Read Southern Rengma Naga 2 SAMUEL 14 Bible Online

2 SAMUEL 14 - Southern Rengma Naga bible

2 SAMUEL 14

¹Raja David le Absalom nnyü ho kehü Joab le shabin,

²tsügenyu a-le me nipe Tekoa ki tenunyu kelikelu nme kishü. Tsügi le ryü laryü a-le tsügi ka zoshü, “Nle chechü kehü rothyü lo; chekechü phinya benlo, lo npe whe nya. Gwenkho kethon chechü kehü nyu tenunyu nme hontse lo.

³Tson-o raja gü kigü ale nyu zo lotse shüyo tsü zoshü lo.” Tson-o Joab le a-no nyu zo tiyo pe a-ka zoshü.

⁴Tsüselo tenugi le raja kigü, kazü nyu nkhün tsügü a-kelu shüo a-ka zoshü, “Ache shülo, Raja gü!”

⁵Tsontsin raja gü le, “Nle nyu lonyü bin nla?” tse a-ketso shü. A-le, “Kedagü, ale rhokedyü magi nyu nme, a nyepvü le sila so

⁶Lo anyu peche mihvu le bin laryü, khenyüme lowki au kega lola, lo tsüka temi nme-e au khikho kethyü min ndilao nme le kecha gü boshvula le.

⁷Laryü a kaminyu aphu a-ntsun-o ano anyugü pe anyugun ben nyu shüo a-tsagü dushvu kela genyu a-ko a-dushvu lati tse lo laso. Anyugun le a kenrin kenkhin gü nke lao, anyepvü nyu nme-e no bin mvuo a-zan ndi kelai le,” tsonso.

⁸Raja gü le zoshü, “Kaki gun lalo, ale tha tsügü ketsen loti.”

⁹Tsügi le zoshü, “Raja gü, nle lihi thyüshü yatse-e kemu le akami lo age le; nle lo raja kami ge kemu ndi.”

¹⁰Raja gü le a-jokenishü, “Ligü higü nkedün yatselo zen akiryü lo a-le nkevü nimvu lati.”

¹¹Tsügi le zoshü, “Raja gü, ncheno-e Npugü n Sunggigü ka kehi thyü shüo anyu sikela gü khün zoti tse kebin akaminyu no anyu kecha gü boshvu lao kemu gonkvu kethyü thyüla nyalo.” David le a-jokenishü, “Ale rhün kehü Npugü zan nyu zoshwi shü bin nle, nnyu gü nthyü nnyü khe-e loho.”

¹²Tenugi le zoshü, “Ncheno-e Raja gü, ano nka jo konme zosin shüta.” Tsontsin a-le, “Zoshü lo,” tson shü.

¹³Tsügi le a-ka zoshü, “Nle nyuthyüo Sunggigü temi dan ge a-zükemvu tsühontse thyü hü nla? Nle n npvü nnyu tin kela gü no raniryü mvu, tsügenyu ntsoka nle nyu zoshüyo njo le n npvü n nmu laso.

¹⁴Ngun aphu sikelai; ngun hile zü jape kazü nyu shülo kekhwe nilo hü kemvu a-keme. Sunggigüe kesinyu zen niryüo no yhun hümvu, ai raja le tson fü shüo tin kela temi nme zen niryü logwa.

¹⁵Raja gü, ale ntsoka nka zoti tse ryü kebin hile mele a kedün kethyü genyu, tsügenyu ale nka nyu hiyo nle tsü thyüshü titse rüchün-o ryü le.

¹⁶A kerüchün le nle a khwenyü shüo, ale lo anyugü ayi dushvu lao Sunggigü le kazü pe a-temi dan tsükeshü günyu ayi no ndi lati tse kebin nyu ben nyu ayi kenishü ti.

¹⁷Kedagü nle zoshwikeshü jo genyu a kenilo ti, Raja gü le Sunggigü lonyu hontse kegwa keshvu sha kekho lo kegwa le kenbin genyu. N Npugü Sunggigü no nzen hülo!”

¹⁸Raja gü le zoshü, “Ale nka tha nme ketso shü ti, lo nle ketsin apentha aka zomvu loshvu.” Tsontsin tsügi le, “Lihi-e aketso shülo, Raja gü.”

¹⁹A-le tsügi ka, “Joab le nno hi zolo tseshü le?” Tsügi le zoshü, “Ale kenshün nyu swe bin nle, Raja gü, nle ketso keshü tsü zo mvutse nrhi kelo tson ndiso. Ketsin nhensin kedagü Joab le nyuthyü lo nyuzo tiyo pe aka zoshü le.

²⁰Ai tha higü apentha thyü nkolo nrün genyu a-le tsüthyü shüle. Raja gü le nsü pe Sunggigü lonyu gü hontse nyuthyü layo aphu shabin nyo.”

²¹Tsüsiki raja gü le Joab ka zoshü, “Nle nyu nnyü bin yo ale tsü thyüshü titse rhilo laso. Gü selo gü Absalom zen niryü hika shü lalo.”

²²Joab le David mhundyü kazü nyu nkhün tsügü a-rüshvuo zoshü, “Sunggigü no jochü pe ntsülo, Raja gü! Nle a kehi thyü pe atsü kela genyu, ntsoka we nle a shwi nkenyü hü tse ale shalo laso.”

²³Tson-o a-le so-o Geshur kigü Absalom zen niryü Jerusalem nyu shüla.

²⁴Tson yatse-e raja gü le Absalom no raja kanyu bin loho tse ahza shüla. Raja gü le zoshü, “Ale a-hyu nyümvu.” Absalom le a-npvü a-kanyu bin lo raja gü mhundyü ka ryü hümvu.

²⁵Israel nyu dan nyu temi nme-e Absalom hontse mele a-kezegwa shwe kehü ndi; a-pe ka tsügü a-pha keti tetsin nme-e ndi.

²⁶A-shün le chonsa, tsüle thon lo nsuri lalo chenme ka gwengwa tse lahü. Tsüle raja nyu le kensu sükehü kilogram kenyhun kela lahü.

²⁷Absalom le a-nyu peche mishen lo tenunyu zegwasa kethyü a-zan le Tamar tse kethyü nme le bin.

²⁸Absalom le raja gü hyu mvutse chenshen Jerusalem nyu bin.

²⁹Tsüselo a-le Joab no a-genyu raja gü ki gü lotse hi titseo me nipe Joab koshü, ai Joab le ryü mvula. Absalom le meni nishü laryü Joab le ryü mvu letse la.

³⁰Tsügenyu Absalom le a-gonyu juka zoshü, “Shwishü Joab ayi low le kejvü bin nyo, lo barley le tsünyu yhun bin. Gü tsü ro lalo.” Tson-o anyugun le gü low tsü roshü.

³¹Tsüselo Joab le Absalom kaki gü, “Nyuthyüo ngonyu ju le alow ro lala?” tse ketsoshü.

³²Absalom le zoshü, “Ale menishü-e nle ryükemvu genyu le. Ale nno raja gü kigü agenyu tha ketso nyü bin nle: ‘Ale nyuthyüo Geshur kheo hiki ryüla? Tsüki kebin le agenyu gwakvu nrün.’ ” Tson-o Absalom le, “Ale raja gü teno nrün nno ndoshü nyü bin nle, lo ale mu bin yatselo a-no adushvu lalo.”

³³Tson-o Joab le raja David ki gü Absalom le nyu zoyo pe zoshü. Tsüselo Raja gü le Absalom koshü, a-le gü raja gü mhundyü nyu kazü ka nkhün rün tsüla. Raja gü le a-zenlo-o a-nboshü.