Read Southern Rengma Naga 2 SAMUEL 15 Bible Online

2 SAMUEL 15 - Southern Rengma Naga bible

2 SAMUEL 15

¹Tsüsiki Absalom le terigari nme lo keru dan lo mhundyü keri temi henpvün ndolo.

²A-le lonyü nshwe so-o gü nyida gü khinrun ka tsonda nyu so bin hü. Tson-o lihi gwenkho ka-e mele raja gü no jokera thüshü titse ryülo, Absalom le koshüo, a-le dikipon nyuyo ketsoshü. Temi gü le a-le tsipwen digü kanyu yo a-ka zoshülo,

³Absalom le, “Nle njü bin nle, ai raja gü le temi nme-e kejü shüo no njo nyükeshü min kendi le.”

⁴Lo a-le zosin-o, “Ale kerathü nyu nme thyü kethyü we ligü higü kekevü le bin nmvue a-kenjü le bin-o akiryülo ale kenjü ka pen pe tsü shü nrün.”

⁵Tson-o temi le ryü a-kelushü lo, Absalom le a-sülo njüo nboshü tsehü.

⁶Absalom le Israel nyu ligü higü raja gü no jo pen shü lotse keryü nyu ge tson-o anyugun so pfü lola.

⁷Chenzi siki Absalom le Raja David ka zoshü, “Kedagü, ano Hebron ki gü ale Npugü ka zoshwishü kenjü gü thyü lota.

⁸Ale Siria nyu Geshur ki yhun kehü ka ale Npugü ka a-le azen nigü Jerusalem nyu shü yatselo ale Hebron nyu a-rüshvu ti tse zoshwi shü njü nle.”

⁹Tsontsin Raja gü le zoshü, “Kegwathyü gülo.” Tson-o Absalom le Hebron ki gü.

¹⁰Ai a-le lilo nipe Israel nyu tsipwen aphu ka, “Hagun le shu kekhun nyü lolo, ‘Absalom le Hebron ka raja thyü laso!’ ” tse sen shülo tse shü.

¹¹Absalom le ko keshü genyu Jerusalem nyu temi tsihvu le a-zen gü; anyugun le a-le tedo rhikebin shamvu tse a-tenyen n gwa-o gü.

¹²A-le kerüshvu thyü kebin ka, Absalom le me nipe Gilo rünyi nyu Ahithophel kishü, tsügü le David tsontsin nyu nme. Raja gü kentsun le nko kenye lola, lo Absalom sikethen le chon ketsintsin soryü la.

¹³Lilo nme le ryü David ka, “Israel nyu le anyugun nyun pe Absalom tsü bin laso,” tse zoshü.

¹⁴Tsügenyu David le Jerusalem nyu a-zen kebin a-hensin kedanyu aphu ka zoshü, “Ngun le Absalom ben nyu tinchwilo tiya tselo whütse tinla mvulo shvuso! Whütse! Nmvulo, a-le hika gwen tseryü ngun sokvu lao nyida higünyu temi aphu dushvu lati!”

¹⁵Anyugun le zoshü, “Ele, Raja gü, nle nyu zoyo agun le tsüthyü titse ndo bin nle.”

¹⁶Tson-o raja gü le a-thenu mi tseryü no raja ka gü shwi lotse khela lo a-kami aphu lo a-hensin kedanyu ju tse zen-o tinla.

¹⁷Raja gü lo a-temi dan aphu nyida gü nken tin kejü ka anyugun le ka kenkhin tsin gü ka sunlo.

¹⁸A-hensin nyu kedanyu aphu a-nye ka sobin, raja gü rikhun dan le nken tin kejü ka. Gath ki a-sithen kehü shüpahü tsi tsero dan ko a-nken tin jü,

¹⁹lo raja gü le anyugun sharhi gü Ittai ka zoshü, “Nle nyuthyüo agun zen tin jü nla? Rani gü raja keshün gü zen binlo. Nle tesin nme, n npvü nkazü zen nithen ki bin nyo.

²⁰Nle hika gwenkho kezü bin gwenzin zun, tsügenyu nyuthyüo ale nzen-o hobin mon? Ale diki gü zhüyo tsüe shamvu. Rani gü hagun temi dan zen bin tin lalo, lo Npugü no shwikenjün lo ketsingü pe ntsülo,” tsonshü.

²¹Ai Ittai le zoshü, “Raja gü, ale Npugü zan sen-o swe bin nle, nle lika hika gü-e ale a-zintse nzen-o güti, tsü le kesi yatse-e.”

²²David le zoshü, “Gwasa, tsonchü shülo! Tson-o Ittai le a-temi lo anyugun nyenyu aphu zen tsonchü shü.

²³David sikethen dan le tinla ntsin temi dan le chü nra sen bin. Raja gü le a-temi dan le a-sithen tse Kidron rinyu pfüthü gü, anyugun kengü tehenyhun kemvu zin güla.

²⁴Zadok püshükeda gü lo Levinyu dan le tsükahü, anyugun le kenshün Kejozenkelo Khinpha gü pen hü. Anyugun le tsü pen shela lo temi aphu nyida gü nkenlo kemvuthen tsü pen so nimvu. Püshükeda gü Abiathar ko tsüka bin.

²⁵Tsüselo Raja gü le Zadok ka, “Kejozenkelo Khinpha gü pen rani gü nyida günyu shü lalo. Npugü le a shwi a-kenyü yatselo khenyüme a-le ano niryüo tsü lo tsü pe keshü bin-e hyu ti.

²⁶Ai a-le a shwi a-kenyümvu yatselo, a-no a ge nyuthyü nyü bin yo thyü lota.”

²⁷Tson-o a-le Zadok ka zo, “Hire, nnyugü Ahimaaz lo Abiathar nyugü Jonathan tse zen kegwa gü thyü nyida günyu rani gü lalo.

²⁸Lo nkipon jolo le ryü kemvuthen ale züri tehenyhun kemvu pfüthü kebin gü ka khwe bin ti.”

²⁹Tson-o Zadok lo Abiathar au le Kejozenkelo Khinpha gü pen rani Jerusalem nyu gü tsüki bin tinla.

³⁰David le chü sen tse Oliv kazüthun ge küjü; a-le phaje pfü mvu lo nyungwa kemvu zansü a-pe henpfü hü. A-sithen kehü nyu ko aphu a-pe henkü pfü lo chü bin.

³¹Ahithophel le a-ntsun kebin Absalom zen kerhün lo laso tse kethyü David le shakelo ka kehi thyüo, “Npugü, Ahithophel tson ketsin no kemon kenlu thyü lalo!” tsonshü.

³²David le rincho gü sun tikelo ka, tsünyu kerüshvubin nme le bin, tsüka a-le tenyen kehü a-pvügü Archit temi gü Hushai le aphi sürhen lo nnyo pe a-pe ge shüpfü tse ryü a-teno.

³³David le a-ka zoshü, “Nle azen gü-e akeche keloi mvu,

³⁴ai nle akecheo nyida ki ranigü Absalom ka nle a-pvü keche kehü hontse ketsin thyü a-che titse zoshülo. Lo nle thyülo kegwathen Ahithophel le tsontsin keshü aphu ntsunlo.

³⁵Püshükeda gü Zadok lo Abiathar au le tsüki bin ti; raja ka gü nyu nle nyükelo aphu pe au ka zoshülo.

³⁶Au nyu Ahimaaz lo Jonathan au le anyugun hü nle, lo au nishüo nle shakelo aphu pe aka zoshülo.”

³⁷Tson-o David pvügü Hushai le rani nyida günyu yülo Absalom le tsüka ryü bin.