Read Southern Rengma Naga 2 SAMUEL 24 Bible Online

2 SAMUEL 24 - Southern Rengma Naga bible

2 SAMUEL 24

¹Npugü le Israel nyu ge a-nyunta gwa ni chwiryü, tson-o a-le David no kekevü senryü anyugun geshü. Npugü le a-ka zoshü, “Gü Israel lo Juda temi sülo.”

²Tson-o David le ahza pe a-rihü dan so kedagü Joab tsüshü: “Nhensin kedanyu zen lo-o kazü peha zin gü kecha zin keti Israel nyu tsipwen aphu nyutemi sülo. Temi dikho le bin yo ale shanyü bin nle.”

³Ai Joab le raja gü jokenishü, “Raja gü, Npugü n Sunggigü no Israel nyu temi thyü chvü pe ntsoka kebin nyeki jün tsi chonkvu shü, lo nno yhun bin-o a-le tsü thyü keshü hyu nda. Tson-e nyuthyüo raja gü le hithyü nyü bin nla?”

⁴Tsonshü-e raja gü le Joab lo a-hensin kedanyu dan no a-jo zenla; anyugun le a-mhundyü ka chwio gü Israel nyu temi swü.

⁵Anyugun le Jordan nken gü Gad lojvü nyu ketejon lvu ka Aroer tesinzin nyida nyu nsenlo. Tsünyu bin-o anyugun le tesozin Jazer ki gü,

⁶lo tson sen-o Hitnyu lojvü Gilead lo Kadesh kigü. Tson-o Dan ka gü lo Dan kabin-o Sidon nkhünzin gü.

⁷Tsüsika tesinzin chwida le kebin Tur nyida ka, lo Hivtnyu, Kanan nyu nyida aphu lo kenkhin ki Juda tesinzin Beersheba ka gü.

⁸Anyugun le njwe kazü gü apentha rhio shye teküo jon nki siki rani Jerusalem nyu ryü.

⁹Anyugun le ryü raja ka pechenyu teri thyülo kegwa le Israel kazü nyu 800,000 lo Juda kazü nyu 500,000 le bin nle tse zoshü.

¹⁰Ai David le temi swü kela siki anyun kenjün thyüo Npugü ka zoshü, “Ale hithyüo kemu kenrin thyü laso! A kemu jüshü lo ale kephakela tho thyü la sele.”

¹¹Npugü le David zen kehü sidyükesha gü Gad ka zoshü, “Gü David ka a-no kejü lo lotse ale tha konshen khishü bin nle. A-le ligü higü kejü lo-o ale tsü thyü shüti.” Lonyü gü David le sokeryü siki,

¹³Gad le a-ki gü Npugü le a-ka nyu zoshü yo pe zoshü, “Digü tila? N kazü nyu chen shen chenda le, nshwikerüchün nyu mhundyü nyu shyeshen tin tile, nkazü nyu jon shen kenpen tila? tse ketso shü. Ntsoka tsü rüchün shüo ano nyu sen nigü Npugü ka zo tiyo zoshü lo.”

¹⁴Tsontsin David le zoshü, “Ale thyülo shvu ritsin kethyü nyu bin laso! Ai ale temi no shaja pe atsü nyümvu. Shaja pe ngun ketsü gütsü no Npugü no a-npvü thyülo, a-le me njünsa kehü genyu.”

¹⁵Tson-o Npugü le kenpen pe Israel nyu geshü, tsü lonyü gü a-le kejü kelo gwenkho gü keti. Kazü tsügü a-te peha zin gü kecha zin keti Israel nyu yie hen tsenyü le sila.

¹⁶Npugü lilo gü le Jerusalem nken gü kejü ka Npugü le shaja pe temi dan tsü kebin a-nyun süni lao anyugun boshvu kebin tsangge lilo gü ka zoshü, “Khela! Tsü le gwaso!” Tsangge logü le Jebus nyu Araunah shyekenyuh bin ka hü.

¹⁷David le temi dan boshvu kebin tsangge lilo gü hyushüo Npugü ka zoshü, “Ale thyümu kela gü. Thyüzü kela gütsü le ale. Temi hidan le nyuthyü shüo la? Nle shaja pe ale lo akami tsü kethyüi.”

¹⁸Tsünyü Gad le gü David ka zoshü, “Araunah shyekenyuh bin ki nsin gü kershvubin nme thyü pe Npugü kishü lo.”

¹⁹David le Npugü johokeshü zen-o Gad le aka zokeshü hontse güla.

²⁰Araunah le nrishü laryü Raja gü lo a-hensin kedanyu jule aki nsinryü kejü hyushü. Tsüselo a-le David mhundyü ka kazü nyu chetsüo

²¹a-ka, “Raja gü nyuthyüo hagun le hika ryü bin nla?” David le a-jokenishü, “Kenpen gü khinla nrün genyu, nshyekenyuh bin hie lo-o kershvubin nme thyü pe Npugü kishü ti le.”

²²Araunah le zoshü, “Khilo, Raja gü, tson-o nle kenyü gü thyü pe Npugü rüshvu lo. Kershvubin ge rope kerüshvu thyü nrün methu tse dan le hika bin; anyu gunda kekhen lo shyekenyuh sen dan-e bin.”

²³Araunah le tsü aphu pe raja gü tsüo a-ka zoshü, “Npugü n Sunggigü no nkerüshvu lolo nda.”

²⁴Ai Raja gü le a-jokenishü, “Nmvu, ale a-mi thyü pe ntsü ti. Ale a-mi thyü kemvu kerüshvu pe a Sunggigü tsü loho.” Tson-o a-le rakagi henpvün pe shyekenyuh bin lo methu tse dan mi thyü.

²⁵Tson-o a-le kershvubin nme thyü pe Npugü tsüo rope kerüshvu lo kepvüshe kerüshvu thyüshü. Lo Npugü le a-kehi kenishüo Israel nyu dan nyu kenpen gü khinla.