Read Southern Rengma Naga 2 SAMUEL 4 Bible Online

2 SAMUEL 4 - Southern Rengma Naga bible

2 SAMUEL 4

¹Saul nyugü Ishbosheth le Hebron nyu Abner dushvu kela rüla shakelo ka nshvula, lo Israel nyu aphu anyugun nyu keyhunkerun la.

²Ishbosheth le rihü dan sharhi mihvu le bin, Benjamin tsipwen Beeroth ka Rimmon nyu hvu Baanah lo Rechab. (Beeroth ko swü pe Benjamin tse kehü genyu.

³Tsünyu yhunkeri nyu le Gittaim ki güla, tson-o tsüki yhun tinla.)

⁴Saul tsipwen kecha nmele Jonathan nyugü Mehibosheth, a-le a-keyhun chenpvün ka mele Saul lo Jonathan au dushvula. Au kesi rüla zo Jezreel nyida ki keryü ka a-keleyi gi le a-pen-o tinla; ai tsügi le nmhesa tin kejü ka a-hokeshwe pe jonla, tson-o a-le phayhon thyüla.

⁵Rechab lo Baanah au le Ishbosheth kaki gü titse tsonchü shüo, nhenyu a-le rüyü kebin gwenkho ka ryü tilo.

⁶Lo khenpvü ka kebin tenu gile thozin kebin ka nnyüo zhütin la, tson-o Rechab lo Baanah au le kanyu yülo.

⁷Au le Ishbosheth zhütsen ki yü laryü a-le zhüsa bin-o au le a-dushvula. Tson-o a-pe thü sen khensin tsonchüo Jordan ketejon pfüthü ryü.

⁸Hebron nyu raja David tsüo a-ka zoshü, “N dushvula titse kehü nshwikerüchün gü Saul nyugü Ishbosheth pe le hi kare. Nthu Npugü le Raja gü no Saul lo a-tsipwen ge a-khünzo kelo thyüshü laso.”

⁹David le au jokenishü, “Ale kenshvu aphu nyu a keni keshü gürhün kehü Npugü zan nyu swe bin nle!

¹⁰Ziklag ka Saul le sila sele tse jolo senryü aketsü gü le a-le jolo kegwa senryü bin nle tse rüchün bin. Ale a-ten lo-o a-boshvula. A-jolo kegwachün ale pe a-ketsü!

¹¹Tsonyatselo kemu kendi nme le a-kanyu zhükebin boshvu kela we ditsüki gwamvu la! Hai le a-dushvu kela genyu ale ntsoka a-khün loti, lo kazü günyu hai sho pe shwe lati!”

¹²Tson-o David le ahza hoshüo a-shüpahü dan le Rechab lo Baanah au dushvula lo au phaben duthü pe Herbon nyu zübun khoka hüla. Lo anyugun le Ishbosheth pe sen gü Hebron ka Abner sika nyu sunla.