Read Southern Rengma Naga 2 SAMUEL 18 Bible Online

2 SAMUEL 18 - Southern Rengma Naga bible

2 SAMUEL 18

¹Raja David le a-temi aphu zenryü kequen lo-o kenjünkho pe yie lo tsi thyüo tsüso keda pe shü küshü.

²Tson-o tsüno danshen thyüo Joab, Joab sikezen gü Abishai lo Gath nyu temi Ittai tseno dan meme sokeda thyüo nishwi shü. Lo raja gü le a-temi dan ka, “Ale hagun zen gü ti,” tse zoshü.

³Anyugun le zoshü, “Nle agun zen gü nya.” “Agun kechanyu le rani tin la-e, nmvue agun ponha gala yatse-e shwikerüchün nyu genyu we thame kecha ndi, ai n we agun temi yie tseryü hontse bin nyo. Tsügenyu nle nyida günyu bin-o keche nipe agun ketsü gü le gwakvu.”

⁴Tsontsin raja gü le zoshü, “Hagun mhundyü nyu nyu le gwatsin yo ale tsü thyü ti.” Tson-o a-temi le yie yie lo tsi tsi a-dan thyü chwi kebin ka a-le khinrun khoka sobin.

⁵A-le ahza pe Joab, Abishai, lo Ittai tsüshü: “Agenyu ponyu gü Absalom nthyü nnyü nya nye,” tsonshü. Rihü dan aphu David le a-hensin kedanyu juka johoshü kebin hi nyü külo.

⁶David rihü dan le lojvü ki chwigü Efraim chün nyu Israel nyu zen kega.

⁷Tsüka David temi dan le Israel nyu sokvu la; tsünyü temi ga sa, yie nki gala.

⁸Lojvü kesü thyü kega la, lo teri bin nyu nyeki chün nyu temi chonkvu le sila.

⁹Absalom le David temi dan teno lo. A-le keru nme ge dun bin laryü tsüle teshobin da nme hensin güo Absalom pe le senro ge hüsü lola. Tson-o Keru gü le tinla, lo Absalom le hüsü nshon lola.

¹⁰David temi nme le tsü hyushüo Joab ka zoshü, “Kedagü, Absalom le teshobin nme ge hüsü nshon kebin ale hyu le!”

¹¹Joab le zoshü, “Nle a-hyu yatselo nyuthyüo a-bin nyu gala mvula? Tsonla yatse kethyü we ale rakagi tseryü lo senkephin nme tse pe ntsü nrün le.”

¹²Ai temi gü le a-jokenishü, “Nle rakagi yie tseryü pe atsü yatse-e ale azenkero penso pe raja gü nyu ntsun kemvui le. Agun aphu nyü kebin ka raja güle, nle, Abishai lo Ittai ka, ‘A genyu ponyu gü Absalom nthyü nnyü nya nye,’ tse johoshü kebin nyü laso.

¹³Tson-o ale raja gü jozen mvuo Absalom gala lo, raja gü le tsü rüla nyülo kelai, a-le tsü rüla aphu nyülo lo nle ano penlo kemvui le.”

¹⁴Tsontsin Joab le zoshü, “Ale nzen kenthon-o gwenkho nke sin bin loho.” Tson-o a-le mi kenshen sen gü Absalom le teshobin ge hüsü nshon-o rhün kebin a-nyun jen shüla.

¹⁵Tsüselo Absalom khoka kehü Joab shüpahü mi tseryü le a-boshvu shüla.

¹⁶Joab le shu khun shüo a-rihü Israel nyu then kehü dan no terithyü nyao rani ryüla lotse ahza shü.

¹⁷Anyugun le Absalom min pe chün nyu tekhün kentsun nme nyu shüo tso kechon pe a-so khwela. Tsüselo Israel nyu aphu tin-o a-npvü a-ka ki gun la.

¹⁸Absalom le a-kerhün ka, raja nyu kazü ketejon nyu tso khwe nme khwe njü, a-zan no bin nrün a-nyu peche nme-e kendi genyu. Tson-o a-le tsü pe a-zan thoshü, lo nthu keti tsü pe Absalom tsokhwe tse hü.

¹⁹Tsüselo Zadok nyugü Ahimaaz le Joab ka zoshü, “Ano tin gü raja gü ka Npugü le a-shwikerüchün nyu ben nyu a-kenishü kela jolo kegwa gü zoshü ta.”

²⁰Joab le zoshü, “Nmvu, nle nthu jolo kegwa lihi-e sen gü loho. Jon kecha peha ka nle tson logwa, ai nthu we kemvui, raja gü nyu le sikela genyu.”

²¹Tson-o a-le Sudan nyu do gü Kushi ka, “Gü raja gü ka nle nyu hyuyo zoshülo.” Tsontsin do gü le nkhün shüo tin güla.

²²Ahimaaz le tenge tse-o. “Lihithyüe kesha thyü; a kono jolo sen gü lo.” “Nle nyugenyu gü nyü bin nla anyu gü?” tse Joab le ketsoshü. “Tsügenyu nle nchün hyulo kemvui le.”

²³Ahimaaz le zonio, “Lihithyü yatse-e ale gü nyü bin nle.” “Tsonlo güta,” tse Joab le zoshü. Tson-o Ahimaaz le Jordan ketejon pfüthüo do gü mhundyü rila.

²⁴David le nyida gü khinrun nyu gü lo tegwe gü au jaka dun bin. Rikhun gü le kügü a-sun ki khinrun so ge shwishü laryü temi nme le a npvü tin bin.

²⁵A-le nrao raja gü ka zoshü, lo raja gü le zoshü, “A-le a-npvü yatselo a-le jolo kegwa sen ryü jü nle.” Tin kebin gü le khonni ketsin tsin ryü.

²⁶Tsüsika ko rikhun gü le temi kecha nme le a-npvü tin kebin hyushüo a-le khinrun kekhwenyu koshü, “Shwishü ta! Kecha nme ko tin hü nle!” Raja gü le zoshü, “Higü ko jolo kegwa sen hü nle.”

²⁷Rikhun gü le zoshü, “Temi a-keri gü le Ahimaaz ketin hontse ale hyu bin nle.” Raja gü le zoshü, “A-le temi kegwa nme tsügenyu jolo kegwa senryü jü nle.”

²⁸Ahimaaz le nra raja gü keluo a-mhundyü ka kazü nyu nkhün tsüo zoshü, “Raja gü n ntsun kebin temi gü sokvu kelo pe nketsü gü Npugü n Sunggigü shwe le!” tsonshü.

²⁹“Ponyu gü Absalom le gwabin nmon?” tse raja gü le ketsoshü. Ahimaaz le a-jokenishü, “Kedagü, nhensin kedagü Joab le anikeshü ka, temi kechon le nyhun nhi kebin hyu le, ai tsü le nyuthyü bin yo ale shamvu le.”

³⁰Tsontsin raja gü le zoshü, “Tsüka so tse,” tson-o a-le tsüka gü sobin.

³¹Tsüsika Sudan nyu do gü le ryüo raja gü ka zoshü, “Raja gü, n genyu ale jolo kegwa sen hü nle! Nthu Npugü le nshwikerüchün nyu aphu sokvu kelo pe ntsü laso!”

³²“Ponyu gü Absalom le gwabin nmon?” tse raja gü le ketso shü. Do gü le a-jokenishü, “N ntsun kehü nyu aphu no nshwikerüchün nyu hidan ge thyü keshü hontse küla nyü le, Kedagü.” tsonshü.

³³Raja gü le anyungwa mvu sala. Tson-o a-le khinrun soka katsen gü nyu yügü chü sola. A-le nra-o, “O anyugü! Anyugü Absalom! Absalom, anyugü! Ano nsunka sila letse mvuo, anyu! Absalom, anyugü!” tson lola.