Read Southern Rengma Naga 2 SAMUEL 19 Bible Online

2 SAMUEL 19 - Southern Rengma Naga bible

2 SAMUEL 19

¹Mele Joab ka Raja gü le Absalom genyu chü lochechü bin nle tse zoshü.

²Tsügenyu tsünyü kvukelo shekerhün pe David rihü aphu nyungwa kemvu thyüla, raja gü le anyu chechü bin nle tse anyugun le nyü kelo genyu.

³Anyugun le shüpahü terinyu tin kela nyu le keja kebin hontse keshu tse nyida günyu raniryü.

⁴Raja gü le a-mhun henpfüo chü nra nhuo, “O anyugü! Anyugü, Absalom! Absalom, anyugü!” tson bin.

⁵Joab le raja gü ka kigü a-ka zoshü, “Nthu nle ntemi, nkeyhun, nnyu peche lo tenu dan keyhun, nnunyu lo nthenu dan keyhun kenikeshü dan kemeni laso.

⁶Nle senyu nyu le nso yo tsü nyu ntsun lo senyu le n nrhi yo tsünyukeche laso! Nle nhensin kedanyu ju lo ntemi pe lihi kemvu kethyü tsin tsentsü laso. Ale hyu bin nle, nthu Absalom le rhünbin lo agun aphu sila lo nle nkenyüsa kethyüi.

⁷Ntsoka gü jokegwa pe ntemi dan ka zoshü lo. Nle tsonmvu yatselo, ale Npugü zan sen-o swe bin nle, lonyü ki tsü le anyugun nme-e nzen bin kemvui le. Lo tsüle nkeyhun aphu ka nkenjün kethyü keshvu tsingü thyüti.”

⁸Tsüselo Raja gü le so-o gü nyida gü khinrun ka dunlo. A-temi dan le a-le tsüka kebin sha lo-o aphu gü a-hun-o kequenlo. Israel nyu aphu a-npvü a-ka ki gun kela genyu.

⁹Israel nyu tsipwen aphu anyugun npvü anyu dan nyu ketsin lola. Anyugun le khinyu nyu ka, “Raja David le ngun shwikerüchün nyu ben nyu ngun kenishü. A-le Filistian nyu ben nyu nkenishwi shü, ai ntsoka a-le Absalom mhundyü ka tin-o nkazü nken tin laso.

¹⁰Ngun le Absalom yün pe ngun raja thyülo, ai a-le terinyu sila so. Tsügenyu nyuthyüo peha no gü raja David zen raniryü la mvula?”

¹¹Israel nyu le nyu zobin yo tsü le Raja David tila. Tson-o a-le püshükeda gü Zadok lo Abiathar au no Juda sharhi juka, “Nyuthyüo hagun le kenkhin tsin gü thyü raja gü keche nizen ryü a-raja bin ka shü tila?

¹²Hagun le a shvunye, athyü lo a-zi; nyuthyüo hagun le kenkhin gü thyü a-zen niryü tila?”

¹³David le au no Amasa ka ko zoshü lo tse shü. “Nle a shvunye. Ntsoka gerho ale nlope Joab bin ka rihü dan kentsen gü thyüshü bin nle. Ale tson shümvu yatselo Sunggigü no avüshvu lalo!”

¹⁴David jo le Juda temi dan aphu no a-kenyüo a-kipon la, tson-o anyugun le a-no ahensin kedanyu aphu zen raniryü la lotse jolo nishü.

¹⁵Raja gü le rani ryü kejü ka Juda temi dan le a-tson rio züri gü pfüthü titse Gilgal ka ryü Jordan züri ka a-teno lo.

¹⁶Tsügwenkho ka Bahurim nyu Benjamin tsipwen Gera nyu gü Shimei le nmhe ryü Jordan ka David teno.

¹⁷A-le Benjamin tsipwen ka temi yie me zen hü. Lo Saul kaminyu gogü Ziba ko a-nyu peche mi tseryü pvün lo a-gonyu mi nki zenryü, anyugun le Jordan ka raja gü mhundyü nyu ryü.

¹⁸Anyugun le raja logwa dan tsonrio züri gü pfüthü lo lihi-e raja gü kenyü thyü titse züri gü pfüthü ryü. Raja gü le züri pfüthü gü titse ndo kelo ka Shimei le a-mhundyü nyu chetsü la

¹⁹tson-o zoshü, “Raja gü, nle Jerusalem nken tin kethyü jon nyü ale thyüzü kela gü tsü ncheno-e nmhin lalo. Tsüpe a ntsun nmvue rüchün sin nyalo.

²⁰Ale mu laso tse shala sele, kedagü, tsügenyu tsipwen teso kipon nyu dan nyu ale kerithyü ryü nthu Raja gü teno bin nle!”

²¹Zeruiah nyugü Abishai le zoshü: “Shimei le shochün pe Npugü le kejü pe raja thyü kelo gü tsü kethyü genyu dushvula mvu loshvu.”

²²Ai David le Abishai lo a-tsagü Joab au ka zoshü, “Segü le hai kerüchün ketso shü ola? Hai le akevü titse ole? Ale ntsoka Israel nyu raja gü, lo nthu Israel nyu nme no si loho.”

²³Tson-o Shimei ka zoshü, “N dushvula loho tse ale a joshü bin nle.”

²⁴Tsüsika Saul nyugü nyu Mephibosheth le raja gü teno ti tse nsheryü. A-le raja gü le Jerusalem nken tin kela jon nyü gü a-le kvulo-o rani keryü keti a-phasü mvu, a-münhü ketsü nmvue a-phinya thu mvu.

²⁵Mephibosheth le Jerusalem nyu bin-o ryü raja gü teno kethyü ka raja gü le a-ka, zoshü, “Mephibosheth, nle azen-o tin lamvu. Nyuthyüo?”

²⁶A-le zoshü, “Raja gü, ale phayhon nle shabin nyo. Ale agogü gada nme ndoshüo ale dun-o nzen gü titse shü laryü a-le a sala le.

²⁷A-le nkuo arüla pe Raja gü ka zoshü, ai nle Sunggigü lonyu hontse, tsügenyu nmhundyü ka nyu le njü yo thyülo.

²⁸Apvü kami aphu raja gü le dushvula kezüi le bin, ai nle ano nmiz ge tyütsü lo kegwa thyüshü. Ale raja gü, nka shwikenjün hi ni kezüi ndi le.”

²⁹Raja gü le zoshü, “Nle tha zosin mvue gwa. Ale Ziba hai no Saul hon kenjün titse rhilo laso.”

³⁰“Ziba no aphu lolo,” tse Mephibosheth le zonishü. “A genyu we Raja gü le gwabin-o kaki rani ryü kela nti-e gwaso.”

³¹Gilead ka Rogelim nyu Barzillai ko Raja gü tsonrio Jordan pfüthü titse nsheryü.

³²Barzillai le thensa kelanyu nme, a-le chen hentetse la. A-le nnya sa, lo Raja gü le Mahanaim nyu bin ketse ka a-le ketyüketsü pe tsü hü.

³³Raja gü le a-ka zoshü, “Azen Jerusalem ki gülo ale nshwi loti.”

³⁴Ai Barzillai le zonishü, “Ale kethon yhun kemvui so; tsügenyu nyuthyüo raja gü zen Jerusalem ki gü bin se mon?

³⁵Chen hentetse laso, tson-o thame thyü anyun nyü mvu laso, lo lü kethyü khwe-e nyü lomvu la sele. Raja gü no agenyu kenjün kethyüi nti.

³⁶Ale techün keda tsü hontse hyulo kümvu le. Tsügenyu ale nzen Jordan nken khe gü gwenzin lati.

³⁷Tson-o ano kaki rani gü a pepvünyu sika khoka sila lo. Anyugü Chimham le hika re, a-le n lothyü ti; a-no nzen güo Raja gü le a-genyu nyu le gwatsin tse rüchün yo thyü shüta.”

³⁸Raha gü le zoshü, “Ale a-zen güo a-genyu lihi-e nle nnyü kebin gü thyü shüti. Lo ngenyu nle lihi hi-e ale thyü shüti.”

³⁹Tson-o David lo a-temi dan le Jordan pfüthü la. A-le Barzillai nboshüo jochü pe a-tsüshü, tson-o Barzillai le kaki rani gun la.

⁴⁰Raja gü le Juda temi aphu lo Israel temi dan ponha tse le a-tsonrio Gilgal ka ryü, lo Chimham le a-zen hü.

⁴¹Tsüselo Israel nyu aphu raja gü ki gü a-ka, “Raja gü nyuthyüo agun tsasikezen nyu Juda temi dan le nzen tinla, lo nle, nkami lo ntemi dan tsonrio Jordan pfüthü kethyü anyugun kenjü le bin nle tse rüchün hü nla?”

⁴²Juda temi dan le zoshü, “Raja gü le agun minyu genyu agun le tson shü le. Tsonlo hagun le nyu thyüo hi genyu hagun nyunta tila? A-le agun ketyüketsü minthyü binmvu nmvue thame pe agun tsüla bin mvule.”

⁴³Israel nyu dan le zoshü, “David le hagun temi yatse-e, agun le hagun nyeki agun kenjü jün tseryü le bin nle. Nyuthyüo hagun le agun süjün mvu hü nla? Raja gü zen niryü lati tse kethyü agun le zo teri kethyü tsü nmhin nya!” tsonshü. Ai Juda temi dan jo le Israel temi dan jo nyeki nko kvula.