Read Southern Rengma Naga 2 SAMUEL 12 Bible Online

2 SAMUEL 12 - Southern Rengma Naga bible

2 SAMUEL 12

¹Npugü le sidyükesha gü Nathan nipe David kishü. Nathan le gü a-ka zoshü, “Temi mihvu le rünyi nme ka yhun hü; nme le nnya lo kecha gü we kendinyu.

²Kenya gü le methu lo tanyü kechon le bin,

³ai kendi gü we a-le hei kelo tanyü nyu nme nti le bin. A-le tsü nucha pe no a-ka nyu a-nyenyu ju zen yhun bin. A-le a-npvü a-chvü peha pe tsü ginthyü, tsü no a-honpen ka tsü, lo a-din ge pen hü. Tanyü nyugü tsüle a-nyugi hontse hü.

⁴Khenyüme tesin nme le kenya gü kanyu ryü. Tsüka kanya gü le a-npvü a-senru nme dushvu pe tsügü ketyüketsü ndo tepen la; tson-o a-le kendinyu gü tanyü tsü khipe bon nipe a-sin gü tsüla le,” tsonshü.

⁵David le kenya gü ge a-nyunta sao zoshü, “Ale rhün kehü Sunggigü zan nyu swe bin nle, hihontse keshü temi gü tsüle sila zü!

⁶Tha gwakemvu tsühontse thyü kela genyu a-no a-le khilo kela tsü jünzi pe tho mvu loshvu.”

⁷Tsontsin Nathan le David ka zoshü, “Temi tsügü tsüle nle le.” Tsügenyu Npugü Israel nyu Sunggigü le zohü nle, “Ale nkhipe Israel nyu raja thyüshü lo Saul ben nyu nkenishwi shü.

⁸Ale a-rajaphen lo a-nu dan pe ntsü; ale nlope Israel nyu lo Juda so raja thyüshü. Hile rhori yatselo ale tsü jünhvu pe ntsü nrün.

⁹Tsonlo nyuthyüo nle a johokeshü zen mvula? Nle nyuthyüo thagwakemvu hi thyü hü nla? Nle Uriah no terinyu sila; nle Ammon nyu no a-ga lao a-nu zen lola!

¹⁰Nle a jozen mvula lo Uriah nu selo kela genyu ntsoka gerho shenhe aphu nyu ntsipwen peha no teshü thyü siti.

¹¹Ale swe bin nle, ale n npvü nkakhwün nyu temi peha no kekevü senryü nge shüti. Ale nben nyu nnu nyu dan khilo-o pe kechanyu tsükela nle hyuti, tson-o a-le nhen nyu anyugun zen zhü ti.

¹²Nle kekebu ki kemu thyüla, ai Israel nyu aphu no hyu nrün genyu ale nhennyu thyü shüti.”

¹³David le zoshü, “Ale kemu thyü pe Npugü ntsun laso.” Nathan le a-jokenishü, “Npugü le nkemu jüshü bin nle, nle sila loho.

¹⁴Ai nle hihontse thyüo Npugü kenshwe tho thyü kela genyu nnyu gü no sila ti.”

¹⁵Tson-o Nathan le kaki gunla. Npugü le Uriah nu no nnyu pe David ketsü nyugü no hosa lola.

¹⁶Nyugü no ponla lotse David le Sunggigü ka kehi thyü. A-le thame tyümvula lo khejetse a-katsen nyu yügü khensin kazü nyu yhon bin hü.

¹⁷A-kanyu kedanyu jule gü a-pen soshü titse ai a-le nmvu lo anyugun zen thame tyütsü mvu.

¹⁸Tson tseo jon tsenyü nyü nyu gü le sila. Lo David hensin kedanyu jule tsü rüla pe a-ka zo nshvu bin. Anyugun le, “Nyu gü le rhün kebin kanyu a-le ngun nthomvu laso. Tsonlo nyu gü le sila sele tse dihontse a-ka so mon? A-le anyunkenjün thyüo a-nthyü nnyü la logwa le!”

¹⁹Ai anyugun le khinyu nyu kegwün kebin nyülo njüo nyugü le sila so tse kethyü a-le sha lola. Tsügenyu a-le, “Ntsenyu gü le sila se ole?” tse anyugun ketsoshü. Tsontsin anyugun le, “Ele, a-le si laso,” tse a-ka zoshü.

²⁰Tsüselo David le so gü zülu la, a-pe sülo lo aphinya kelu lo. Tson-o gü Npugü kanyu güo rüshvushü.Tsüselo rani a-kaki ryüo ketyüketsü hishüo khishü ntsin tyü lola.

²¹A-hensin ka kedanyu jule, “Agun le hi a-kon sha lomvu laso,” tson zoshü. “Ntsenyu gü le rhün kebin ka nle chüo tyütsü mvu la; ai a-le sila ntsin nle soryü tyütsü lo kela hi so!”

²²David le zoshü, “Ele, a-le rhün kebin ka ale nyen lo chü le. A kerüchün le Npugü le a shwinjün-o ntsenyu gü no simvulo ti ado tseo.

²³Ai ntsoka we a-le si laso, ale nyuthyüo nyen bin semon? Ale a-thyü nrhün nilo gwa ole? Khenyüme ale a-ki güti, ai a-we rani akiryü loho so.”

²⁴Tson-o David le a-nu Bethsheba nyunthyü nbwe shü. A-le gü a-nu zen zhüshü, tson-o tsügi le peche nme nnyushü, lo David le tsügü zan pe Solomon tholo. Npugü le ponyu gü sohü,

²⁵lo Npugü le joho pe sidyükeshagü Nathan tsüshüo ntsenyu gü zan pe Jedidiah tho, Npugü le a-so kehü genyu.

²⁶Joab le Ammon nyida gü Rabbah wheo lolo gü jüla.

²⁷A-le lilo nipe no David ka: “Ale Rabbah wheo tsünyu kegun zü gü lolo la sele tse zoshü.

²⁸Tsügenyu ntsoka nrihü nsen kebin dan ko kequen lo-o gü nyida gü wheo n npvü tsü lolo. Ale tsü lolo letse kethyü zan gütsü lonyü mvule,” tson shü.

²⁹Tson-o David le a-rihü dan ko kequen lo-o gü Rabbah wheo tsü lolo la.

³⁰Ammon nyu tero Molech mekezü pe ge suna raja perün a-kensun le kilogram shenryü pvün lo tsüge tso min ketsen le kebin gütsü David le khi lola. David le tso min ketsen gütsü khipe a-raja perün ge shü lola. A-le nyida tsünyu kanyü kecha ko kechon khi lola

³¹lo tsünyu temi dan zenryüo no senrhe, kati lo nri sen-o thatho thyü lo anyugun kemvu thyü pe no ita thyü. A-le Ammon nyu rünyi kecha dan kono tsühontse thyü. Tson-o David lo a-temi dan le Jerusalem ki rani gunla.