temi dushvu yatselo, temi no a-dushvu lati, Sunggigü le a-npfü a-hontse kethyü temi thyü keshü genyu.

⁷“Nle yhunchvülo mvu loshvu, tson-o ntsipwen no kazü aphu nyu yhun lolo.”

⁸Sunggigü le Noah lo a-nyudan ka zo,

⁹“Hire, ale hagun lo hagun tsipwen zen-o ntsoka kejozen bin nyo,

¹⁰lo yhun kehü aphu tegü, lo nyukhu aphu, nzen-o run günyu chwiryü kelo lihi-e.

¹¹Ale jo hidan pe hagun zen kejozen bin nle: Zü Kemihen no yhunkehü dan aphu nke nila loha; zükemihen no thame ka-e kazü gü nke nila loho.

¹²Ale hagun lo yhun kehü aphu zen kethonthen kejozenlo kela higü zansü,

¹³Ale a levü pe nmhuge shüshü bin nle. Tsü pe ale kazü gü zen-o kejozenkelo zansü gü thyüti.

¹⁴Ale nmhu pe kazü gü henshü lo zengo le chwikeryü ka,

¹⁵Ale hagun lo nyukhu dan aphu ka zükemihen no yhun kehü dan aphu nke nila loha tse zokeshü ajo rüchün loti.

¹⁶Zengo le nmhuge chwi keryü ka, ale tsü shwishüo ale lo kazü so yhun kehü aphu jaka kethonthen kejozen kenjü gü rüchün loti.

¹⁷Tson-o Sunggigü le Noah ka, higü hile ale lo kazü so yhun kehü aphu jaka kejozen kela zansü güle,” tsonshü.

¹⁸Noah nyenyu run gü nyu chwikeryü dan le Shem, Ham, lo Jafet. (Ham le Kanan a-pvü gü.)

¹⁹Noah nyenyu mishen dan hile kazü so ge kebin temi aphu bon dan.

²⁰Noah le loketsü nyu nme, lo a-le vainsha lotsü keritsin gü.

²¹A-le vainsha zu tsülo njio nzünla, tson-o a-phinya ben nya mvutse a-phi ka nyu hü.

²²Tsüka Kanan apvü Ham le a-pvü le kenben kehü hyushüo chwigü a-tsa hvuka zoshü.

²³Tsontsin Shem lo Jafet au le phi nme pe au buthun ge shülo-o, sizin tesen yügü au pvü le kenben kehü tsü henshü; au le rani kebin genyu au pvü le kenben kehü tsü hyumvu.

²⁴Noah le ntsen soryü kelo siki a-nyu nchegü le a-ge dihontse thyü shü yo shalo,

²⁵tson-o a-le zo, “Kanan no keswekesü pfü lalo! A-no a-tsa hvu go thyüti.

²⁶Npugü a Sunggigü no jochü pe Shem tsülo! lo Kanan no a-go thyülo.

²⁷Sunggigü no Jafet thyü pe chonkenye shülo! A-tsipwen no Shem temi dan zen-o yhunlo! Lo Kanan no a-go thyülo.”

²⁸Zükemihen siki Noah le chen 350 yhun lo

²⁹tson-o chen 950 ka sila.