Read Southern Rengma Naga 2 SAMUEL 20 Bible Online

2 SAMUEL 20 - Southern Rengma Naga bible

2 SAMUEL 20

¹Tsüka Gilgal nyu temi a-jvü gwa kemvu nme a-zan le Sheba tse kethyü Benjamin tsipwen ka Bikri nyugü le bin. A-le shu khun shüo, “David khishe lalo! Agun le a-sithen loho! Israel nyu temi dan, kaki gunla ti khun!”

²Tson-o Israel nyu le David khe lao Sheba zen tinla, ai Juda temi dan le David kipon bin-o Jordan ka a-then-o Jerusalem ki ryü.

³David le Jerusalem nyu a-rajaka nyu ryü lo-o a-le no rajaka nucha lotse khekela a-thenu mitseryü ju pe kekhwe nyu hensin shüla. A-le anyugun genyu sen mvulo keshvu pe tsü, ai anyugun zen zhü mvula. Anyugun yhunthen khin pe bin lao, no magi nyu hontse yhun.

⁴Raja güle Amasa ka zoshü, “Juda temi dan ko kequen lo-o anyu zen-o hadu ki hika ryülo.”

⁵Amasa le anyugun ko titse güla, ai Raja gü le gwenkho tho keshü ka raniryü mvula.

⁶Tsügenyu raja gü le Abishai ka zoshü, “Sheba le Absalom nyeki ngun kevü shüti. Laryü atemi dan zenlo-o a-then gülo nmvu yatselo a-le chwida kebin rünyi peha nkhe lo-o tsünyu kebu tinla loshvu.”

⁷Tson-o Joab temi raja gü rikhun dan lo shüpahü kecha aphu Abishai zen-o Jerusalem nken-o Sheba hü güla.

⁸Anyugun le Gibeon nyu tso keda gü tikelo ka, Amasa le anyugun teno lo. Joab le terinyu kegü kanyü ndo pfü, a-zhethon lo a-khin nyu shü pe a-senkephin ge senpfü tsehü. A-le mhundyü chwiryü laryü a-zhethon le nthola.

⁹Joab le Amasa ka zoshü, “Gwabin n mon, apvü gü?” Tson-o a-nbo nrün genyu a-ben nzhüzin pe a-münhü sülo.

¹⁰Amasa le Joab le a-ben peha zin zhethon sen kebin tsü rüchün bin mvu, Joab le a-ginda jen shüo a-vü ari le nso kazünyu tsüryü la. A-le si whütse lao Joab le a-du nimvu la. Tsüselo Joab lo a-zikezen gü Abishai au le Sheba then güla.

¹¹Joab temi nme le Amasa mi khoka so-o, “Ligü higü Joab lo David au kipon titse kethyü nyu Joab then lolo!” tse meko bin.

¹²Amasa min le tezi no rhenpfüo, tson lvunyu keto bin. Joab temi gü le temi aphu sunbin kela hyushüo a-le tson nyu simin gü sü sen gü low nyu shüo thyühüphi nme pe henla.

¹³Tson nyu simin gü sentin kela siki temi aphu Joab then-o Sheba hü güla.

¹⁴Sheba le Israel nyu tsipwen aphu lojvü pfüthüo Abel Beth Maakah nyida ka ryü, lo Bikri pfüphun aphu kequen lo-o a-sithen nyida günyu yüla.

¹⁵Joab temi dan le Sheba le tsünyu kebin shalo-o nyida gü hunpfülo. Anyugun le nnyo tso pe chwida tegwenzin lulo, lo chwida no chwila nrün genyu a-pha yhen so.

¹⁶Tenunyu kensü nme le nyida tsünyu bin laryü a-le chwida ki bin nra sen-o, “Nyülo! Nyülo! Joab no hika ryülo tse zoshü lo; ale a-nthon shü nyü bin nle.”

¹⁷Joab le gü, tsontsin a-le, “Nle Joab le?” tse ketsoshü. A-le, “Ele, ale le,” tse a-jokenishü. Tsügi le zoshü, “Akhwenyü shülo, Kedagü.” “Ale nyübin nle,” tse a-le zoshü.

¹⁸Tsügi le zoshü, “Nduka nyu le, ‘gü Abel nyida gü ka nyu zo tiyo ketso lolo’— anyugun le tsü hontse lohü.

¹⁹Agun rünyi hi le Israel nyu dan nyu bwenye tse lo joketsin kezo nyida nme le. Nle nyuthyüo tsü nkela titse bin nla? Nle Npugü hon nkela titse ole?”

²⁰Joab le a-jokenishü, “Nmvu! Ale hagun nyida nke nmhüla loho!

²¹Tsüle agun kendo mvu. A-zan le Sheba tse kethyü Bikri nyugü, Efraim rincho kinyu gü le Raja David ntsun soryü laso. Temi nme hi khipe aben ka kashü lalo, lo ale nyida günyu rani lati.” Tsontsin tsügi le zoshü, “Agun le a-pe shwe pe chwida nyeki ntsü shü lati.”

²²Tson-o a-le rhikelo tsü sen-o nyida gü temi dan ki gü, lo anyugun le Sheba pe thü lo-o shwe pe chwida tegwenzin Joab tsüla. Tsüselo a-le a-temi dan no nyida gü khela gwenlo tse shukhun shüo anyugun le kaki rani gunla. Tson-o Joab le rani-o Jerusalem nyu raja gü ki ryüla.

²³Joab le Israel rihü so keda gü; Jehoida nyugü Benaiah le David rikhun nyu so keda gü;

²⁴Adoniram le thatho thyü kehü dan so keda gü, Ahilud nyugü Jehoshaphat le kethu dan so keda gü;

²⁵Sheva le jokera ka kethu gü; Zadok lo Abiathar au le püshükeda thyü,

²⁶lo Jair rünyi nyu Ira ko David püshükeda nme thyü.