Read Southern Rengma Naga 2 SAMUEL 23 Bible Online

2 SAMUEL 23 - Southern Rengma Naga bible

2 SAMUEL 23

¹David Jesse nyugü Sunggigü le thyü ngon keshü gü, no raja thyü titse Jakob Sunggigü le kejü kelo, lo a-le Israel nyu genyu lü kezegwa ron keshü gü. Hile David jo kenkhin dan:

²Npugü kapu güle age bin-o thazo; a-jo le amün ka bin.

³Israel Sunggigü le zoshü; Israel nyu no kepen gü le aka zoshü: Kenjü sen keda thyükehü raja gü, Sunggigü jokezen nyu keda thyü kebin gü,”

⁴le lonyü nmhu kendi tsangkenyü hontse, tsangkenri sika tehen no nchwenshwe keshü 5 yhüko hontse ti.”

⁵Tsühontse Sunggigü le jochü pe a tsipwen tsü ti, a-le azen-o kethonthen kejozen lo kela genyu, 5 borho kemvui kejozen kelo nme, 6 kelu kemvu zoshwi keshü nme. Tsüle a kenrin; tsüle akvu kelo thyü ti, lo Sunggigü le tsü no ketsin thyü ryü ti.

⁶Ai Sunggigü shakemvu nyu we khipe shwe kela tsehü hontse lati; temi nme a-ben nti pe anyugun kesü loho.

⁷Nle tegi kanyü nmvue mi sen mvu loshvu; anyugun robu lati.

⁸Hile David shüpahü a-zan kechwi ju zan: Kerigü le Tachemon temi Josheb Basshebeth, a-le “Mishen ka sharhi”; a-le teri nme ka a-mi sen temi tsi tetse zan kenren-o anyugun aphu gala.

⁹Mishen ka kenyhun gü le Ahoh kami ka Dodo nyugü Eleazar. Khenyüme a-le David au Filistian nyu le terithyü titse kequen kebin khenshü. Tsüka Israel nyu le tesenla,

¹⁰ai a-le a-ben nko lao zhethon tezen lomvu la kemvuthen a-bin ketu mvuo Filistian nyu nren. Tsünyü Npugü le kvukelo keda nme thyü. Tson-o khekela siki Israel nyu le rani Eleazar le kebin bin ka ryüo kesinyu dan ge teri kanyü yhünlo.

¹¹Mishen ka kenshen gü le Harar ka Agee nyugü Shammah. Filistian nyu le Lehi ka kequenlo, tsünyu rhütsi low nme le bin. Tsüka Israel nyu le Filistian nyu mhundyü nyu tinla,

¹²ai Shammah le low günyu so-o tsü rikhun lola, tson-o Filistian nyu gala. Tsünyu Npugü le kvukelo keda nme thyüshü.

¹³Logvü sokejü ka “Mi Shenryü,” dan nyu mishen le Filistian nyu logwa nme le Rephaim ketejon ki nsen kebin ka, David le kehü bin Adullam tsokü ki nshe.

¹⁴Tsügwenkho ka David le rincho ki chwida nme nyu bin lo Filistian nyu dan me le Bethlehem khin sen bin.

¹⁵David le a-ka nnyü ho-o zoshü, “Temi peha no Bethlehem khinrun ka zülvu günyu zü pen ryü ano tsü letse nda!”

¹⁶Tsonshü ntsin shüpahü a-zan kechwi mishen ju le Filistian nyu kensenbin nken gü zülvu gü nyu zü pen-o David kiryü. Ai a-le tsü tsü mvula; tson-o ja pe Npugü kishü la

¹⁷tson-o zoshü, “Npugü ale thame ka hitsü loho! Tsü le a-keyhun pe shü kebin hidan zitsü kebin keme le!” Tsügenyu a-le tsümvu letse la. Hile shüpahü a-zan kechwi mishen ju tho.

¹⁸Joab sikezen gü Abishai (au jvü le Zeruiah) le a-zan kechwi “Mi Shenryü” dan sharhi gü. A-le a-mi sen temi tsishen zen keren-o anyugun ga lao anyugun “Mi Shenryü” dan nyu a-zan chwilo.

¹⁹A-le mi “Shenryü” dan nyu a-zan kechwi tsin gü thyüo anyugun sharhi thyülo, ai a-le “Mishen" dan hontse a-zan chwi mvu.

²⁰Kabzeel ka Jehoida nyugü Benaiah le a-zan kechwi shüpahü kecha nme; a-le Moab nyu teri kekvu nyu mihvu ga kethyü sin-o kepeche tho kechon thyüshü. A-le khütso keche jon nme ka tekhün nme nyu yügü shünyho nme gala.

²¹A-le Ijipt nyu kethonkeda nme le mi sen kehü ko gala. Benaiah le a-thün sen gü tsü gü wheo Ijipt nyu gü ben nyu a-mi se pe tsügü gala.

²²Tsüle Benaiah kepeche tho, a-le “Mi Shenryü” dan nyu nme.

²³A-le anyugun dan nyu mele shasa kethyü nme, ai “Mishen” ju hontse a-zan chwimvu. David le Benaiah lo pe a-rikhun nyu kentsen gü thyü.

²⁴“Mi Shenryü” dan nyu kecha ju le hidan sin: Asahel, Joab sikezen gü Ethanam Bethlehem ka Dodo nyugü Shammah lo Elika Harod temi Helez Pelet temi Ira, Ikkesh nyugü Tekoa temi Abiezer Anothoth temi Mebunnai Hushah temi Zalmon Ahoh temi Maharai Netophah atemi Heleb Naanah nyugü Netophah temi Ittai Ribai nyugü Benjamin ka Gibeah temi Benaiah Pirathon temi Hiddai Gaash khoka ketejon nyu temi Abialbon Arabah temi Azmaveth Bahurim temi Eliahba Shaalbon temi Jashen nyu dan Jonathan Shammah Harar temi Ahiam Sharar nyugü Harar temi Eliphelet Ahasbai nyugü Maakah temi Eliam Ahithophel nyugü Gilo temi Hezro Karmel temi Paarai Arab temi Igal Nathan nyugü Zobah temi Bani Gad temi Zelek Ammon temi Naharai Beeroth temi, Joab teri kanyü kesen gü Ira lo Gareb Jattir temi Uriah Hit temi. Aphu kesin le shüpahü a-zan kechwi shenryüo tsenyü le bin.