Read Southern Rengma Naga 2 SAMUEL 17 Bible Online

2 SAMUEL 17 - Southern Rengma Naga bible

2 SAMUEL 17

¹Tsüsithon kemvu ka Ahithophel le Absalom ka zoshü, “Ano temi yie tseryü kenyhun kejü lo-o ntsoje David sithen güta.

²A-le hokeli lo shese kebin ka gü a-whe ti. Tsonlo a-le nshvula lo a-temi aphu tin lati. Tson-o ale raja gü nti dushvu lao

³kalugi le a-nyepvü ki rani keryü hontse a-temi aphu zenryü nki shü lati le. Nle temi nme nti dushvu lanyü kebin gwenzin; a-sen dan le kenishü ti.”

⁴Absalom lo Israel nyu sharhi ju aphu mhundyü ka tsontsin higü le gwa kethyü hontse la.

⁵Absalom le zoshü, “Hushai koshüo a-le nyu zo tiyo ngun nyüshwi tile.”

⁶Hushai le ryü laryü Absalom le a-ka zoshü, “Ahithophel le hihontse tsontsin pe agun tsüle, agun no tsü then tile? Nmvu yatselo nyuthyü tiyo agun ka zoshü lo.”

⁷Hushai le zoshü, “Nthu gwen Ahithophel le tsontsin keshü gü hile gwamvu.

⁸Npvü David lo a-temi dan le teri kvusa, anyugun le thyügwen tsü mele a-nyu rühulo kela hontse nshori. Npvü le a-sisha kela shüpahü nyu nme, a-le khejenyu a-temi dan zen bin hü mvu.

⁹Ntsoka hile a-le tsokü nmvue bin kecha nme ka kebu bin-e shamvu. David le ntemi dan whe so nyemhun ligü higü le tsü nyü lo-e ntemi sokvula sele tse zoti.

¹⁰Tson-o shünyho hontse nshvu hü kemvu kepeche tsin gü-e no nshvu lati, Israel nyu aphu npvü le shüpahü kekvu nyu lo a-temi dan le teri thyüsa kehü nyu letse sha kebin genyu.

¹¹Tsügenyu ale tsontsin kebin güle,nmezin gü kechazin keti Israel kazü aphu nyu temi aphu zenryü kequenlo, tson-o temi no chon pe züda seka hachon hontse lo-o nle zen teri nyu gülo.

¹²David le lika hika bin-e ngun le a-fülo lati, tson-o nyuthyü bin yo a-le shakemvu ka a-whe ti. A-le lo a-temi-e nme nsen loho.

¹³A-le nyida nme nyu yüla yatselo ngun temi aphu ron senryü nyida gü süshe pe ketejon nyu shü lati. Tso nme nti-e khe pe rincho sun tsü ge shü njü loho.”

¹⁴Tsontsin Absalom lo Israel nyu aphu, “Hushai tsontsin güle Ahithophel nye gwa kvu le,” tse zola. Npugü le Ahithophel tsontsin kegwa then loho, tson-o gwakemvu no Absalom ge ryü titse rhilokela genyu.

¹⁵Tson-o Hushai le a-le nyu tsontsin pe Absalom lo Israel sharhi ju tsü shüyo lo Ahithophel le nyu tsontsin shüyo pe Püshükeda Zadok lo Abiathar au ka zo shüla.

¹⁶Hushai le, “Ntsoka whütse! Jolo nipe David kishüo ntsoje tehenyhunkemvu nyu nsen nya, ai a-le lo a-temi dan khin lo-o boshvu lamvu nrün genyu gwe tse Jordan pfüthü lalo,” tse zosin shü.

¹⁷Abiathar nyugü Jonathan lo Zadok nyugü Ahimaaz au le Jerusalem teki Enrogel zü kenthün ka khwebin, nyida gü nyu yükejü nme le a-zintse gü dihontse bin yo pe au ka zoshü lo au le gü raja David güka zoshü hü.

¹⁸Ai khenyüme ntsenyu nme le au hyu lao Absalom ka zoshüla; tsügenyu au le tin-o Bahurim nyu temi nme kanyu güla. Temi tsügü le a-ka khoka zülvu nme le bin, tson-o au le tsünyu güla.

¹⁹Lo a-nu le zülvu kehen sen ryü henlao a-so shye pho shükela genyu temi nme-e shalo mvula.

²⁰Absalom hensin kedanyu jule ka tsüka ryüo tenugi ka, “Ahimaaz lo Jonathan au le dika bin la?” tse ketsoshü. Laryü tenugi le, “Au le züri gü pfüthü laso; ” tse zola. Temi dan le au fü ai hyu lomvu kela genyu anyugun le Jerusalem ki rani gunla.

²¹Anyugun le tin kela siki Ahimaaz lo Jonathan au le zülvu nyu chwiryüo gü raja David ka zoshü. Au le Ahithophel le a-ntsun-o nyu rhibin yo pe a-ka zoshü, lo a-no, “Whütse züri gü pfüthü lalo,” tse shü.

²²Tson-o David lo a-temi dan le Jordan nkenchwi, tsangkeben tsüle anyugun aphu tsü nken lola.

²³Ahithophel le a-le tsontsin keshü then mvukela hyulo ntsin a-gada ge küo a-rünyi ki gunla. Tson-o a-ka ketsü kela la njüo a-npvü khvushon sila-o pe anyu kami sika nyu sunla.

²⁴Absalom lo Israel nyu le Jordan pfüthü keryü gwenkho tsü le David le Mahanaim rünyi ti lola.

²⁵(Absalom le Amasa pe Joab sunka rihü dan so keda thyüshü. Amasa le Ishmael nyu temi Jether nyugü; a-jvü zan le Abigail, a-le Nahash nyugi Joab a-jvü Zeruiah sikezen gi.)

²⁶Absalom lo a-temi dan le Gilead kazü nyu nsen lo.

²⁷David le Mahanaim nyu ryü kelo ka, Ammon ki Rabbah nyida nyu Nahash nyu gü Shobi, Lodebar ki Ammiel nyugü Makir lo Gilead ki Rogelim nyu Barzillai tse le ryü a-teno shü.

²⁸Anyugun le khun, nnyola, zhünyu keben phinya lo David lo a-temi genyu ketyüketsü ko senryü; shye, barley, chvüsa, shyekeshvu, rhütsi, rhüchü, khuzü, cheese, dohi lo tanyü tse peha senryü. Anyugun le David lo a-temi dan le tehenyhun kemvu nyu nnyo, teri lo hokeli kebin sha kebin genyu.