Read Southern Rengma Naga 2 SAMUEL 2 Bible Online

2 SAMUEL 2 - Southern Rengma Naga bible

2 SAMUEL 2

¹Hi sika, David le Npugü ketsoshü, “Ano gü Juda rünyi nme ketsen lo tile?” Npugü le a-jokenishü, “Ele.” David le ketsoshü, “Digü.” Npugü le zoshü, “Hebron.”

²Tson-o David le a-nu hvu: Jezreel nyu temi Ahinoam lo Nabal nu magi Abigail Karmel kibin kehü gi tse zen Hebron ki gü.

³A-le a-temi dan lo anyugun kami dan kosin tse zen gü Hebron kehun rünyi dan ka binlo.

⁴Tsüselo Juda temi dan le Hebron ka ryüo David yün pe Juda raja thyülo. David le Gilead ki Jabesh temi dan le Saul sun kela rüla nyülo njüo,

⁵a-le temi peha nishüo josin shü: “Hagun le hagun raja gü jozen kehü zansü a-khipe sun kela genyu Npugü no jochü pe hagun tsülo.

⁶Lo ntsoka Npugü no hagun shwinjün lo hagun ge joketsin thyüshü nda. Hagun le thyükeshü tho hi genyu ako hagun njün shüti.

⁷Tsügenyu nko lo pechelo! Hagun raja Saul le si laso, lo Juda temi le a yün pe anyugun raja thyülo laso.”

⁸Saul rihü dan so keda gü Ner nyugü Abner le Saul nyugü Ishbosheth zen Jordan pfüthüo Mahanaim ki tinla.

⁹Abner le Ishbosheth pe Gilead lojvü: Asher, Jezreel, Efraim, lo Benjamin lo Israel aphu so raja thyüla.

¹⁰A-le a-keyhun chen henzi ka Israel nyu raja thyülo, lo a-ale chenhvu raja thyü. Ai Juda tsipwen le David jozen hü,

¹¹lo a-le chen tsenyüo peha Hebron nyu Juda so raja thyü.

¹²Abner lo Ishbosheth hensin kedanyu jule Mahanaim nyu bin Gibeon nyida ki gü.

¹³Tsüka Zeruiah nyugü Joanb lo David hensin kedanyu jule gü zübun ka anyugun teno, anyugun dan me le zübun peha zin lo kecha dan le zübun nye likipon tse anyu aphu dun bin.

¹⁴Abner le Joab ka zoshü, “Lizin hizin selo peha no soryüo terikanyü sen kenren shwi tinu.” Tsontsin Joab le zoshü, “Gwale.”

¹⁵Tson-o Ishbosheth lo Benjamin tsipwen sunka mi tseryü kenyhun le David temi mi tseryü kenyhun zen kenren.

¹⁶Anyugun nmeme tse a-kepen gü pe sülo njüo a-zhethon pe a-kepen gü a-nyikhon ki rhishüo anyugun nkipezi aphu kengüo sila. Tsügenyu Gibeon nyu bin tsügü zan pe, “Zhethon low tse kola.”

¹⁷Tsüselo teri kerü nme le soryüla, lo David temi dan le Abner lo Israel nyu so kvulo la.

¹⁸Zeruiah nyu peche mishen le tsüka bin: Joab, Abishai lo Asahel. Asahel le tingwa pe thyüje kenmhe hontse,

¹⁹tin njüo Abner hü sola.

²⁰Abner le rani gü shwishüo, “Nle Asahel le?” Tsontsin a-le, “Ele.”

²¹Tsüselo Abner le, “Ahü nyalo!” “Shüpahü nyu nme hüo a-le nyu sen hüyo khi lolo.” Tson ai Asahel le a-hü bin.

²²Abner le a-ka zonishü, “Ahü nyalo! Nyuthyüo ano nga lalo tse tenge bin nla? A no dihontse ntsa Joab teno tila?”

²³Tson bin ai Asahel le kheshümvu, tsügenyu Abner le sizin a-mi keten shü laryü a-ginda jenphe chwila. Tsüselo Asahel le che tsügü sila, lo a-le keto kebin bin ka keryü nyu aphu tsüka sobin.

²⁴Ai Joab lo Abishai au we Abner hü sola, lo au le ryü Gibeon tehenyhun kemvu ki kegü tsonda Giah nphozin Ammah rincho tikelo ka yhüko chela.

²⁵Lo Benjamin tsipwen dan le kequen-o Abner hun nipfüo rincho nme ge sobin.

²⁶Tsüselo Abner le Joab ko-o, “Ngun kethonthen terithyü bin ti ole? Kenkhin ki tsüle thame kemvu, ai khümera kelai tsü nle hyumvu ole! Agun le hagun tsasikezen nyu. Tsonlo dithen ki nle agun hünya lo tse ahza shü shü mvuo ntemi no agun hübin tila?”

²⁷Joab le zoshü, “Ale rhün kehü Sunggigü zan nyu swe bin nle, nle zoshü mvuyatse kethyü we a temi dan no hagun hü bin-o tsang nben nrün.”

²⁸Tsüselo Joab le a-temi dan no Israel nyu hü nya gwenlo tse kethyü zansü shukhun shü: tson-o terithyü mvula.

²⁹Abner lo a-temi dan le khensin tsonchüo Jordan ketejon nken-o gun; anyugun le Jordan züri pfüthüo tsüsigü lonyü Mahanaim nyu rani ryülo.

³⁰Joab le Abner hü mvu lao a-temi dan aphu ko kequen shü laryü anyugun mi tseryüo tekü lo Asahel kosin tse ndi kebin hyulo.

³¹David temi dan le Benjamin tsipwen Abner temi tsishen-o hentsero gala.

³²Joab lo a-temi dan le Asahel pen gü Bethlehem nyu anyugun kami sika nyu sunla. Tson-o khensin tsonchüo lonyü gü raniryü Hebron tilo.