Read Southern Rengma Naga 2 SAMUEL 1 Bible Online

2 SAMUEL 1 - Southern Rengma Naga bible

2 SAMUEL 1

¹Saul kesi siki David le Amelek nyu sokvu lo-o ryü Ziklag ka jon hvu binlo.

²Tsüsinyü selo nme le Saul kensenbin ki bin-o ryü. A-nyun gwakemvu zansü a-phi sürhen lo nnyo pe a-pe ge shü pfü hü. A-le David ki gü nkhün tsügü a-kelushü.

³David le, “Nle dikipon ryüla?” tse a-ketsoshü. Tsontsin a-le, “Ale Israel nyu kensenbin nyu tinchwi lole,” tsonshü.

⁴David le a-ka zoshü, “Dihontse layo aka zoshü lo.” A-le zoshü, “Ngun rihü dan le teribin nyu tinla, tson-o ngun temi kechon gala. Lo Saul lo a-nyu gü Jonathan au ko ga laso.”

⁵David le ketsoshü, “Dihontse nle Saul lo Jonathan au le sila so tse kethyü sha lola?”

⁶A-le zoshü, “Ale Gilboa kazüthun ka bin laryü Saul le a-npvü a-mi ge yhe pfü bin lo shwikerüchün nyu kerugari lo keru ge temi dan le a-kho nni ryüla.”

⁷Tsüselo a-le rani ryü ahyulo-o akoshü. Tsüselo ale, “Kedagü,” tseo khinshü.

⁸A-le ale dikipon nyu yo tse aketso shü laryü, ale Amelek nyule tse a-ka zoshü.

⁹Tsontsin a-le aka, “Ryü a ga lalo! Ale jünsa lao sigü jü laso.

¹⁰Tsügenyu ale gü a-gala le, a-le chetsü lo lihi thyüe sikelai so tse ale shakela genyu. Tson-o ale a-pe ge raja perün lo a-günkesun tse sen nkiryü bin nle, kedagü,” tsonshü.

¹¹Tsüselo David le anyugwa mvuo a-phi sürhen la lo a-temi dan aphu tson küla.

¹²Anyugun le Saul lo Jonathan au lo Npugü temi Israel nyu kechon ga kela genyu anyugun nyun gwamvuo chechü lo tyütsü mvubin-o ngwen güti.

¹³David le jolo sen a-ki keryü selo güka, “Nle dikipon nyu la?” tse ketsoshü. A-le zoshü, “Ale Amelek nyu le ai ale nkazü nyu yhun hü nle.”

¹⁴David le, “Dihontse nle Npugü le kejükelo raja ga nshvu mvuo a-dushvula la?” tse ketsoshü.

¹⁵Tson-o David le a-temi nme koshüo, “A-ga la lo,” tse zoshü. Temi tsü gü le Amelek nyu gü dushvula,

¹⁶David le Amelek nyu gü ka zoshü, “Hile n npvü nge. Nle Npugü le kejükelo raja gü gala letse kela n npvü n nmu laso.”

¹⁷David le lühi ron-o Saul lo a-nyu gü Jonathan au chechü,

¹⁸lo tsüpe Juda temi dan senthyü shü lotse ahza hoshü.(Tsüle Jashar lesü nyu thu njü.)

¹⁹“Israel nyu rincho ge ngun nyu le sila! Ngun shüpahü kepeche tsin dan le chela!

²⁰“Tsü pe Gath nyu nmvue Ashkelon tsonda nyu zo nya. Filistian nyu tenunyu dan le a-kenyüla loshvu; a-girü kemvu nyugi dan no a-sherhün nya.

²¹“Gilboa rincho ge tsangri nmvue khezü no chetsüryü nya nda; tsünyu lowbu dan ka a-zintse tha no tsüyhun nya nda! Kepeche dan gida le tsünyu chepe keja kepfü thyü kebin genyu; terzü pe Saul gida shonsin lo hoso.

²²“Jonathan tholevü ge kesi le bin, Saul zhethon le shwi kenjün ndi, kekvu gü dushe, shwikerüchün nyu dushvu lahü.

²³“Saul lo Jonathan, ndunthyü lo keso sahü; kerhün nyu kengü, kesinyu kengü; logi nyeki nmhe lo shünyho nyeki nko.

²⁴“Israel nyu tenunyu dan le Saul chechü! A-le phinya kemeren pe hagun nben lo tsomin ketsen lo suna pe hagun nthyü njwen shü hü.

²⁵“Shüpahü kepeche dan le che laso, terinyu anyugun dushvu laso. Jonathan le rincho ki sibin nyo.

²⁶“Ale ngenyu anyugwamvu bin nle, atsagü Jonathan; nle ditsüki thyü aso yo! Nle a keso le ditsüki ndun thyüla, tenunyu keso nyeki gwa kvule.

²⁷“Shüpahü kepeche dan le chela, anyugun terikanyü khe lalo a-kon kendi thyü laso.”