Read Southern Rengma Naga 2 SAMUEL 22 Bible Online

2 SAMUEL 22 - Southern Rengma Naga bible

2 SAMUEL 22

¹David le Npugü le Saul lo A-shwikerüchün kechanyu ben nyu a-kenikeshü ka lü hithyü pe Npugü kishü:

²Npugü le a kenogü; a-le a chwida kenko.

³A Sunggigü le a nokhin kehü gü, a-zen lo ale kenshvu ndi. A-le gida nme hontse anokhin hü a-le asun lohü lo a kenishü hü. A-le a kenikelo gü; a-le kenshvu nyu anokhin lo a kenishü hü.

⁴Ale Npugü koshü; lo a-le a shwikerüchün nyu ben a kenishü! Npugü shwe!

⁵Kesi she le ahun kenthün bin; Kenke zü kentyü le aso henla.

⁶Kesi kenshvu le ahun bin, lo sika gü le a nsen bin.

⁷A kenjünkethyü nyu ale Npugü koshü; ale a Sunggigü ko-o keche hishü. A-kerüshvuka nyu a-le a khwe nyülo; ale keche hi keshü a-le nyülo.

⁸Tsüselo kazü güle nsü ndün lo nnula; tsang binkejwe dan le a-ke nsü lo ndün la. Sunggigü le a-nyunta kela genyu!

⁹A-hinkon nyu mahkhu chwiryü, A-mün nyu mahyilo mahgi kenhon le chwiryü

¹⁰A-le tsang sükho shüo tsangryü nmhu kezün pe a-phasin thyü pfüo.

¹¹A-le a-cherub ge nye tin la; a-le tsangkenhi sekin ge njwen tinla.

¹²A-le kezün pe a-je pfülo la; nmhu kezün zü le sü kethyü pe a-hun lola;

¹³a-mhundyü ka tsangkechwü nyu-e mahgi kenhon mahyi le chwiryü.

¹⁴Tson-o Npugü le tsangge tsangsen shü, lo Kekvutsin Sunggigü khwe nyülo.

¹⁵A-le a-tholevü kvu pe a-shwikerüchün nyu hü kezen la; tsang kechwü pe anyugunhü ketsü shü.

¹⁶Zuda gü thin le ndo la, lo kazü binjwe gü le a-kesun thyü mvula. Npugü le a-shwikerüchün nyu rhoshü lo a-nyuntao tsüdan kesü keshü ka.

¹⁷Npugü le teso ge bin-o tsüryüo a sülo; a-le zükentsun gü nyu asü shwilo.

¹⁸A-le a shwikerüchün kvusa kethyü nyu ben nyu a kenishwi shü; lo agenyu nkori kethyü a kenrhi nyu ben nyu a kenishü.

¹⁹Ale kenjün thyü kebin ka anyugun le a whe, ai Npugü le a nokhin lola.

²⁰A-le kenshvu nyu a keche shü; a-le a shwi a-kenyü kethyü genyu a kenishü.

²¹Ale kenjü gü thyü kehü genyu; Npugü le achün thyü pe atsü; ale mu kemvu genyu a-le jochü pe atsü.

²²Ale Npugü tejvü gü zen hü; ale a Sunggigü kheo ranila hümvu.

²³Ale a-tejvü aphu zen hü; ale a-johokeshü zen mvula mvu.

²⁴A kemu ndi tse a-le sha bin, ale a-zükemvu kethyü nyu a npvü a ntsen lo laso.

²⁵Lo ale kenjü gü thyü kehü genyu Npugü le a chün thyü pe atsü hü; Ale mu kemvu a-le shakebin genyu.

²⁶O Npugü, nle nge ketsin thyü kehü nyu ge ketsin thyü shü hü; lo gwapen kethyü nyu ge gwapen shü hü nle.

²⁷Nle nshün kehü nyu ge nshün hü, ai serikemvu nyu nrhi hü nyo.

²⁸Nle tsenyo kehünyu kenishü, ai ketekho kehünyu thyü ketsenyo lahü.

²⁹Npugü, nle a keben, nle a kezün hüla.

³⁰Nle kenko pe atsüo ano a shwikerüchün nyu whe, lo kekvu pe atsüo ano anyugun chwida boren lohü.

³¹Sunggigü le a-tho le ditsüki gwa penla, a-jo dan le ditsüki tenyenlo küla! A-le a-tesun lo titse fü kehü nyu aphu genyu gida nme hontse.

³²Npugü nti le Sunggigü; Sunggigü nti le ngun chwida.

³³Sunggigü le a kesun kenko gü a-le atson thyü pe kenshvu ndi shü hü.

³⁴A-le apha thyü pe thyüzhe pha hontse shü; tson-o kazüthun ge a ntsen shü hü.

³⁵A-le teri kethyü jvü pe asenthyü shü, tson-o ano levü kenko tsin sen lokegwa thyüshü.

³⁶O Npugü, nle ano lo a kenishü; n keche le athyü ngon lo.

³⁷Mele a tenlo kelai ka nle a ntsen lo, tson-o ale chela mvu.

³⁸Ale a shwikerüchün nyu hüo anyugun so kvulo; ale anyugun nkela kemvuthen sun mvu.

³⁹Ale anyugun vüshe lao anyugun le so lomvu; a mhundyü ka anyugun le kvulo mvu lao keto la.

⁴⁰Teri thyü nrün genyu nle kenko pe atsü lo a shwikerüchün nyu so kvulo.

⁴¹Nle a shwikerüchün nyu no a mhundyü tin; ale a kenrhi nyu nkela.

⁴²Anyugun le keche fü, ai nme anyugun kenishü mvu; anyugun le Npugü ko, ai a-le anyugun jokeni shü mvu.

⁴³Ale anyugun boshwe la, tson-o anyugun le kenphü hontse la; ale anyugun pe tson nyu kenbe kedyü kethyü hontse la.

⁴⁴Atemi me ntsun kehü nyu ben nyu nle a kenishü lo ano senye dan so keda thyü bin lo; ale shahü kemvu temi no ntsoka akeda 5 hensin nyu bin lo.

⁴⁵Tesin dan no a mhundyü nyu nkhün tsü, anyugun le akhwenyü kelo ka, a jozen.

⁴⁶Anyugun kepeche ndi lao anyugun chwida nyu ryü nsü ndün.

⁴⁷Npugü le rhün hü, a kesun gü shwe! Akenikeshü kekvu gü Sunggigü keda rüla zosü shülo!

⁴⁸A-le a shwikerüchün nyu so kvukelo pe atsü; a-le senye dan pe a hensin ka shü

⁴⁹lo a kenrhi nyu ben nyu a kenishü hü. O Npugü, nle a shwikerüchün nyu so kvukelo pe atsü lo temi gwakemvu nyu ben ka anokhin lo.

⁵⁰Tsügenyu senye dan nyu ale nshwe; ale keshwe lü thyü pe nkishü.

⁵¹Sunggigü le kvukelo keda pe a-raja gü tsü; a-le sozin kehü pe a-le kejükelo gü hishü, kethonthen pe David lo a-tsipwen dan hishü.