Read Southern Rengma Naga 2 SAMUEL 5 Bible Online

2 SAMUEL 5 - Southern Rengma Naga bible

2 SAMUEL 5

¹Tsüselo Israel nyu tsipwen aphu Hebron nyu David kiryüo a-ka zoshü, “Agun aphu nthyü lo nzi le.

²Gükela gwenkho ka, Saul le agun raja thyü kehü ka-e nle Israel nyu zen-o terinyu gü, lo Npugü le nle Israel nyu tsonri lo anyugun kedagü thyüti tse nka zo njü.”

³Tson-o Israel nyu sharhi aphu Hebron ka David kiryü. Tsüka a-le anyugun zen kenshün kejozen lo-o anyugun le terzü pe a-yünlo, tsüselo a-le Israel nyu raja thyülo.

⁴David le a-keyhun chen shenryü ka raja thyülo, lo a-le chen henzi raja thyü.

⁵A-le chen tsenyüo ponha Hebron ka Juda so raja thyü, lo chen shenryü kenshen Jerusalem ka Israel lo Juda aphu so raja thyü.

⁶Gwenkho gü le keryü ka Raja David lo a-temi dan le chwigü Jerusalem whe. Tsünyu yhunkebin Jebus nyu le David le nyida gü sokvu loho tse rüchün-o, a-ka zoshü, “Nle thame ka-e hinyu ryü keloi mvule; yhükeponyu lo phayhon nyu-e hagun khin kelai le,” tsonla.

⁷(Ai David le anyugun Zion chwida lolo la, tson-o tsüle “David nyida” tse tinla.)

⁸Tsünyü David le a-temi dan ka zoshü, “Hinyu kebin ligü higü, ale Jebus nyu nrhi kebin hontse nrhi bin le mvula? Tson yatselo anyugun dushvu gwenzin la tile? Zünyetson then nsin gü yhükepo phayhon dan whe lo,” tsonshü. (Tsügenyu tsühontse zo njü, “Yhükeponyu lo Phayhon nyu le Npugü kanyu yü loho.”)

⁹Chwida gü lokelo siki David le tsünyu yhun lo-o, tsü zan tho pe “David Nyida” tse lo. A-le rincho gü nphozin nnyo pe lvukela bin ka binzen lo-o nyida gü thyü pe hunshü.

¹⁰Npugü Kekvutsin Sunggigü le a-zen kehü genyu David le gon kenye soryü la.

¹¹Tur nyu raja HIram le hanyu nipe David kishü; a-le raja ka nme thyü nrün genyu Sedar sen kethü, tesen mistrinyu lo tso keyhe nyu tse khishü.

¹²Tsügenyu David le a-temi dan genyu Npugü le a-no Israel nyu raja thyü titse a-penso keshü lo a-rajaphen no gwa kenye shü kebin sha lola.

¹³Hebron nyu bin-o Jerusalem nyu ryü kelo siki, David le a-thenu lo a-nu lope sin lo-o a-nyenyu peche lo tenu-e bin sinlo.

¹⁴Jerusalem nyu a-nyenyu hidan nnyu lo: Shamua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada, lo Eliphelet.

¹⁷David pe Israel nyu raja thyülo kela Filistian nyu ka zoshü ntsin a-tenlo titse anyugun rihü dan le chwiryü. David le tsü nyülo njüo chwida nme nyu yüla.

¹⁸Filistian nyu le Rephaim ketejon ka ryüo tsünyu bin lola.

¹⁹Tsontsin David le Npugü ka, “Ano Filistian nyu whe tile? Nle kvukelo pe atsüti mon?” tse ketsoshü. Tsüka Npugü le zoshüo, “Ele, whelo, ale kvukelo pe ntsü ti!”

²⁰Tson-o David le Baal Perazim nyu gü Filistian nyu sokvu lola. A-le zoshü, “Npugü le zükeda hontse a shwikerüchün nyu pfüphe laso.” Tsügenyu bin tsügü pe Baal Perazim tse kola.

²¹Filistian nyu le tin kethyü ka anyugun teromen khela, tson-o David lo a-temi dan le tsüdan sen tinla.

²²Tsüselo Filistian nyu le rani gü Rephaim ka binlo.

²³David le Npugü ketso nishü, tsontsin a-le, “Hika bin-o anyugun whe nya, ai gü gwen ndalo-o lizin balsam senbin khoka anyugun whe lo.

²⁴Nle senbin raki tsonkechü khwenyü lolo anyugun whe lo, ale hagun mhundyü rio Filistian nyu rihü dan hüla nrün genyu.”

²⁵David le Npugü le nyu hontse zoshü yo thyülo, tson-o Geba ka gü Gezer keti tson then Filistian nyu hüla.